Yesus Imar ro Golgota

Mananir imam-imam sya sun Yesus i ḇe Gubernur rum ḇyeja. Pilatus ifuken ḇe si, ’Sasar rosai snon ine ifrur ya?’ Sikofen, ’Doḇe ima raja rirya!’ Rarirya Pilatus ifuken ḇe Yesus i, ”Au ryake [Raja] kawasa Yahudi?” Yesus kyarem, ”[Karajan] ayedi isya ro supswan ineḇa.”

Ramnai, Pilatus ikofen ḇe snonkaku sya fa sun Yesus i ḇe Herodes, ḇepoik ro Galilea. Pilatus imbe ifawi Herodes na isrow sasar ro Yesus i ke roḇa. Mboi, isrow sasar ro Yesus i ḇa, inja iwan fa sun kaḇer i ḇe Pilatus. Mura, Pilatus ikofen ḇe snonkaku ansi, ’Aya ma Herodes nusrow sasar kermkun ro snon ine ḇaḇeri. Inja nari yawan i fa ibur.’ Snonkaku ansya simsor ma siyuw, ’Mkomun i! Mkomun i fa imar!’ Prajurit ansine sipreri kuker kaḇrai, saninef i, ma smuni. Ramnai srir wower ḇeḇorek ro bruri ma skoryaye i, ’Be, Au so Raja kawasa Yahudi.’ Pilatus ikofen ḇe snonkaku ansine, ’Yasrow sasar oḇaḇeri ro snon anine.’ Ḇape siyuw wer, ”Ikada ḇyeḇepai ro [adir]!” Inja, Pilatus ryiri insama smuni fa imar.

Prajurit ansine sun Yesus i ḇe moḇ ḇenir ḇe Golgota. Spai i ro adir oso ma sikanow i fa dores. Fafisu ani Yesus inadi, ’Mami, buk maf ḇe si, snaro sifawi mnis sasar sifrur ya ḇa.’ Snonkaku ansi skoryaye Yesus i, ’Auma Allah rumkun Ḇyedi sau ido, wado ro adir ya pan! Ma faspar mankundau.’

Snon ḇeḇarḇor oso ḇero Yesus ris ḇyedi ikofen yoḇ i, ”Nari waswarepen aya, rofyor wafyafer imnis wairek.” Yesus ḇyeasas ḇe i, ”Nari awsya kuker aya ro Firdaus.” Ro arkok ani, sup ya pyampan swaf ya oras rikyor. Yesus manfamyan riḇeḇeso ḇyesi sores fanam i ro adir ani, oser ya iso snari Maria i. Yesus dor ḇe Yohanes insama myam faduru Maria imnis raris snari.

Raposa Yesus ikofen, ”Imnis kwar.” Ramnai Yesus imar. Fafisu yaḇeri saprop ani iwawa naba kaku. Ro Allah rum Ḇyedi, kruḇen ḇedwarek Sim Ḇesren ma Sim Ḇesren Syadi ya imsawek fa ḇyesuru. Prajurit oso ikofen, ’Kaku ḇeri ima Rumkun Allah dirya.’