Oceania

Bakafundisha Basukile Baya ku Cibukisho pa Numa ya Myaka 9

Ilyo Olivia uwikala ku Australia aali ku nasari, alyebele bakafundisha bakwe ukuyasangwa ku Cibukisho. Cila mwaka pa myaka 8 iyakonkelepo, Olivia alitwalilile ukweba bakafundisha bakwe ukuyasangwa ku Cibukisho. Nomba mu 2016 e lyo bakafundisha bakwe bamutumiine foni ukuti balefwaya ukuyasangwa ku Cibukisho. Bakafundisha batile baleumfwa bwino filya Olivia alebeta ku Cibukisho cila mwaka. Bakafundisha bakwe baliile ku Cibukisho na bena mwabo. Ilyo bafikile pa Ng’anda ya Bufumu, abena mwabo balibukishe ifyo cali ilyo balekuula ilya Ing’anda ya Bufumu pantu pa nshita imo balebomba ku council (ubuteko bwa cikaya). Baebele bamunyinefwe ukuti balitemenwe ifyo bamunyinefwe balebomba ukwabula icimfulumfulu ilyo balekuula Ing’anda ya Bufumu. Bakafundisha na bena mwabo balitemenwe ifyo ukulongana kwali ica kuti bali pa balekeleshe ukufuma pa Ng’anda ya Bufumu.

Balibelengele Icitabo Imiku Itatu

Ba Jacintu na bena mwabo abekala ku Timor-Leste, ni baKatolika abakamamo na menshi. Balipapile sana ilyo umwipwa wabo alekele ukupepa ku Katolika no kuba Inte ya kwa Yehova. Apo ba Jacintu balefwaya ukushinina umwipwa wabo ukuti ifyo alesambilila fya bufi, batendeke ukubelenga icitabo citila Bushe Cinshi Baibolo Isambilisha? Ico balefwaisha, kusangamo ifisambilisho fya bufi. Lyena baebele abena mwabo ukuti: “Nimbelenga icitabo conse. Ifyebo fyonse ifyabamo fisuma.”

Abena mwabo batile, “Nalimo tamwacibelengele fye bwino. Mukacibelenge na kabili, nomba uno muku mukateke umutima pa kubelenga.”

Ba Jacintu balibelengele ici icitabo na kabili no kweba abena mwabo ukuti: “Ifyebo fyaba muli ici citabo fisuma, kabili fyonse ifyabamo fyafuma mu Baibolo. Ne fyo cilanda pa kupepa abafwa na fyo fyafuma mu Baibolo.”

Abena mwabo balandile na kabili ukuti: “Mukabelenge na kabili umuku walenga butatu, lelo uno muku, mukaleshila mu maparagrafu kabili mukalebikako sana amano ilyo mukalabelenga. Cifwile ukuba citabo ca bufi.”

Ba Jacintu balibikileko amano ilyo balebelenga kabili baleshila mu maparagrafu yonse ayo babelenga. Ilyo bapwile ukubelenga pa muku walenga butatu, batile: “Ala fyonse fya cine. Ifyo umwipwa wesu asambilila fya cine.” Pali ino nshita ba Jacintu balasambilila Baibolo ne Nte sha kwa Yehova.

Ifyo Umwana Wabo Alandile Fyalengele Batendeke Ukusambilila Baibolo

Nkashi umo painiya uwikala ku Guam, ailetandalila abanakashi bamo abekala pa cishi ca Pohnpei no kubatambisha vidio itila Mulandu Nshi Mulingiile Ukusambilila Baibolo? Uyu nkashi aebele aba banakashi ukuti aali no kubatandalila na kabili. Nangu ca kuti alibweleleko imiku iingi, talebasanga pa ng’anda. Ilyo abweleleko na kabili, umwana wa aba banakashi e wamupokelele, kabili uyu nkashi alitambishe umwana vidio iyaba mu cipande ca pa webusaiti ya jw.org icitila Beni Cibusa wa kwa Yehova. Umwana alitemenwe sana ukutamba iyi vidio. Ilyo uyu nkashi abweleleko, banyina e bamupokelele kabili balekutikisha ilyo uyu nkashi alebalondolwela ifyo Baibolo isambilisha. Cimoneka kwati umwana alyebele banyina ukuti alefwaya baleya ku calici ukupepa abanakashi abamutambishe vidio. Ifyo uyu umwana aebele banyina nalimo e fyalengele balafwaisha ukwishibilapo ifingi. Uyu nkashi alibalangile ifyo tusambilila Baibolo kabili balipekenye ukuti bakatwalilile ukusambilila.

