Bushe Kuti Mwa-asuka Ici Cipusho?

Mulandu nshi Baibo ibwekeseshapo ukulanda pa fintu fimo?

ILINGI line abalelemba Baibo balebwekeshapo amashiwi yamo yene. Natulande pa fintu fitatu nalimo ifyalelenga balecita ifi:

Ilyo balelemba Baibo. Kale mu Israele abantu abengi tabakwete ibuuku lya Amafunde. Ilingi line baleumfwa fye Amafunde nga ca kuti uluko lwalongana pa cikuulwa ca mushilo. (Amala. 31:​10-12) Kufwile kwaleba ifyalebapumfyanya ilyo balekutika, kabili baleiminina pa ma-awala ayengi mwi bumba ilikalamba. (Nehe. 8:​2, 3, 7) Nga nabalongana nge fi, abalebelenga Amafunde balebwekeshapo amashiwi ayacindama pa kuti abantu baleibukisha Amalembo kabili baleyakonka. Nga babwekeshapo amashiwi yamo, abalekutika baleibukisha ifishinka ifikalamba pamo nga, Amafunde ya kwa Lesa no bupingushi bakwe.—Lebi 18:​4-22; Amala. 5:1.

Inshila balembelemo Baibo. Amabuuku yamo aya mu Baibo ni nyimbo. Amalumbo, Ulwimbo lwa Nyimbo, e lyo na Inyimbo sha Bulanda, ni nyimbo. Mu nyimbo shimo mwaleba amashiwi ayo balebwekeshapo kabili ifi fyalelenga abaleimba baleibukisha amashiwi ya ulu lwimbo. Ku ca kumwenako, moneni amashiwi yaba mu Amalumbo 115:​9-11 ayatila: “Mwe bena Israele, tetekeleni Yehova; E kaafwa wabo kabili e nkwela yabo. Mwe ba ng’anda ya kwa Aarone, tetekeleni Yehova; E kaafwa wabo kabili e nkwela yabo. Mwe batiina Yehova, tetekeleni Yehova; E kaafwa wabo kabili e nkwela yabo.” Bushe mwamona ukuti abaleimba nga balebwekeshapo amashiwi ifyo baleimbapo fyalebafika pa mutima?

Ico balembele Baibo. Inshita shimo abalelemba Baibo balebwekeshapo amashiwi yamo ayacindama. Ku ca kumwenako, ilyo Yehova apeele abena Israele ifunde lya kukanalya umulopa, aebele Mose ukuti abwekeshepo ili ifunde imiku iingi. Lesa alefwaya ukukomaila pa cishinka ca kuti ubumi bwa ca mweo waba mu mulopa wa ciko, e kutila umulopa wimininako ubumi. (Lebi 17:​11, 14) Pa numa ya myaka iingi, ilyo abatumwa na bakalamba balelembela Abena Kristu ifyo bashalingile ukulacita pa kuti belakalifya Lesa, balikomaile na kabili pa kutaluka ku mulopa.—Imil. 15:​20, 29.

Nangu ca kuti Yehova alisuminishe ukuti abalelemba Baibo balebwekeshapo amashiwi yamo, tacipilibula ukuti afwaya ukuti na ifwe e fyo tulecita. Ku ca kumwenako, Yesu atile: “Ilyo ulepepa, wilabwekeshapo ukusosa fimo fine.” (Mat. 6:7) Lyena alilumbwile ne fyo twingapepelapo ifyalingana ne fyo Lesa afwaya. (Mat. 6:​9-13) Nangu ca kuti tatulingile ukubwekeshapo ukulanda amashiwi yamo yene ilyo tulepepa, caliba fye bwino ukupepela pa fintu fimo fine.—Mat. 7:​7-11.

Kanshi caliba fye bwino ifi amashiwi yamo bayabwekeshapo mu Cebo ca kwa Lesa. Ni nshila imo iyo Kasambilisha wesu Uwapulamo atusambilishishamo ifingatuwamina.—Esa. 48:​17, 18