GEORGIA
Nalimwene na Menso Yandi Ifyo Baibolo Ilanda!
Ba Pepo Devidze
BAFYELWE MU 1976
BABATISHIWE MU 1993
Ukutula ku bwaice balepepa ku calici ca Georgian Orthodox kabili balekonka sana intambi sha muli ici icalici. Pa numa ya kusambilila icine, balibombeleko na pa Bethel na bena mwabo. Pali ino nshita ni bapainiya baibela.
NAISHIBE ukuti kwaliba Inte sha kwa Yehova ilyo nali pa koleji mu musumba wa Kutaisi. Umwina mupalamano anjebele ukuti ba Nte tababomfya ifimpashanya pa kupepa kabili tabasumina ukuti Yesu ni Lesa wa Maka Yonse. Ifyo anjebele fyalipusene sana ne fyo nasuminemo mu calici ca Orthodox.
Ilyo nabwelelemo ku mwesu ku Tsageri mu 1992, nasangile ukuti ba Nte nako eko baba kabili balebomba no mulimo wa kubila imbila nsuma. Bamayo balyumfwile ifisuma ifingi pali ba Nte. Apo nalipatile ba Nte, bamayo banjebele ukuti, “Kaimwene ifyo basambilisha.”
Bamunyinefwe babili bapainiya ba Pavle na ba Paata baleisa ilingi mu kusambilisha ulupwa ulwali mupepi na apo twaleikala. Abena mupalamano abengi baletemwa ukukutika ku fyo aba bapainiya balesambilisha kabili balebepusha ifipusho. E ico na ine nalitendeke ukulaya mu kukutikako ku fyo aba bapainiya balesambilisha. Lyonse nga naipusha icipusho, aba bapainiya baleisula Baibolo no kumpeela ukuti mbelenge. Ukucita ifi kwalelenga ndeimwena na menso yandi ifyo Baibolo ilanda!
Nasukile naba mwi bumba ilyo aba bapainiya baleisa mu kusambilisha Baibolo. Umwaka wakonkelepo, ine na bo nalesambilila pamo nabo 9 twalibatishiwe. Tapakokwele, bamayo nabo balibatishiwe.
Ndatasha pa fyo aba bamunyina balempeela Baibolo ukuti njibelengele ne mwine pa kusanga ifyasuko ku fipusho nalebepusha. Ici calengele naishiba ifishinka fyonse ukulingana ne fyo Baibolo isambilisha ifyapusene ne fyo nasuminemo. Nga naibukisha ifyo ukuibelengela mu Baibolo kwangafwile, na ine ndeba abo ndebilako imbila nsuma ukuibelengela mu Baibolo pa kuti baimwena ifyo isambilisha.