Ifyalo Fyabela ku America

“Twakulasambilila Pamo”

Ba Ismael abekala ku Mexico, balefwaya ukupwisha ukubelenga Baibolo yonse. Mu mwaka umo babelengele Baibolo yonse imiku ibili nomba ku ca bulanda, balilekele ukumona. Ilyo papitile imyaka, ba Ángel Inte ya kwa Yehova, balimonene na ba Ismael kabili balibebele pa malayo ayo Lesa alaya abantu. Ba Ismael balefwaisha ukusambilila ifingi, lelo batile, “Teti imbelenge Baibolo pantu nshimona.”

Ba Ángel bakoseleshe ba Ismael ukuti, “Mwisakamana, nkamusambilisha ifya kubelenga ifilembo fya mpofu.”

Ba Ismael baipwishe ukuti, “Bushe mwalishiba ukufibelenga?”

Ba Ángel batile, “Awe nshaishiba, lelo twakulasambilila pamo.” Ba Ismael balipapile sana ukwishiba ukuti ba Ángel kuti babafwilisha muli iyi nshila. Lelo ilyo ba Ángel baile ku ng’anda, balifwailishe pa fya kubelenga ifilembo fya mpofu, kabili balipekenyeko ne filembo fimo pa cibokoshi. Lyena batendeke ukusambilisha ba Ismael ifya kubelenga. Tapakokwele ba Ismael balisambilile ifya kubelenga amashiwi babomfya mu filembo fya mpofu kabili balitendeke no kubelenga impapulo. Pali ino nshita ba Ángel balikwata abasambi ba Baibolo 4 abashimona. Abasambi ba ba Ángel balitemwa ukulanda pa nshita ilyo icalo cikaba Paradaise; ilyo amenso yabo yakamona na kabili.

Alifililwe Ukubeshiba

Viannei nkashi uuli ne myaka 14 uwikala ku United States, alembele ukuti: “Bakafundisha abatusambilisha social studies batendeke ukutusambilisha pa mipepele. Batwebele ukulumbula amashina ya mipepele. Ine nalumbwile Inte sha kwa Yehova. Abo nalesambilila nabo balisekele, kabili balandile ukuti tulabapoosela inshita, tatwakata ifyacindama ifya kucita no kuti balapoosa impapulo isho tubapeela. Bakafundisha nabo bene balelanda ifyabipa.

“E ico nalipepele kuli Yehova pa kuti angafwe ukuba uwashipa pa kubashimikila. Nabebele ukuti icilenga tuleya pa mayanda yabo, te mu kubapoosela inshita, lelo ni co ni Yehova e ututuma ukubeba ifyo Baibolo isambilisha. Nalibebele ukuti tabalingile ukulapoosa impapulo pantu kuti shayalula ubumi bwabo kabili kuti shalenga bapusuka. Bakafundisha balilombele ubwelelo kabili balandile ukuti ilyo ba Nte bakabatandalila na kabili, bakabapokelela no kukutika ku fyo bakabashimikila, kabili bakabelenga ne mpapulo. Ilyo naumfwile ifyo bakafundisha banjebele, nalemona kwati balebepa fye.

“Ilyo papitile imyeshi 4, nalimonene na bakafundisha kabili icampapwishe ca kuti balitendeke ukusambilila Baibolo. Ilyo papitile imyeshi na imbi 6, balimfwaile pa sukulu no kuntasha pa fyo nabashimikileko. Ilyo twamonene, nalifililwe ukubeshiba pantu balibeyele umushishi no mwefu. Pali ino nshita ni bakasabankanya abashabatishiwa.”

Ukushimikila mu Amazon

Mu mwaka wapwile, Inte sha kwa Yehova mu Brazil balibilile sana imbila nsuma ku bantu bekala mu fitungu fya Amazon. Abantu abengi mu Amazon tabaumfwapo imbila nsuma. Ici e calengele Ibumba Litungulula lisuminishe ukuti aba bwananyina bakaye kuli iyi ncende mu kubila imbila nsuma pa mwaka uutuntulu pa kuti bashimikile ku bantu abekala mu ncende ishaba ukutali sana muli ici icitungu.

