Balipaalilwe ‘mu Nshita Iyaweme na mu Nshita Iishaweme.’—2 Tim. 4:2.

KU KUPWA kwa ba 1990 no kuya ku ntanshi, Inte sha kwa Yehova mu Georgia balitemenwe ukumona uko impendwa ya bakasabankanya e lyo na balesambilila Baibolo yalekulilako. Mu 1998, abantu 32,409 nalimo no kucilapo e basangilwe ku Cibukisho ca mfwa ya kwa Kristu.

Na lyo line, bakasabankanya abengi, kumo fye na baeluda bali abapya mu fya kwa Lesa kabili tabaishibe sana ifintu. Abengi balekabila ukusambilila ifya kubomba imilimo yalekanalekana mu cilonganino ca kwa Yehova. Nomba bali no kusambilila shani ifya kubomba iyi milimo?

Icilonganino ca kwa Yehova Calibafwile Sana

Mu March mu 1998, ba Arno na ba Sonja Tüngler, abafumine kwi Sukulu lya Gileadi ilyabelele ku Germany, balibatumine ukuya mu kubombela ku Georgia. Muli uyu wine mwaka, Ibumba Litungulula lyalisuminishe ukwisula iofeshi lya Nte sha kwa Yehova mu Georgia kabili umusambo wa ku Russia e waleyangalila ili iofeshi.

Komiti ya Calo yatendeke ukulayangalila umulimo wa kubila imbila nsuma. Ilyo umulimo tubomba walembeshiwe ku buteko, impapulo shatendeke ukufuma ku musambo wa ku Germany. Apo ubuteko bwalishibe umulimo twalebomba, bwalitusuminishe ukushita impanga apa kukuula Amayanda ya Bufumu no musambo.

Balitendeke Ukusambilila Ifya Kubomba Imilimo mu Cilonganino ca kwa Yehova

Bakasabankanya abengi tabalebila imbila nsuma ku ng’anda ne ng’anda ilyo ubuteko bwa Soviet Union bwabindile umulimo wesu pa myaka iingi. Ba Arno Tüngler batile: “Bakasabankanya abengi balebila imbila nsuma ku bantu mu misebo, lelo te bonse ababeleshe ukuya mu kubila imbila nsuma ku ng’anda ne ng’anda e lyo no kubwelela ku bantu abalefwaisha ukwishibilapo na fimbi.”

Ba Davit Devidze abatendeke ukubombela pe ofeshi lya Nte sha kwa Yehova ilyo baiswile mu May mu 1999, batile: “Twalikwete umulimo uukalamba uwa kubomba mwi bala e lyo na pa Bethel. Kwali fimo ifyo twabelengelepo pa milimo imo lelo tatwaishibe ifya kuibomba. Kanshi twalemona no kusambilila kuli bamunyina abo Ibumba Litungulula lyatumine.”

Bamunyina abengi mu Georgia balitendeke ukusambilila ifya kubomba imilimo. Bonse fye balinonkelemo mu fyo balesambilila. (Amapi. 27:17) Bamunyinefwe abaile mu kusambilisha bamunyina ku Georgia nabo balisambilile ifingi ku babwananyina abo basangile.

Ba Nte aba ku Georgia Balelanga Imibele Iisuma

Ba Arno na ba Sonja balebukisha ifingi pa fyo babapokelele bwino sana ilyo baile ku Georgia. Bamunyina na bankashi balibafwile sana pa kuti babeleshe imikalile yali uko balebombela.

Ba Sonja balebukisha ifyo aba bwananyina bali ne cileela. Batile: “Ulupwa ulo twapalamene nalo lwaletuletela ifya kulya ifisuma sana. Nkashi umo alitusendele mu mulimo wa kubila imbila nsuma, alitwishibishe na ku cilonganino twali no kulalonganamo kabili alitwebeleko ne fintu ifingi pa ntambi sha bena Georgia. Nkashi na umbi alitutekanishishe ilyo aletusambilisha iciGeorgian.”

Ba Warren na ba Leslie Shewfelt, abafumine ku Canada mu 1999 no kuya mu kubombela ku Georgia batile: “Twalitemenwe sana pa kumona ifyo bamunyina na bankashi ku Georgia batutemenwe. Bonse, kumo fye na bacaice balelanga ifyo batemwana ne fyo baikatana.”

Abalefuma ku fyalo fimbi ukuya mu kubombela ku Georgia, tabalebika amano ku mafya balekwata lelo balebika amano ku mibele iisuma iya abantu abo basangile. Kanshi ukuicefya no kutemwa uko bamishonari balelanga ku babwananyina mu Georgia kwalengele babatemwe sana.

