Yesu Alicindika Ishina lya kwa Yehova

1-2. (a) Cinshi Yesu acitile mu nshita ya bushiku ilyo bashilamwipaya? (b) Mepusho nshi twala-asuka muli cino cipande?

PALI Cine mu nshita ya bushiku pa Nisani 14, mu mwaka wa 33, Yesu bali mupepi no kumufutuka, ukumupeela umulandu, ukumupingula ukuti bamwipaye, ukumucusha sana e lyo no kumwipaya. Pali iyi nshita e lyo apwishishe fye ukulya ica kulya caibela pamo na batumwa bakwe aba cishinka mu muputule wa pa muulu. Ilyo bapwishishe fye ukulya, abebele amashiwi ya kubakoselesha aya kulekeleshako. Kabili ilyo bonse bashilafuma muli ulya muputule, Yesu alipepele ipepo ilyacindama sana. Umutumwa Yohane alilembele lilya ipepo, kabili lyaba muli Yohane icipandwa 17.

² Muli cino cipande twalasambililako fimo kwi pepo ilyo Yesu apepele ilyo bali mupepi no kumwipaya. Cinshi camusakamike ilyo ashilafwa? Bushe lilya ipepo lilangilila ukuti cinshi Yesu acindamike ilyo ali pano isonde? Natwasuke aya mepusho.

“NALILENGA BAISHIBA ISHINA LYENU”

3. Finshi Yesu alandile pe shina lya kwa Yehova, kabili aloseshe mwi? (Yohane 17:​6, 26)

³ Ilyo Yesu alepepa, alandile ati: “Nalilenga baishiba ishina lyenu.” Na kuba, alilandile imiku ibili ukuti alilengele abasambi bakwe baishiba ishina lya kwa Yehova. (Belengeni Yohane 17:​6, 26.) Bushe Yesu aloseshe mwi ilyo alandile ifi? Bushe alingile ukulondolwela abasambi bakwe ukuti ishina lya kwa Lesa ni Yehova? Abasambi ba kwa Yesu bali baYuda, kanshi balishibe kale ukuti ishina lya kwa Lesa ni Yehova. Ishina lya kuti Yehova e mo lyali mu Malembo ya ciHebere imiku iingi sana. Kanshi ilyo Yesu alandile amashiwi ya kuti “Nalilenga baishiba ishina lyenu,” talepilibula ukuti alisambilishe abasambi bakwe ukuti ishina lya kwa Lesa ni Yehova. Lelo alepilibula ukuti alilengele baishiba bwino ifyo Lesa aba. Alilengele baishiba bwino sana Yehova, baishiba ifyo afwaya isonde likabe, ifyo afwaya abantu bakaleikala, e lyo ne mibele yakwe.

4-5. (a) Kuti twalangilila shani ifyo cipilibula ukwishiba bwino ishina lya muntu? (b) Bushe Yesu alengele shani abasambi bakwe baishiba bwino Yehova?

⁴ Natulangilile, tutile munyinefwe David ni eluda mu cilonganino mwaba kabili ni dokota. Uyu munyinefwe mwalimwishiba pa myaka iingi. Nomba bushiku bumo mwalwalisha, lyena bamubutushisha ku cipatala uko uyu munyinefwe abombela, kabili abomfya ifyo asambilila pa kumupususha. Ukwabula no kutwishika kuti mwatemenwako uyu munyinefwe ukucila ifyo mwamutemenwe kale, kabili lyonse nga mwaumfwa ishina lyakwe, mwakulatontonkanya pa fyo amucitila. Kwena uyu munyinefwe ni ulya wine eluda uo mwaishiba pa myaka iingi. Lelo nomba mwakulamumona no kuti ni dokota uwamupuswishe.

⁵ Ifi fine e fyo cali na ku basambi ba kwa Yesu. Balishibe kale ishina lya kwa Lesa ilya kuti Yehova. Nomba Yesu alilengele balishiba bwino. Cinshi twingalandila ifi? Ni co Yesu alepashanya sana Wishi muli fyonse ifyo alelanda ne fyo alecita. E ico abatumwa balishileishiba bwino Yehova ilyo balekutika ifyo Yesu alesambilisha na lintu balemona ifyo alecitila abantu.—Yoh. 14:9; 17:3.

