Sifrur Raris Asas Sena Ḇa

Yahwe ikofen yoḇ Moses i, ’Wek muma ḇe bon ine ma wasrow Aya. Nari yafasḇair sasoser Ayena ro karuifas ma yaḇuk na ḇe au.’ Inja, Moses dek muryas ḇe bon ani ma ḇyarek ro diwa swaf ras ri 40 ma roḇ ri 40. Yahwe fyas sasoser Ḇyena ro karuifas risuru ma ḇyuk na ḇe Moses i. Sap Sasoser anya ḇe Parenta Risamfur.

Rasras na nande mura, snonkaku Israel sya soḇerada Moses ibur si kwar. Inja, sikofen ḇe Harun i ḇo soḇe, ’Nkomarisen oso fyarkin inko. Wafrur allah oso ḇe nko!’ Harun doḇe, ’Mkoḇuk brawen mkoḇena muma.’ Mura, Harun iryur na fa ḇyukifrur amfyanir ḇesnai ḇe sapi mkun oso. Kawasa ansi soḇe, ’Amfyanir ine iso Allah koḇedi, iso ḇeyun ko fa kosasyarbur sup Masir!’ Sisyom faro amfyanir ani ḇeri ma sifrur munara. Roi nane nsasar ke? Imboḇae. Sikofen kwar fa sisyom Yahwe I monda ḇesyaḇo kirinema sifrur raris asas sena ḇa.

Yahwe myam roi anya ma ikofen yoḇ Moses i, ’Wado fa mam kawasa ansi. Sisouser Aya ḇa ḇo sisyom amfyanir.’ Moses dun karuifas risuru ansuya ma dado ro bon ani rarbaḇ myam si.

Rofyor Moses isya fyanam ro moḇ sḇarek ro na, ryower mboi kawasa ansi sidisen. Mura, myam mboi sifyer ma sbansuba faro sapi brawen mkun anya. Moses imsor fafayaḇa. Imerdawdiwer karuifas risuru ansuya ḇe saprop rawo suḇe mom-mom. Kyakok amfyanir ani ḇeri. Ramnai ifuken faro Harun i, ’Sai ḇefnai au fa wamarisen rwower kawasa ansine ḇo wafrur roi ḇeḇyeḇa ineni?’ Harun doḇe, ’Wamsor awer. Wakfawi kawasa ansine kenem sena ḇae. Simarisen sna allah, inja yasawen brawen sena ro for yadori ma sapi mkun ani isasyar!’ Ipyum ya, Harun iso marisen sena awer kada. Moses dek kaḇer ḇe bon ani ma dor kaku fa Yahwe ḇyuk ampun faro kawasa ansi.

Yahwe imarisen ḇyuk ampun faro snonkaku ḇesouser faro I sya. Inja, wakfawi roi ḇefnai fandun kaku fa snonkaku Israel sya sisouser faro Moses i ḇe manfarkin sedi ke?