Ababombela pa maofeshi ya Nte sha kwa Yehova mu Brazil balisalile imisumba 53 umo umumana wa Amazon wapita ukuti e mo bakayeshimikila pali iyi inshita. Mu myeshi fye 4, bakasabankanya ukucila pali 6,500 baliipeeleshe ukubombako uyu umulimo.

Mu musumba wa Anamã umushaba kasabankanya nangu umo, aba bwananyina 10 balishimikilemo pa nshiku 11 kabili balipeele abantu impapulo ukucila pali 12,500 no kutendeka amasambililo ya Baibolo 200 ayo batungulula pali ino nshita ukubomfya foni. Ilyo baali kulya, bamunyinefwe balitendeke ukulongana. Pa kulongana balekelesheko ukukwata ilyo baali muli uyu musumba, abantu 90 balishile mu kulongana. Tatulamona ifisuma fyonse ifikafuma muli uyu umulimo bamunyinefwe babombele.

Bamukoseleshe Ukubomfya jw.org

Pa myaka 6 iyapita, Jehizel na Mariana basambilila bonse pa sukulu ilyaba mu Venezuela. Apo Jehizel ni Nte ya kwa Yehova, balemupumya sana kuli Mariana. Mariana alemona kwati Jehizel taishiba ifya kuipakisha ubumi. Bushiku bumo pa numa ya kumweba sana amashiwi yabipa, nkashi yesu atile: “Mariana, ukamoneko ifyaba pa webusaiti yesu iya jw.org. Lyena ukaye apo balemba ati ‘Amavidio,’ e lyo ukatinike apo balemba ukuti ‘Imisepela.’”

Bulya bwine ubushiku icungulo, Mariana alitumiine Jehizel foni no kumweba ati: “Nomba naishiba ico ucitila fyonse filya.”

Apo Jehizel taishibe umo Mariana aloseshe, amwipwishe ati: “Bushe watendeka ukumpumya na kabili?”

Mariana ayaswike ati: “Awe, nshakatale nkupumyapo na kabili. Natasha sana pantu nomba naishiba ukuti ifyo nalemona kwati e fyalelenga ndeba ne nsansa, e fyalendetela sana amafya.” Mariana alitendeke ukusambilila Baibolo kabili pali ino nshita alalongana lyonse.

Amepusho ya Kwipusha Bashimapepo

Ba Gérole baali ni bakalemba mwi calici ca ku Haiti. Balitemenwe ifyo Inte sha kwa Yehova balebomfya Baibolo pa kwasuka ifipusho babepwishe. Ici calengele ba Gérole no mwana wabo batendeke ukusambilila Baibolo. Apo balitemenwe sana ifyo balesambilila, balandile ukuti balebatungulula isambililo imiku ibili mu mulungu.

Ilyo basambilile Baibolo pa myeshi itatu, ba Gérole baile kuli bashimapepo ba ku calici baleya no kubepusha aya amepusho 4: “Ni mu mwaka nshi Yesu bamubikile pa Bufumu? Ni kwisa abantu abasuma baya nga bafwa? Ni kwisa abantu abacita ifyabipa baya nga bafwa? Ni pali cinshi Yesu bamwipaile, ni pa musalaba nelyo ni pa cimuti?” Bashimapepo balandile ukutila, kuti bayasukapo fye icipusho calenga bubili ne ca butatu. Balandile ukuti, “Ba Nte batila ba 144,000 e bakaya ku muulu. Nomba ine naishiba ukuti abantu bonse abacita ifisuma bakaya ku muulu e lyo abacita ifyabipa, bakayapya mu mulilo wa pe.” Ilyo babebele ukuti babapeele Amalembo ayalanga ukuti ifyo balelanda fya cine, balifililwe. Ba Gérole balyumfwile ububi, nomba ici calengele balefwaisha sana ukusambilila Baibolo. Balifuutishe ishina ku calici baleya kabili balandile ukuti balisambilile ifingi pali Baibolo mu myeshi itatu iyo balesambilila ne Nte sha kwa Yehova ukucila ifyo basambilile mu myaka 30 iyo baleya ku calici. Ba Gérole no mwana wabo balibatishiwa, kabili balatungulula amasambililo ya Baibolo 23 mu mushi bekala.