“ISHINA LYENU ILYO MWAMPEELA”

6. Bushe Yesu aloseshe mwi ilyo alandile ukuti Yehova alimupeele ishina lyakwe? (Yohane 17:​11, 12)

⁶ Ilyo Yesu alepepelako abasambi bakwe, alandile ati: “Mulebacingilila pa mulandu we shina lyenu ilyo mwampeela.” (Belengeni Yohane 17:​11, 12.) Bushe aya mashiwi yalolele mu kuti nomba Yesu bali no kulamwita ukuti Yehova? Awe. Moneni ukuti ilyo Yesu alandile pe shina lya kuti Yehova, atile “ishina lyenu.” Kanshi ishina lya kuti Yehova talyaishileba lishina lya kwa Yesu. Nomba bushe Yesu aloseshe mwi ilyo alandile ukuti Lesa alimupeele ishina lyakwe? Ica kubalilapo, Yesu aleimininako Yehova kabili e walemulandilako. Aishiile mwi shina lya kwa Wishi kabili muli ili line ishina e mo alecitila ifipesha mano. (Yoh. 5:43; 10:25) Icalenga bubili, ishina lya kuti Yesu lipilibula ukuti “Yehova E Pusukilo.” E ico mu bupilibulo bwe shina lya kuti Yesu, mwaliba ne shina lya kuti Yehova.

7. Cinshi twingalandila ukuti Yesu alelandilako Yehova? Langilileni.

⁷ Pa kuti tumfwikishe ukuti Yesu alelandilako Yehova, tontonkanyeni pali ici cilangililo. Kateka kuti atuma umuntu ukuyamulandilako ku bantu bambi. E ico ifyo engayalanda, kuti fyacindama fye nge fyo kateka umwine engalanda. Ifi fine e fyo cali na kuli Yesu, alikwete amaka ya kulandilako Yehova pantu e wamutumine.—Mat. 21:9; Luka 13:35.

8. Bushe Yehova aloseshe mwi ilyo alandile ukuti Yesu “aleishila mwi shina lyandi”? (Ukufuma 23:​20, 21)

⁸ Apo Yesu ni Cebo, e ulandilako Yehova. E weba bamalaika na bantunse ifyo Lesa afwaya baishiba ne fyo balingile ukulacita. (Yoh. 1:​1-3) Yesu afwile e wali malaika uo Yehova apeele umulimo wa kutungulula abena Israele ilyo bali mu matololo. Ilyo Yehova ale-eba abena Israele ukuti balingile ukulaumfwila ulya malaika, abebele ati: “Pantu aleishila mwi shina lyandi.”a (Belengeni Ukufuma 23:​20, 21.) Icalengele ukuti Yehova alande ifi, ni co Yesu e umulandilako kabili e ulanga sana ukuti fyonse ifyo Yehova acita fyalilungama.

“TATA, CINDIKENI ISHINA LYENU”

9. Bushe Yesu acindike shani ishina lya kwa Yehova? Londololeni.

⁹ Nga fintu twasambilila, na lintu Yesu ashilaisa pano isonde alicindike sana ishina lya kwa Yehova. Na lintu ali pano isonde, fyonse ifyo alecita fyalelangilila ukuti alicindike sana ishina lya kwa Yehova! Ilyo Yesu ali mupepi no kufwa alandile ati: “Tata, cindikeni ishina lyenu.” Ilyo line Wishi alilandile mwi shiwi ilikalamba ukufuma ku muulu ati: “Nindicindika e lyo nkalicindika na kabili.”—Yoh. 12:28.

10-11. (a) Bushe Yesu alengele shani ishina lya kwa Yehova lyaba ilya mushilo? (Moneni ne cikope.) (b) Cinshi ishina lya kwa Yehova lilingile ukubela ilya mushilo, kabili mulandu nshi cilingile ukwishibikilwa ukuti fyonse ifyo Yehova acita fyalilungama?

¹⁰ Yesu na o alelenga ishina lya kwa Wishi lyaba ilya mushilo. Alecita shani ifi? Inshila imo iyo alecitilamo ifi, kusambilisha abantu pa mibele iisuma nga nshi iyo Wishi akwata e lyo ne fintu ifisuma ifyo acita. Lelo kwali na fimbi ifyo Yesu alecita. Finshi alecita? Alilangile ukuti fyonse ifyo Yehova acita fyalilungama, no kuti ishina lyakwe lya mushilo. Ilyo Yesu alesambilisha abasambi bakwe ifya kupepa, alilangile ukuti calicindama ukulenga ishina lya kwa Yehova lyaba ilya mushilo. Abasambilishe ukulapepa ati: “Shifwe wa mu muulu, ishina lyenu libe ilya mushilo.”—Mat. 6:9.