Abantu Abatemenwe Ifya kwa Lesa Balitendeke Ukusambilila Icine

Mu myaka fye yonse iya ba 1990, abantu abengi abalefwaisha ukwishiba icine balitwalilile ukusambilila icine. Mu mwaka fye wa 1998, abantu 1,724 balibatishiwe. Cinshi calengele abena Georgia abengi bafwaishe ukusambilila icine?

Ba Tamazi Biblaia ababombele mu muputule pa myaka iingi, batile: “Ukutemwa Lesa kwali pa ntambi isho abantu balekonka. Kanshi nga tulebashimikila, baleitemenwa fye abene ukukutika.”

Ba Davit Samkharadze, bakafundisha ba Isukulu lya Bakabila ba Mbila Nsuma ya Bufumu, batile: “Ilyo umuntu atendeka ukusambilila Baibolo, balupwa na bena mupalamano balamukaanya. Nomba ilyo balekaanya umusambi ukusambilila Baibolo, e batendekelamo ukusambilila!”

Abengi balitendeke ukwalula ubumi bwabo ilyo baumfwile imbila nsuma iya Bufumu. Mu April mu 1999, impendwa ya basangilwe ku Cibukisho yalikulileko ukufika kuli 36,669.

‘Kwali Abengi Abalekaanya’

Ilyo umutumwa Paulo alelanda pa mulimo alebomba mu Efese, alembele ukuti: “Pantu ninkwata ishuko ilikalamba ilya kuti mombeshe, lelo kuli abengi abalekaanya.” (1 Kor. 16:9) Amashiwi Paulo alandile eyo twingabomfya pa kulondolola ifyacitikile bamunyina mu Georgia ilyo papitile fye imyeshi iinono ukutula apo bakwatile Icibukisho mu 1999.

Muli uyu mwaka mu August, ibumba lya bafumine mwi Calici ca Orthodox, abaletungululwa na Vasili Mkalavishvili shimapepo uo batamfishe balikumene mu Tbilisi kabili balyocele impapulo shesu pa cintubwingi. Kabili ici calengele bamunyinefwe balebacusha pa myaka 4.

Pa 17 October mu 1999, abamapepo abali fye abanono balilonganike abantu abali nalimo 200 kabili balilepumfyanya bamunyina abalelongana mu Cilonganino ca Gldani mu Tbilisi. Balyumine no kucena bamunyina ku mapulanga no tushimbi uto bakwete kabili ici calengele ba Nte abengi ukuba mu cipatala.

Ku ca bulanda, abacitile ifi tababekete kabili balitwalilile ukuuma ba Nte no ku bacena. Aba mu buteko abengi, kumo fye na Kateka Shevardnadze alikalipe pa kumona ifyo balecusha ba Nte, lelo tabacitilepo nangu cimo. Na kuba, bakapokola balefika ninshi na balecusha ba Nte nabaya kale.

Tapapitile ne nshita iikalamba, aba mu ng’anda ya mafunde iya buteko bwa Georgia ba Guram Sharadze, balengele abantu ukutendeka ukusabankanya ilyashi lya bufi pali ba Nte. Balandile ukuti ba Nte bantu ababi sana. Camoneke kwati ‘inshita yaweme’ iya kubilamo imbila nsuma yalipita kale.

Icilonganino ca kwa Yehova Calyafwile ba Nte abo Balecusha

Icilonganino ca kwa Yehova calyangufyenye ukwafwa ba Nte abo balecusha mu Georgia. Bamunyinefwe balibebele ifya kucita nga ca kuti batendeka ukubacusha. Kabili balibebele no mulandu Abena Kristu ba cine pa nshita shimo bafwile ukushipikishisha ilyo balebacusha.—2 Tim. 3:12.

Na kabili, icilonganino ca kwa Yehova calitwele ne milandu ku cilye pa kucingilila bamunyinefwe. Munyina uwabombelepo muli Dipartimenti Ilolekesha pa Milandu pa Bethel ya ku Georgia atile: “Pa myaka 4, twalitwele imilandu 800 ku cilye na ku tubungwe tulandilako abantu pa nsambu shabo pali filya ibumba lya ba Vasili Mkalavishvili lyaletucusha.” Twalelomba aba mu buteko na ba mu tubungwe tulandilako abantu pa nsambu shabo ukuti batwafwe. Aba pa maofeshi yakalamba aya Nte sha kwa Yehova balipekenye kampeni ya kwishibisha abekala calo pa fyo balecusha ba Nte mu Georgia, lelo ici tacalengele ukuti baleke ukucusha ba Nte.”a