Fafisu Yesus Ibaḇa ya

Yusuf ma Maria suḇarek ro Nazaret fnoḇek Yesus ma romawa ḇese suḇesya. Yusuf ifararur ḇe sukan ai insama myam fandandun ro kina ḇyedi. Fyarkor kina ḇyesya kako insama sakfawi Yahwe I ma parenta Ḇyena. Skomyaren skoḇeari kaku, ma ro taun ḇe taun skora ḇe Yerusalem fa skoso ras Paskah.

Fafisu Yesus ḇyeumur 12, snari ma kmari fnoḇek ḇedar ḇyesya skora ḇe Yerusalem raris skofrur ro taun ḇe taun kwar. Mnu ḇeba ani ifo kaku snonkaku sya snar srama fa sakso ras Paskah. Ras Paskah ani raposa, Yusuf ma Maria skobur. Skokara Yesus isya dakso ro maran skoḇeja. Ḇape skosewar ido, isya rodia ḇa.

Mura skokaḇer ḇe Yerusalem, ma skosewar i swaf ras rikyor. Fyor skora ḇe rum Allah Ḇyedi ido, skomam Yesus isya kyain ro fandu guru-guru agama Yahudi sya ma dawawos kuker si. Ryower pyum kaku si ma ḇyuk fakfuken nabore. Guru-guru ansi skandor kaku wos ḇyena ma sakḇuk fakfuken ḇe i. Fafisu srower kankarem Yesus ḇyena, smanen kaku i snaro ifawi pyum Yahwe Sasoser Ḇyena.

Yusuf ma Maria sumkakwarek faro Yesus i, inja Maria ikofen, ’Yesus e, nusewar au ro moḇ nakame. Moḇsa rwo i?’ Yesus kyarem ḇo doḇo, ’Awin ma kamame, na mufawi kwar ḇae ayaisya ro Mami rum Ḇyedi?’

Ramnai, Yesus iso sinan ḇyesuya ma skoḇur ḇe Nazaret. Yusuf fyarkor Yesus i ḇe sukan ai. Moḇsa kwara rai, fafisu Yesus ibaḇa ya, moḇsa ikenem rai? Yesus imak ma iba fasaw kaku. Fawawi nanem ḇyena nabor syadi wer, inja Allah ma snonkaku sya simarisen kaku i.