Abena Kurd Balisambilila Icine

BA GULIZAR batile: “Ilingi line ndapepa kuli Yehova no kumweba ifyo ntasha ukuti nalisambilile pali ena mu lulimi lwandi.”

Ba Gulizar balilongene ne Nte sha kwa Yehova pa myaka 8, lelo baishilebatishiwa fye ilyo batendeke ukulongana mu lulimi lwabo ulwa ciKurdish. Baba pa bena Kurd abengi abasambilila icine mu Georgia mu myaka ya nomba line. Nomba bushe abena Kurd ni bani?

Abena Kurd balikala ku fyalo fya ku Middle East pa myaka iingi. Abasambilila abengi batila abena Kurd bafuma ku bena Madai ba kale abo Baibolo yalandapo. (2 Isha. 18:11; Imil. 2:9) Ululimi lwabo balupendela pa ndimi ishilanda abena Iran.

Muno nshiku, abena Kurd abengi bekala mu fyalo ifyalekanalekana pamo nga Armenia, Iran, Iraq, Syria, na Turkey. Mu Georgia mwaba abena Kurd nalimo 20,000. Abena Kurd balatiina Lesa kabili balicindika sana ifya kwa Lesa.

Mu Georgia nomba mwaba bakasabankanya abena Kurd 500 ne filonganino fya ciKurdish fitatu. Mu 2014, balikwete ukulongana kwa citungu ukwa kubalilapo mu ciKurdish ukwabelele mu Tbilisi kabili pa basangilwe kuli uku kulongana pali na bafumine ku Armenia, ku Germany, ku Turkey, na ku Ukraine.