Yonatan Ima Imkak Ḇa ma Isoasuser

Raja Saul romawa rak ḇyedi, Yonatan, iso mambri oso. Daud ikofen Yonatan ima iruren syadi ro mansapur ma syambraḇ syadi ro singa. Ras oso Yonatan myam sordade Filistin ri 20 sro bon oso boya. Ikofen ḇe ḇeyuf romamun ḇyedi ḇo doḇe, ’Yahwe ḇyuk aḇyair ḇe ku ido, insape kura kumun si. Rofyor snonkaku Filistin sor fa kuyek ido, iso swaf fa kumun si.’ Mura sordade Filistin sar naba, ’Muyek mura ḇo komamunmun!’ Inja suyek ḇe bon ani ma sufrur kafyo sordade ansi.

Snar Yonatan iso Saul romawa rak ḇyedi, kakuya iso nari ḇyeraja fadwer kmari. Ḇape Yonatan ifawi Yahwe kyinfir Daud i kwar fa ḇye raja Israel ḇeuser ya. Rarirya ido, Yonatan fyafayaf i ḇa. Yonatan ma Daud suḇebati ḇefanam kaku. Suḇeasas fa sumamwarekyae su ma sufnoḇekyae su. Yonatan ḇyuk syatu ḇekwan, sumber ḇesar, saren, ma ḇeḇoḇek ḇyedi faro Daud i fa neḇeḇair ḇaḇebati suḇena.

Fafisu Daud ifrarbur Saul, Yonatan isrow i ma ikofen ḇo doḇo, ’Fandun fa swambraḇ ma ḇebri. Yahwe kyinfir au kwar fa ḇe raja. Kamami dakfawi kako roi ine.’ Wamarisen nwa bati ḇepyum raris Yonatan i ke?

Yonatan ismai roi ḇemun nabor mboi ifnoḇek ker bati ḇyedine. Ifawi Raja Saul imbe myun Daud i. Inja, ikofen ḇe kmari, ’Daud nya sasar oḇa. Kamame mun i ido, na wafrur sasar.’ Saul imsor fafayaḇa Yonatan i. Taun riḇeḇeso nenande mura, Saul ma Yonatan sumarkam ro mamamun ya.

Yonatan imar mura, Daud syewar romawa ḇyedi, Mefibosyet. Fafisu Daud isrow i, ikofen ḇe Mefibosyet, ’Kmami ima bati ḇepyum yediri, inja nari yamam faduru au ro ras kankenem bedi ḇesiper. Na ḇarek ro istana yedi ma wanan ro meja yedi.’ Daud ḇyefnder ḇaḇeri bati ḇyedi Yonatan i.