Fasfas ro Ander

Fafisu ya, Belsyazar ḇye raja ro Babilon. Roḇ oso, ifrur munara ḇeba ma dor snonkaku ri 1.000 ḇena nasan sya. Iwan manfamyan ḇyesya fa sisasyar sek aninem brawen kmari Nebukhadnezar ifansyar ro Yahwe bait ḇyedi. Belsyazar ma ḇerama sya sinem anggur kuker sek aninem anna ḇo sisandik allah-allah sena. Skokandor monda ḇo bramin snonkaku isya fyasepen wos ḇeser kankunes ro ander ḇero sim sinan ro ya.

Belsyazar imkak kaku. Dor snonkaku ḇeyuf robor sya ma ikofen yoḇ si, ’Ono rofandu mko ḇefawi ḇefasnai knam ro fasfas anine ido, na yaḇe i fa ḇye manḇepoik ḇeḇekyor ro Babilon.’ Sḇesewar kaku kwar mboi jadi fa sifasnaḇair knam ro fasfas annane ḇa. Ramnai Ratu ryama ma ikofen, ’Randak iwara snon ḇenir ḇe Daniel iso ḇefasnaḇair ḇe Nebukhadnezar knam ro mafafu ḇyena. Na dakfawi fyasnaḇair fasfas anine ḇe Tuan au.’

Daniel ryama fa isrow Raja. Mura Belsyazar ikofen ḇe i, ’Wafawi wawasya ma wafasnaḇair fasfas anine ido, nari yaḇuk irai brawen ḇe au, ma nari wakḇe manḇepoik ḇeḇekyor ro Babilon.’ Daniel kyarem, ’Yamewer hadiah buk anna, ḇape nari yakofenḇair knam ro fasfas anine. Kmami, Nebukhadnezar ima darareri, ma Yahwe ryun i. Mankundaw wafawi kwar rosai ḇekur i na. Ḇape wakḇesyowi Yahwe I ḇa. Buk sek aninem brawen ro Yahwe bait ḇyedi fa ḇukser anggur. Inja Allah fyas wos nane: Mene, Mene, Tekel, ma Parsin. Wos anane nkurfasnai karajan Media ma Persia iso nari ḇekafyo Babilon, ma nari Tuan ḇe raja werḇa.’

Fafisu ani, rya Karajan oso ḇa ḇepok fa ḇekafyo Babilon. Mnu ani ḇyeḇedwarek kuker ayar karui ḇeba ma warḇeki ḇedo kaku. Ḇape, ro rob ani kako, snonkaku Media ma Persia srama siyarwarek mnu ani. Kores raja Persia ifrur warḇeki ani idaf ḇe moḇ ḇese, inja sordade ḇyesya simbranuk warya ma sra ḇe kerwa ḇeba mnu ani. Rofyor sisya ro dia, kerwa na nḇase! Sordade ansi sisun, sikafyo mnu ani, ma smun Raja Belsyazar fa imar. Mura, Kores ḇye manḇepoik ro Babilon.

Taun oser mura, Kores ikofenḇair, ’Yahwe iwan aya fa yaḇawes kaḇer bait Ḇyeja ro Yerusalem. Snonkaku ḇemarisen ḇefnoḇek sya mkora mura ḇediwa.’ Inja swaf taun ri 70 rofyor Yerusalem ḇyeḇekakok raposa, snonkaku Yahudi ḇebor sya sibur ḇe diwa. Ine imnis Yahwe asas Ḇyena faro si. Kores ḇyuk kaḇer sek aninem brawen ma sarak, ma kako roiḇebor Nebukhadnezar dun ro bait na. Wafawi kaku ke, Yahwe iso ḇeḇe Kores i fa ifnoḇek kawasa ḇyesya?