Mulefwaya Icifulo Icisuma ica Kuisambilishishako

Bushe mulafwaya ukwishiba ifingi ilyo muleisambilisha? Kuti mwaeshako ukucita ifyakonkapo pa kuti mulebikako sana amano ilyo muleisambilisha:

• Mulesala icifulo icisuma. Mulesala icifulo ica busaka kabili umuli ulubuuto ulwalinga pa kuti mulebelenga bwino. Kuti mwafwaya apali itebulo nangu kuti mwaisambilishisha panse apali bwino.

• Muleisambilishisha ku cifulo uko mwingaba fye mweka. Yesu aile “lucelocelo” mu kupepa ku ncende “ukushali abantu.” (Marko 1:35) Nga ca kuti te kuti mukwate icifulo uko mwingaba fye mweka, kuti mwaeba ulupwa lwenu nangu abo mwikala nabo ukuti mwalatampa ukuisambilisha kabili kuti mwabeba ukuti belamupumfyanya.

• Muletaluka ifingamupumbula. Muleshininkisha ukuti takuli nangu cimo icingamupumfyanya. Nga mulebomfya foni nelyo tabuleti pa kuisambilisha, mufwile mwaibika apa kuti nangu bamutumina meseji te kuti ifike. Kabili ilyo muleisambilisha nga mwaibukisha icintu cimo ico mulingile ukucita, kuti mwacilemba pamo, e lyo mwaisacibombelapo inshita imbi. Nga mwaleka ukubika amano ku fyo muleisambilisha, kuti mwatala mwaleka ukuisambilisha, mwaololako amolu nelyo mwayololako e lyo mwaisakonkanyapo.