Yosia Imarisen faro Allah Sasoser Ḇyena

Yosia ḇyeraja ro Yehuda fyor ḇyeumur taun ri 8. Ro fafisu ani, kawasa sya simarisen suf robor ma sisyom amfyanir. Rofyor Yosia ḇyeumur taun ri 16, syewar fa ifawi kaku ḇaḇesamsyom ḇemnis rariso Yahwe imarisen na. Fafisu ḇyeumur taun ri 20, Yosia kyakok amfyanir ma moḇ sḇukifarser ḇero Karajan Yehuda ḇesiper. Ma fafisu ḇyeumur taun ri 26, fyasos insama sifrur mnis kaḇer Yahwe bait Ḇyedi.

Ro bait, Imam Ḇeba Hilkia isrow syap ḇeniw ḇeser Yahwe Sasoser Ḇyedi, imbude ḇefas ya iso Moses mankundi. Mura, raja manfasfas ḇyedi, Syafan, dun syap ḇeniw ani ḇe Yosia ma iwasyana beri. Rofyor Yosia ryowerna, ifawi beri snar ro swaf taun ḇe taun kwar snonkaku Yehuda sisouser faro Yahwe I ḇa. Raja Yosia ikofen ḇe Hilkia, ’Yahwe imsor kaku faro ko. Wafuken faro I rosai fandun fa kofrur ya. Nari ikofenḇair ḇe ko.’ Yahwe ḇyuk kankarem roro Hulda, bin ḇefarmyan ḇe nabi, ḇo doḇo, ’Snonkaku Yehuda sisouser faro Aya ḇa. Nari sismai samamyai, ḇape ro fafisu Yosia ḇyepoik kaker ḇe raja ḇa. Naiso snar Yosia irun mankundi kwar,’ kyurfasnai imarisen ifrur fararwei imnis sasoser ani.

Fafisu Raja Yosia ryower wos nane, rya ḇe bait ma iwan kawasa Yehuda sya fa sfanjur. Mura, iwasya naba Yahwe Sasoser Ḇyena ḇe er ansikam. Yosia ma kawasa ansya sḇeasas fa sisouser Yahwe kuker sne ḇesiper.

Fafisu swaf taun ḇe taun kwar snonkaku Yehuda sifrur ras Paskah ya werḇa. Ḇape, rofyor Yosia iwasya Sasoser Moses ani, ifawi fandun fa sifrur ras Paskah ro taun nakam. Inja ikofen ḇe kawasa sya, ’Nari kofrur ras Paskah faro Yahwe.’ Ramnai Yosia fyasos aiwan sibor fa sḇefarsarser ma fyasos insama ḇedisen ro bait sya sisya. Mura, snonkaku Yehuda sya sakfrur ras Paskah, raposa sifrur Munara Mamami Ḇepisen Ḇa ro swaf ras rifik. Ro Samuel fafisu ḇyedi sifrur ras Paskah ḇeradine ḇa. Yosia imarisen kaku faro Allah Sasoser Ḇyena. Au kako, wamarisen wakfarkor fa wakfawi Yahwe I ke?