¹¹ Mulandu nshi ishina lya kwa Yehova lilingile ukubela ilya mushilo, kabili mulandu nshi cilingile ukwishibikilwa ukuti fyonse ifyo Yehova acita fyalilungama? Mulandu wa kuti Satana Kaseebanya alibepeshe Yehova Lesa mwi bala lya Edeni. Satana alandile ukuti Yehova wa bufi no kuti talefwaya Adamu na Efa balekwata ifintu ifisuma. (Ukute. 3:​1-5) Ilyo Satana alandile ifi aloseshe mu kuti Yehova tacita ifintu ifyalungama. Pa mulandu wa kuti Satana alibepeshe Yehova, abantu nalimo kuti balamona kwati Yehova te Lesa umusuma. Mu nshiku sha kwa Yobo, Satana alandile ukuti icilenga abantu balebombela Yehova, fintu ifyo abapeela. Na kabili Satana abepele ukuti abantu kuti baleka ukubombela Yehova nga nabakwata amafya pantu tabamutemwa mu cine cine. (Yobo 1:​9-11; 2:4) Palingile ukupita inshita pa kuti cishibikwe uwali uwa bufi pali Yehova na Satana.

“NDETUULA UMWEO WANDI”

12. Cinshi Yesu aitemenwe ukucita pa mulandu wa kuti alitemwa ishina lya kwa Yehova?

¹² Pa mulandu wa kuti Yesu alitemwa Yehova, lyonse alecita ifisuma pa kuti alenge ishina lya kwa Yehova libe ilya mushilo, kabili alange ukuti fyonse ifyo Yehova acita fyalilungama. Yesu atile: “Ndetuula umweo wandi.” (Yoh. 10:​17, 18) Cine cine, Yesu ali-itemenwe no kufwila pe shina lya kwa Yehova.b Abantunse ba kubalilapo, e kutila Adamu na Efa bali abapwililika, lelo tabaumfwilile Yehova. Bacitile ifyo Satana abebele ukuti bacite. Nomba Yesu ena ali-itemenwe ukwisa pano isonde kabili alilangile ukuti alitemwa Yehova. Pa kulanga ukuti alitemwa Yehova, alemumfwila muli fyonse ifyo alelanda na muli fyonse ifyo alecita. (Heb. 4:15; 5:​7-10) Alitwalilile ukuba uwa cishinka mpaka bamwipaya imfwa iyabipa sana pa cimuti ca kucushiwilwapo. (Heb. 12:2) Ifi acitile fyalangile ukuti alitemenwe Yehova kabili alitemenwe ishina lyakwe.

13. Cinshi twingalandila ukuti Yesu e walingile sana ukulangilila ukuti Satana wa bufi? (Moneni ne cikope.)

¹³ Fyonse ifyo Yesu alecita fyalelanga bwino bwino ukuti Satana e wa bufi, te Yehova iyo! (Yoh. 8:44) Takwaba nangu umo uwaishiba bwino Yehova ukucila ifyo Yesu amwishiba. Nga ca kuti pali fyonse ifyo Satana alandile pali Yehova pali ifya cine, Yesu nga alishibe. Lelo ico Yesu abikileko sana amano kulandilako ishina lya kwa Yehova. Na lintu camoneke kwati Yehova alimulekeleshe, Yesu ali-itemenwe ukufwa ukucila ukupondokela Wishi uwamutemwa.—Mat. 27:46.c

“NIMPWISHA UMULIMO UO MWAMPEELA”

14. Bushe Yehova alambwile shani Yesu pa mulandu wa kuti alitwalilile ukuba ne cishinka?

¹⁴ Mwi pepo ilyo Yesu apepele mu nshita ya bushiku ilyo bashilamwipaya, alandile ati: “Nimpwisha umulimo uo mwampeela ukubomba.” Alicetekele ukuti Yehova ali no kumulambula pali filya atwalilile ukuba ne cishinka. (Yoh. 17:​4, 5) Yesu alicitile bwino filya acetekele Wishi. Yehova talekele Yesu atwalilila ukuba mu nshiishi. (Imil. 2:​23, 24) Alimubuushishe kabili amupeele icifulo icikalamba ku muulu. (Fil. 2:​8, 9) Mu kupita kwa nshita Yesu aishileba Imfumu ya Bufumu bwa kwa Lesa. Finshi ubu Bufumu bwali no kucita? Ifyo Yesu aebele abasambi bakwe ilyo alebasambilisha ifya kupepa kuti fyalenga twaishiba icasuko. Abebele ukulapepa ati: “Ubufumu bwenu bwise. Ifyo mufwaya ficitwe pano isonde nga mu muulu.”—Mat. 6:10.

