FARKARKOR 6
Snonkaku Ḇemar sya Rosai Saneraro faro Si?
1. Saneraro ḇepyum rosai faro snonkaku ḇemar sya?
Rofyor Yesus ifarmyan ro supswan, bati ḇyedi Lazarus imar. Yesus ryama ḇe Lazarus rum ḇyeja mboi, imar ro ras rifyak kwar. Yesus rya fa myam Lazarus kubir ḇyeja kukro Marta ma Maria, Lazarus srar ḇyesu. Fioro ḇa ramnai, kawasa sya srama sfanjur. Rarirya Wawasen kada rariso Marta ma Maria suraryaḇ kaku rofyor Yesus ḇyawes kaḇer Lazarus i?—Wasya Yohanes 11:21-24, 38-44.
Marta ifawi kwar saneraro ḇepyum isya, snar nari Yahwe ḇyawes kaḇer snonkaku ḇemar sya fa sikenem wer ro supswan.—Wasya Ayub 14:14, 15.
2. Rariso snonkaku ḇemar sya sḇerari ya?
Allah ikofen ḇe Adam i, ”Snar saprop dis au inja nari kwaḇer ḇe saprop.”—KEJADIAN 3:19.
Snonkaku sya sḇeḇefrur ro saprop. (1 Korintus 15:47) Snonkaku koine kona rur ḇeyores ḇese bur ro baken ḇa. Inja rofyor komar, ḇar oso ro baken koḇedi ikenem pdef ḇa. Koswarepen werḇa snar akuk koḇena namar kwar. Iryanja, Lazarus fyawar ḇa rosai ismai rofyor imar ya, snar snonkaku ḇemar sya sifawi roi oḇaḇeri.—Wasya Mazmur 146:4; Pengkhotbah 9:5, 6, 10.
Rofyor snonkaku oso imar ido Allah ryap i ro for ke? Refo ikofenḇadir snar snonkaku ḇemar kwar sya sifawi roi oḇaḇeri. Inja, farkarkor for ḇembrer ḇa ima farkarkor ḇekaku ḇa ma ḇeyonef Allah I. Ḇesewer ido, snonkaku srap si ro for ima roi Allah dayin kaku na, ma ine nasya ro karkara Ḇyena ḇa.—Wasya Yeremia 7:31.
Mam vidio Snonkaku Ḇemar Sya Moḇsa Sḇerai?
3. Na snonkaku ḇemar sya sawos kuk’r ko ke?
Snonkaku bemar sya sawos ḇa ḇaido srower ḇa. (Mazmur 115:17) Ḇape, malaikat ḇeḇarḇor sya sisya. Siso sawos fadadwer imnis snonkaku ḇemar kwar sya. (2 Petrus 2:4) Yahwe imewer kaku kawawos kuker snonkaku ḇemar sya.—Wasya Ulangan 18:10, 11.
4. Nari manseiso ḇekenem kaḇer?
Snonkaku ḇeḇor ḇemar kwar sya nari sikenem kaḇer ro supswan. Snonkaku ḇefrur roi ḇeḇarḇor snar smambir Allah I ḇaim kako nari sikḇawes.—Wasya Lukas 23:43; Farfyar Ro Manwawansya 24:15.
nonkaku ḇeḇawes kwar sya nari sismai swaf ḇepyum fa sifarkor napnapes kuker Allah, sikyar ma sisouser Yesus i. (Fasasna Faro Yohanes 20:11-13) Inja, snonkaku ḇeḇawes kwar ma ḇemarisen ḇefrur roi ḇeḇye nari sikenem fioro-fioro ro supswan.—Wasya Yohanes 5:28, 29.
5. Rosai kofarkor kuker Yahwe ro aḇiḇer ya?
Snonkaku bemar sya sismai saneraro fa sikenem kaḇer wer snar Allah iwan kwar Yesus i fa imar warek ko. Inja, kuker aḇiḇer ya ine fyasnai syowi ma saswar Yahwe ḇyena faro ko. Ro fafisu snonkaku ḇemar sya sikḇawes, na manseiso Wamarisen Wasrow ḇepon ya?—Wasya Yohanes 3:16; Roma 6:23.