Kalata Ukufuma kwi Bumba Litungulula

Bamunyinefwe:

Natutemwa nga nshi ukumulembela ino kalata mwe babomfi ba cishinka aba kwa Yehova, mwe bali nomba ukucila pali 7 milioni. Nga mwamonana na Nte munenu uwa ku calo cimbi, mulomfwa bwino pantu ninshi mwasanga munyinenwe uo mwatemwa. (Yoh. 13:34, 35) Kanshi na lintu mulebelenga cino citabo, amalyashi ya bamunyinenwe ba mu fyalo fimbi ayalanga ifyo baba ne citetekelo ne cishinka yalamulenga ukubatemenwako.

Amalipoti tulepokelela mu fyalo ifingi yalelanga ukuti mwe bengi mulakwata Amapepo ya Lupwa. Mwe bakwata abana abanono mulabomfya inshila shalekanalekana ishisuma pa kusambilisha abana benu. (Efes. 6:4) Abaupana balekosha ifyupo fyabo ilyo balesambilila pamo Icebo ca kwa Lesa pa Mapepo ya Lupwa. (Efes. 5:28-33) Ukwabula no kutwishika, iyi programu ya kusambilila Icebo ca kwa Lesa nailenga abashimbe ne ndupwa ukukosha bucibusa bwabo na Lesa.—Yosh. 1:8, 9.

Tuli no bulanda nga nshi kuli bonse abasanshilwe mu finkukuma ifyacitike nomba line. Tuletasha na babombeleko umulimo wa kwafwilisha bamunyinefwe abasanshilwe muli ifi finkukuma. (Imil. 11:28-30; Gal. 6:9, 10) Kabili, mu filonganino mulongana, mwaliba bamunyinefwe bamo abafwilisha Abena Kristu banabo abakabila ubwafwilisho. Aba musango uyu baba nga Dorka wa mu Baibolo, ‘uwalebomba imilimo isuma iingi nga nshi kabili uwali kapekape.’ (Imil. 9:36) Mwe baba nga Dorka ishibeni ukuti Yehova alamona ifyo mucita kabili akamulambula.—Mat. 6:3, 4.

Mu fyalo fimo, mwaba abantu incenjeshi ‘abacululusha abantu’ ba kwa Lesa ukubomfya “ifipope fya mafunde.” (Amalu. 94:20-22) Apo mwalishiba ukuti Yesu alisobele ifya musango uyu, mulashipikisha ilyo fyacitika no kubutukila kuli Yehova ukuti musange icubo. (Yoh. 15:19, 20) Ishibeni ukuti lyonse tulamupepelako ilyo muletwalilila “ukwasuka umuntu onse uwingamwipusha pe subilo lyenu.”—1 Pet. 3:13-15.

Kabili tuletasha bonse mwe baletwalilila ukuba ne mibele isuma te mulandu ne fyo Satana alebombesha ukonaula imibele ya bantu. Ilyo imibele ya bantu muli cino calo ilebipilako fye, imwe muletwalilila ukuba abakosa “muli Shikulu na mu maka ya bukose bwakwe.” (Efes. 6:10) Mwalifwala “ifya bulwi fyonse ifya kwa Lesa,” kabili e calenga mube na maka ya kwiminina ndi ku kulwisha “imicenjelo ya kwa Satana Kaseebanya.” (Efes. 6:11, 12) Ishibeni ukuti ifyo mucita e filenga Yehova akwate amaka ya kwasuka Satana, uumuseebanya!—Amapi. 27:11.

Twalyumfwile bwino ukumona abantu abengi abasangilwe ku Cibukisho ca mfwa ya kwa Shikulu mu 2011, abali 19,374,737. Icalengele ukuti abafula ifi basangweko ni co fwe bengi twalibombeleko bupainiya bwa kwafwilisha mu April. Abantu abengi balyumfwile amashiwi ya kulumbanya Yehova ilyo Inte shakwe isha cishinka shaleshimikila mwi sonde lyonse! (Rom. 10:18) Nampo nga mwali pali bamunyinefwe 2,657,377 ababombeleko bupainiya bwa kwafwilisha mu April nelyo pa babombeshe mu mulimo wa kushimikila muli uyu mweshi, bonse mwalengele imitima yesu ukusekelela pa fyo mwaipeeleshe mu mulimo wa kushimikila.—Amalu. 110:3; Kol. 3:23.

Umwaka wapwile, abantu 263,131 e babatishiwe. Tuletasha Yehova, e lyo na imwe bonse ababatishiwe pa kuilunda kuli ifwe mu mulimo wa kwita na bambi ilyo tuletila: “‘Iseni!’ Na onse uuleumfwa lekeni asose ati ‘Iseni!’ Na onse uuli ne cilaka ese; onse uulefwaya anwepo amenshi ya mweo aya bupe fye.” (Ukus. 22:17) Pa numa ya kupituluka mu mbali shalekanalekana isha Bufumu bwa kwa Lesa pa kulongana kwa citungu ukwa mu 2011, tulefwaisha ukuti, ‘Ubufumu bwa kwa Lesa Bwise!’ Ukulingana na mashiwi Yesu asosele aya kuti “ndeisa bwangu,” na ifwe tulesosa no mweo onse amashiwi umutumwa Yohane asosele aya kuti: “Ameni! Iseni, mwe Shikulu Yesu.”—Ukus. 22:20.

Ilyo mulelolela bulya bushiku, ishibeni ukuti twalimutemwa icine cine bamunyinefwe, mwe balelanga ifyo mwatemwa Yehova “mu milimo na mu cine”!—1 Yoh. 3:18.

Ni fwe bamunyinenwe,

Ibumba Litungulula Ilya Nte sha kwa Yehova