Ayub Ima Manseiri?

Ro sup Uz, snon oso isya isyom faro Yahwe I. Snoriso Ayub. Nya arasai nabor ma roma inai ḇyesi kako sibore. Ima ifrur pyum ma imarisen ifnoḇek snonkaku ḇena roi noḇa, kabom sya, ma awak param sya. Mboi, na kokara ima ifrur pyum rya na daksmai samswen oḇa ke?

Setan myamepen Ayub i, mboi Ayub ifawi roi ine ḇa. Yahwe ifuken faro Setan i ḇo doḇe, ’Mam manfamyan Ayedi Ayub i ke? Snonkaku ḇero supswan ine sikam simnis i ḇa. Ryower Aya ma ifrur roi ḇekaku.’ Setan kyarem, ’Imbo na isouser ḇe Au ḇae. Kwadaunwarek i ma bebarakas i ndari. Buk saprop ma rofanfan sya ḇe i. Mboi, wun roi ismai anna kam bur i pan, na imewer isyom faro Au wer.’ Yahwe doḇe, ’Wafrowespan Ayub i mura. Mboi mun awer i.’ Rosai ḇefnai fa Yahwe ḇyuk swaf fa Setan ifrowespan Ayub i? Kukro Yahwe ikyar kaku nari Ayub isouser pdef.

Setan ḇyuk kandera ḇeḇeso fa ḇyukifrowespan Ayub i. Randak ya, ifrur fa snonkaku Syeba sya skarawpres Ayub sapi ma keledai ḇyesi kam. Mura, for ya ryaḇpres Ayub domba ḇyesi kam. Ramnai, snonkaku Khaldea skaraw unta-unta ḇyesi. Ḇemamwarek rofanfan ḇyesi smun si. Ḇeḇyeḇa syadi wer iso, roma inai ḇyesi simar kam kukro rum moḇ sifrur munara ya isapi fa imerepen si. Ayub ḇyesneso fafayaḇa, mboi isouser pdef faro Yahwe I.

Setan imarisen fa Ayub ḇyekandera syadi. Inja, ifrur fa Ayub baken ḇyena nafo kuker mui. Ayub isyur fafayaḇa. Iḇor rosai ḇefnai fa roi ḇeḇesya nane nkur i. Mboi, Ayub isouser pdef faro Yahwe I. Iso eḇedari Allah imarisen kaku faro Ayub i.

Mura, Setan iwan snon rikyor fa skora skofrowes Ayub i. Soḇe, ’Aune wafrur sasar kwar ma swewar nyan fa wakram fasis na. Inja, Allah ḇyuk samamyai ḇe au.’ Ayub doḇe, ’Yafrur sasar oḇa.’ Mboi, muniwara Ayub kyara Yahwe iso ḇefnai kandera ḇekur i na. Ayub ikofen ḇo doḇe Allah ifrur pyum i ḇa.

Snonkbor oso ḇenir ḇe Elihu, dakrower awawos sena. Mura ikofen ḇo doḇe, ’Mkokam mkosasar. Yahwe ima fyawi syadi ro rosai kokara na. Ifrur roi ḇeḇyeḇa na ḇaḇeri. Myam roi nakam ma isaramper snonkaku ḇesmai samswen sya ḇesya kwar.’

Mura, Yahwe dawos yoḇ Ayub i, ’Moḇ risai rworoya rofyor yafrur farsyos ma supswan ine? Rosai ḇefnai fa woḇe yafrur pyum au ḇa? Wawos monda ḇo roi ḇebor naisya wafawi ḇaim na.’ Ayub kyarem sasar ḇyena ḇo doḇe, ’Yawos sasar kwar. Ḇepon ya, yarower kakaku ḇekur Au kwar, mboi kirine insape yafawi kaku manseiso Au. Swambraḇ fa wafrur roi ḇebor kam. Wamsor awer.’

Fafisu fafrowes na nande kwar mura, Yahwe ifrur fa Ayub iprei ma ḇyuk ḇe i arasai nabor syadi ro randak ya. Ayub ikenem kawan ma ismai payamyum. Yahwe ḇyebarakas Ayub i kukro ismai samsweno isouser pdef. Inja rosai monda ḇekur Au, na wamarisen waksouser faro Yahwe I raris Ayub i ke?