Bali “nge Mpaanga Ishabula Kacema”

Ba Terence, bakangalila wa muputule na bena mwabo ba Stella baile mu kubombela ku Inakor. Kuli ici icifulo icaba ku calo ca Papua New Guinea, takwaba bakasabankanya abali bonse ababombelako. Ba Terence batile: “Ilyo twaikeleko fye ubushiku bumo, twaumfwile fye abantu balekonkonsha ku ciibi lucelocelo ninshi tatulabuuka no kubuuka. Twasangile abantu abengi balelolela pa nse, e ico twatendeke ukubashimikila ukufuma 6 koloko ya lucelo ukufika  12 koloko. Twalitalile twaleka pa kuti tusambeko, lelo ilyo twabwelele, twasangile abantu na bambi abengi baletulolela. E ico twalishimikile na kabili ukufuma ku ma 2 koloko ya kasuba ukufika pa kati ka bushiku.” Ubushiku bwakonkelepo, ba Terence na bena mwabo baimine ku macaca no kuya ku cifulo cimbi. Na lyo line, abengi bashele balebafwaya apo baleikala, lelo tababasangile. Ba Terence batile, “Ilyo baishibe fye uko twaile, balitukonkele kabili balitusangile. Na kabili twalibashimikiile ukufika akasuba pa kati. Ilyo twalebwelela uko twafikilile, twasangile abantu na bambi abengi baletulolela. Ifi e fyalecitika cila bushiku. Aba bantu bali ‘nge mpaanga ishabula kacema.’”—Mat. 9:36.

Ba Physiotherapist Balibapeele Ifya Bupe

Ba Agnès bapainiya abekala ku New Caledonia, baile mu kumona balya abacina abantu, abo beta ukuti ba physiotherapist pantu ukuboko kwalekalipa. Ilyo ba physiotherapist balebombela pali ba Agnès, balandile ukuti balamona ifyo abantu abengi bacula, kabili ici calenga balemona kwati Lesa munkalwe. Ba Agnès balitashishe Yehova mu mutima pa kubapeela ishuko lya kumulandilako. Lyena ba Agnès balangile abalebondapa trakiti itila Bushe Ukucula Kukatala Akupwa? kabili bababelengeele Ukusokolola 21:3, 4.

Ba physiotherapist batile: “Nshishibe nga ca kuti ilembo mwabelenga e mo lyaba muli Baibolo yandi pantu mwaba fye Amabuuku ya Mbila Nsuma.” Lyena ilyo baishibe ukuti ba Agnès ni Nte ya kwa Yehova, balibebele ukuti balimonenepo ne Nte sha kwa Yehova ku calo bafumine ku Chile.

Ba Agnès baibukishe ukuti na kuba, pa JW Broadcasting pali lipoti iyalelanda pa calo ca Chile. E ico ilyo babweleele kuli ba physiotherapist, baile na tabuleti kabili balibatambishe vidio yalelanda pa calo ca Chile. Ba physiotherapist balitemenwe sana ilyo bamwene Amaofeshi ya Nte sha kwa Yehova e lyo ne Cikuulwa ca Kulonganinamo ukulongana kukalamba mu Chile. Lyena ba Agnès batile: “Icintu na cimbi ico ndefwaya ukumupeela ni Baibolo iituntulu pa kuti mulebelenga ilembo namubelengeele umulungu wafumineko ilya Ukusokolola 21:3, 4. Ba physiotherapist balimine apo baikele ninshi bali ne nsansa, bakumbatila ba Agnès no kubeba ati, “Natasha sana pali ifi ifya bupe fibili ifisuma ifyo mwampeela.”

Ilyo babweleleko na kabili, ba Agnès baile ne citabo citila Bushe Cinshi Baibolo Isambilisha? no kubalondolwela na kabili icilenga fwe bantu tulecula. Ba physiotherapist, balandile ukuti bali no kufuma ku New Caledonia no kuya ku Chile mu kutuusha, kabili balandile ukuti bali no kusenda ici citabo pa kuti bakayepwisha ukucibelenga.