Yesus Ḇye Mesias

Yohanes ḇyaryas pdef roi ine: ’Snonkaku ḇeba syadi ro ayanya nari ryama.’ Fafisu Yesus ḇyeumur 30, ryama ro Galilea ḇe Warḇeki Yordan, moḇ Yohanes ḇyebaptis snonkaku sya. Yesus dor fa Yohanes ḇyebaptis i, ḇape Yohanes ikofen, ’Na yaḇebaptis Au ḇa, auso ḇebaptis aya.’ Yesus ikofen, ’Yahwe imarisen Auso ḇebaptis aya.’ Inja susun ḇe war ani ma Yohanes pyanduwek Yesus baken ḇyedi ḇesiper ḇe war ya dori.

Fafisu syae ro war ani, ḇyenadi. Fafisu anya ḇeri, mandep ya byas, ma rur ḇesren imnis manjawa dado ro Yesus i. Ramnai Yahwe dawos ro nanki, ”Aukada Romawa Yaswar kaku, Yaḇeḇare faro Au.”

Fafisu rur ḇesren dado ro Yesus i, swaf anya ḇeri ḇye Kristus, ḇaido Mesias. Kirine nari ifrur fararur Yahwe ḇyuk ḇe i fyor ḇyeḇewan ḇe supswan anya.

Yesus ḇyebaptis ramnai, ryaḇe moḇ ḇeḇeursḇa ma ḇyarek ro diwa ras ri 40. Kirine kyaḇer ma isrow kuker Yohanes i. Fyor Yohanes myam Yesus imbran ḇe i, Yohanes ikofen, ’Ineiso Rumkun Domba Allah, nari ḇepyos sasar ro snonkaku sya.’ Ikofen rarirya snaro nari ikofenḇair ḇe snonkaku sya Yesus ima Mesias rirya. Wafawi rosai ḇeḇejadi ro fafisu Yesus ryo moḇ ḇeḇeursḇa ani? Rwama kowasya farfyar ḇeuser ya.