Yesus Ḇyaryas Ankankinem Ḇeḇye Karajan Allah

Fyor Yesus ḇyebaptis ramnai, ḇyaryas snar Karajan Allah fyanam kwar. Manfamyan ḇyesya siso i ḇe Galilea ma Yudea ḇesiper. Fafisu kyaḇer ḇe mnu ḇyedi Nazaret, ryaḇe rum ari ma ḇyas syap Yesaya. Ramnai iwasya, ’Yahwe ḇyuk rur ḇesren insa yaḇaryas ankankinem ḇeḇye ya.’ Rosai wos ine fyasnai ya? Snonkaku sya simarisen insama Yesus ifrur mujisat. Ḇape, mnuk ani fyasnai roi ḇefrur fa Yahwe ḇyuk rur ḇesren ḇe Yesus iso insama ḇyaryas ankankinem ḇeḇye ya. Ramnai ikofenḇair ḇe snonkaku ḇero diansya, ’Ras ine, mnuk ine ryariri.’

Ramnai Yesus ryaḇe Danosen Galilea. Rodia, isrow kuker mandaswan rifyak na ḇeḇemanfamyan ḇe i sya. Skoiso Petrus, Andreas, Yakobus, ma Yohanes. Dor si ma ikofen, ’Mkorama, mkoso aya ma nari yaḇe mko fa mkoḇe mandaswan snonkaku.’ Fafisuya ḇeri sibur fararur sedi ma siso Yesus i. Sraḇe Galilea ḇesiper fa sḇaryas Karajan Yahwe Ḇyedi. Sḇaryas ro rum ari, pasar, ma nyan na. Moḇ risai monda skora yoḇ na, snonkaku sibor siso sko. Farfyar ine srower i ro moḇ nakame, isof ro Siria kako.

Ramnai, Yesus ḇyuk papoik ḇe manfamyan ḇyesya fa siyaw rur ḇeḇyeḇa ma sḇuk pararei ḇe snonkaku sya. Eḇesesya siso i ḇe mnu-mnu fa sḇaryas ankankinem ḇeḇye. Bin ḇeḇeso ma ḇesesya raris Maria Magdalena, Yohana, ma Susana skofasos pyan rosai Yesus ma manfamyan ḇyesya sfandun na.

Yesus fyarkor manfamyan ḇyesine ramnai, iwan si fa sḇaryas ankankinem ḇeḇye. Sraḇe Galilea, ma rodiwa snonkaku sibor sḇemamfamyan ḇe Yesus i ma sebaptis. Snonkaku ḇemarisen ḇeso Yesus i sya sibor kaku, inja Yesus ikofen sima simnis yaf ḇedufen kwar. Ikofen, ’Mkor ḇe Yahwe insama fyarem ḇefararur sya fa sibor syadi wer.’ Ramnai, kyinfir manfamyan ri 70, irwas si fa sesuru-suru ma iwan si fa sḇaryas ankankinem ḇeḇye ro Yudea. Sfarkor Karajaan Allah ḇe snonkaku sai monda. Inja fafisu skaḇer, siryaḇ kaku ma sfawar rosai sifrur nane ḇe Yesus i. Setan jadi fa ifrur fararur ine fa imnai, na sḇaryas pdef ankankinem ḇeḇye ine.

Yesus imarisen insama ido fafisu kyaḇer ḇe nanki, manfamyan ḇyesi sifrur pdef fararur ine. Inja, ikofen ḇe si, ’Mkokofenḇair ankankinem ḇeḇye ine ḇe supswan ḇesiper. Mkofarkor Allah Wos Ḇyena ḇe snonkaku sya, ma mkoḇe baptis si.’