Sfor Yesus I

Yesus ma manfamyan ḇyesi simbranuk ro Wandow Kidron ḇe Bon Zaitun. Fafisu ani romfawru kwar, ma paik isnai. Rofyor skora ro Yaf Getsemani, Yesus ikofen ḇe si ḇo doḇo, ”Mkowaf rodine ma mkowaren pdef.” Ramnai Yesus imbran ḇinkwan mkun ro si ma kyain wepur. Ḇyesusa kaku. Inadi ḇe Yahwe I, ”Iḇye kada marisen Bedi ryadirya kada.” Ramnai, Yahwe iwan malaikat oso fa ḇyuk samambraḇ ḇe i. Fyor inadi ramnai, kyaḇer fa myam manfamyan ḇyesine mboi senef. Inja ikofen ḇe si, ’Mkokḇoke! Inema fafisu fa mkenef risyaḇa. Kirine, ḇemun ayansya nari srama fa smun aya.’

Fyoro ḇa, Yudas kuker kawasa ḇeso i ma prajurit sya kako srama kuker sun sumber ma ai mnuk ono. Yudas ifawi Yesus isya ro Yaf ani kukro skorama ker ro moḇ anya kwar. Fyor sra ḇaim, ikofenḇair ḇe prajurit ansine nari fyasnai Yesus i ḇe si. Inja Yudas fyanam Yesus i ḇeri ma ikofen, ’Ḇe Guru yo.’ Ramnai isyum Yesus i. Mura Yesus ikofen ḇe i, ’Yudas, inja boḇ aya kuker wasyum aya?’

Yesus imbran ḇe ḇarpon ma ifuken si, ”Mansei mkosewari?” Soḇe, ”Yesus snonkaku Nazaret ani.” Mura Yesus ikofen, ”Aya isoine.” Snonkaku ansi sisusu ḇeri ma sisapi. Yesus ifuken wer, ”Mansei mkosewari?” Skarem wer, ”Yesus snonkaku Nazaret ani.” Inja Yesus doḇe, ’Yakofen kwar aya isoine. Mkun aya monda mboi manfamyan yesine mkomam monda si.’

Fafisu Petrus myam sfor Yesus i, imsor kaku inja dun sumber oso fa ikwapuk Malkhus, manfamyan ro imam ḇeba oso kneram ḇyedi. Ḇape Yesus dun kneram ḇyanine ma pyom kaḇer i. Ramnai Yesus ikofen ḇe Petrus i, ’Wasawen sumber bedi. Snar mansei ḇemamun kuker sumber, nari dakmar kako kuker sumber.’ Rodia, prajurit ansine sfor Yesus i ma sfes bramin ḇyeja, ma manfamyan ḇyesi sibur ḇesisye. Snonkaku ansine sun Yesus i ḇe Imam Ḇeba oso ḇenir ḇe Hanas. Ifuken Yesus i ma iwan fa snonkaku sya suni ḇe Imam Ḇeba oso rum ḇyedi iso Kayafas i. Mboi rosai ḇeḇejadi kuker manfamyan ansine?