Nani Uukapususha Isonde?

Abantu abengi balasakamana sana nga bamona ifyo abantu baleonaula isonde e lyo ne fya mweo ifyabapo. Abantu bamo abasambilila sana pa fye sonde balanda ukuti abantu pali ino nshita balyonaula ifintu ifingi e lyo ne misango ya fya mweo ifyalekanalekana kabili ici calilenga imisango imo iya fya mweo ifyaliko ukukanabako.

Bushe abantu bakatwalilila ukonaula isonde? Nelyo bakaluka no kutendeka ukucita ifintu ifishingonaula isonde?

Bushe abantu bali no kukumanisha ukucingilila isonde?

Abengi abasambilila pa fye sonde balishininkisha ukuti abantu kuti bacingilila isonde ne fya mweo ifyabamo. Abafwailikisha bena batila pa kuti abantu bakumanishe ukucingilila isonde, balingile ukwalula ifintu fingi pa nshita imo ine. Fimo ifyo balingile ukwalula ni fi:

• Bafwile ukwaluka mu fyo basunga impanga, umushitu, inyika, e lyo na fibemba.

• Ukulabomfya inshila shimbi isha kuliminamo e lyo ne sha kupangilamo amalaiti.

• Ukwalula inshila bapangilamo ifya kulya pa kuti belalya sana inama e lyo ne sabi, lelo balelya sana ifilimwa. Ici kuti calenga belaonaula sana ifya kulya.

• Ukwiluka ukuti ukuba no bumi ubusuma, tacipilibula ukuti tulingile ukukwata ifipe ifingi sana.

Muletipo shani? Bushe kuti caba fye bwino ukwenekela ukuti amabuteko, abamakwebo, e lyo na bantu bali no kubombela pamo no kwalula ifi twalandapo fyonse? Nelyo muletontonkanya ukuti ifi te kuti fibombe pantu abantu bamo baliili, ni bakaitemwe kabili tabasakamana pa fili no kucitika ku ntanshi?—2 Timote 3:1-5.

Icingalenga twacetekela ukuti ifintu fikaaluka

Mu Baibolo tusambililamo ukuti isonde talyakonaulwe. Ilalondolola ukuti abantu fye beka te kuti bacingilila isonde, kabili ilalondolola ne filingile ukwaluka pa kuti isonde likonaika. Na kabili ilatweba ne fikacita pa kuti kukabe uku kwaluka.

Umulandu abantu abene beka bashingacingilila isonde. Ilyo Yehovaa apangile isonde apeele abantu umulimo wa kulisakamana. (Ukutendeka 1:28; 2:15) Bali fye no kubomba bwino nga balekele Yehova alebatungulula e lyo no kulakonka fyonse ifyo alebeba. (Amapinda 20:24) Lelo abantu balipondokele Yehova kabili balefwaya baleisalila ifyakucita. (Lukala Milandu 7:29) Abantu tabakwata amaka ya kusakamana isonde, kabili nangu ca kuti balacitako fimo te kuti bakumanishe ukucingilila isonde.—Amapinda 21:30; Yeremia 10:23.

Ifilingile ukwaluka. Lesa alafwaya ukulesha abantu ukonaula isonde. (Ukusokolola 11:18) Takawamye fye amabuteko e lyo na bantu abaleonaula isonde, lelo akabonaula. (Ukusokolola 21:1) E calengele Yehova alande ukuti: “Moneni! Ndelenga ifintu fyonse ukuba ifipya.”—Ukusokolola 21:5.

Ifikacitika pa kuti kukabe ukwaluka. Yehova ali no kufumyapo amabuteko ya bantu no kupyanikapo ubuteko bwa ku muulu ubo beta ukuti Ubufumu bwa kwa Lesa. Lyena ubu buteko ukulatungululwa na Yesu Kristu bukalateka isonde lyonse.—Daniele 2:44; Mateo 6:10.

Ubufumu bwa kwa Lesa buli no kusambilisha abantu amafunde ya kwa Lesa. Kabili abantu nga basalapo ukulatungululwa na Kabumba wabo, bali no kuleka ukonaula isonde ne fya mweo ifyabapo. (Esaya 11:9) Baibolo ilondolola Ubufumu bwa kwa Lesa ukuti bukalenga abo bukalateka ukulaikala bwino, kabili bukasungilila ne fya mweo ifyaba pano isonde. Ifi e fyo bukacita:

• Buli no kulapeela ifya kulya abantu bonse.—Amalumbo 72:16.

• Buli no kuwamya isonde no kubwesha fyonse ifyo baonaula.—Esaya 35:1, 2, 6, 7.

• Bukalenga abantu bakalesunga bwino inama kabili inama tashakalesansa abantu.—Esaya 11:6-8; Hosea 2:18.

• Buli no kulenga kwilaba amasanso ayakalamba.—Marko 4:37-41.

Mufwile ukucetekela ukuti Ubufumu bwa kwa Lesa buli no kucita ifi fyonse. Nga mulefwaya ukwishibilapo na fimbi, belengeni icipande citila “Ni Lilali Ubufumu bwa kwa Lesa Bukatendeka Ukuteka Isonde?”