15. Finshi fimbi ifyo Yesu akacita?

¹⁵ Nomba line, Yesu ali no kulwa na balwani ba kwa Lesa kabili ali no kulofya bonse abacita ifyabipa ilyo kukaba inkondo ya Armagedone. (Ukus. 16:​14, 16; 19:​11-16) Pa numa fye ya nkondo ya Armagedone, Yesu akapoosa Satana mu “cilindi icabula impela” umo ashakakwate amaka ya kucita icintu nangu cimo. (Ukus. 20:​1-3) Lyena Yesu akateka pa myaka 1,000. Ilyo akalateka, akalenga pano isonde pakabe umutende kabili akalenga abantu bakabe abapwililika na kabili. Akabuusha abafwa. Akalenga isonde lyonse likabe Paradaise. Ifyo Yehova afwaya isonde lyaba fikafikilishiwa!—Ukus. 21:​1-4.

16. Bushe ifintu fikaba shani ilyo imyaka 1,000 iyo Yesu akateka ikapwa?

¹⁶ Bushe ifintu fikaba shani ilyo imyaka 1,000 iyo Yesu akateka ikapwa? Ulubembu no kukanapwililika bakafifumyapo. Abantu tabakalekabila icilubula pa kuti Yehova ababelele uluse pa membu shabo, kabili tabakalekabila na bashimapepo aba kubalandilako kuli Yehova. Na kabili “umulwani akalekeleshako ukonaula ni mfwa.” Mu nshiishi tamwakabe umuntu nangu umo uwafwa pantu bonse abafwa bakabuushiwa. Abantu bonse pano isonde bakaba abapwililika.—1 Kor. 15:​25, 26.

17-18. (a) Cinshi cikacitika ilyo imyaka 1,000 iyo Kristu akateka ikapwa? (b) Finshi Yesu akacita ilyo inshita ya kuti aleke ukuteka ikafika? (1 Abena Korinti 15:​24, 28) (Moneni ne cikope.)

¹⁷ Finshi fimbi fikacitika pa numa ya myaka 1,000 iyo Kristu akateka? Pali ilya nshita, icintu icacindama sana cikacitika. Cintu nshi ico cine? Takwakabe nangu umo ukalatwishika na kabili ukuti ishina lya kwa Yehova lya mushilo, no kuti fyonse ifyo acita fyalilungama. Cinshi twalandila ifi? Mwi bala lya Edeni Satana alandile ukuti Yehova wa bufi, no kuti tatemwa abantu abo ateka. Ukutula ilya nshita, bonse ababombela Yehova ne cishinka balalenga ishina lyakwe lyaba ilya mushilo. E ico ilyo imyaka 1,000 iyo Kristu akateka ikapwa, ishina lya kwa Yehova likacindikwa umupwilapo. Pali ilya nshita cikailanga fye apabuuta tuutu ukuti Yehova ni Shifwe wa ku muulu uwatutemwa.

¹⁸ Pa numa ya myaka 1,000 iyo Kristu akateka, bonse bakeshiba ukuti fyonse ifyo Satana alandile pali Yehova fya bufi. Cinshi Yesu akacita ilyo inshita ya kuti aleke ukuteka ikafika? Bushe akacita nge fyo Satana acitile no kupondokela Yehova? Awe nakalya! (Belengeni 1 Abena Korinti 15:​24, 28.) Yesu akabwesesha Wishi Ubufumu. Akasumina ukuti Yehova alemuteka. Cine cine, Yesu akaitemenwa ukubwesesha Wishi amaka ya kuteka pantu alimutemwa.

19. Bushe Yesu amona shani ishina lya kwa Yehova?

¹⁹ E mulandu wine Yehova aitemenwe ukupeela Yesu ishina lyakwe! Yesu alilanga bwino bwino ifyo Wishi Yehova aba. Bushe Yesu amona shani ishina lya kwa Yehova? Alimona ukuti takwaba nangu cimo icacindama ukucila ili ishina. Ali-itemenwe ukufwila ili ishina, kabili pa numa ya myaka 1,000 iyo akateka, akaitemenwa ukubwesesha Yehova Ubufumu. Bushe kuti twapashanya shani Yesu? Tukasuka ici cipusho mu cipande cikonkelepo.