Yesus Kyaḇer ḇe Nanki

Yesus isrow kuker manfamyan ḇyesya ro Galilea. Ḇyuk parenta ḇefandun kaku ine: ’Mkora ma mkofarkor snonkaku ro er nakam insama semanfamyan ḇe aya. Mkofarkor rosai yakofenḇair ḇe mko kwar na, ma mkoḇe baptis si.’ Ramnai ḇyeasas, ’Nari yarous mko ḇesya kwar.’

Ras ri 40 fyor ikenem kaḇer ya, isrow kuker manfamyan ḇeḇe utin ḇyesya ro Galilea ma Yerusalem. Fyarkor roi ḇefandun kaku ḇe si ma ifrur mujisat nabore. Ine iso ḇepupes faro Yesus i fa isrow kuker manfamyan ḇyesya ro Urek Zaitun.

Fyor skoro Yerusalem kaker, Yesus ikofen ḇe si, ’Mkosae awer ro mnu ḇeba ine. Snaro Mami na ḇyeasas roi oso faro mko.’ Ḇape sifawi mnis wos Yesus ikofen ine ḇa. Mura sifuken, ’Tuan, ro kirine na ḇeraja ro Israel ke?’ Yesus kyarem ḇo doḇo, ’Yahwe iso ḇefawi fafisu rosai na yaḇe Raja i, inja kirinema yaḇe Raja ḇaim. Kerower Yahwe ḇyuk rur ḇesren Ḇyedi, inja nari mkoḇe saksi ḇe aya. Rarirya mkoḇaryas ankankinem ḇeḇye ine ro Yerusalem, Yudea, Samaria, ma isof ro sup pember.’

Ramnai Yesus dek ḇe farsyos, ma mandep anna nadwarek i. Manfamyan ḇyesine siwakwaker ḇe ḇo fa smamuser i, ḇape isyawer ḇa ro farsyos ani.

Mura sibur Urek Zaitun ma sraḇe Yerusalem. Ro ras-ras sfanjur ro sim ḇero ḇo rum oso fa sinadi. Skowaf Yesus ḇyuk akurfasnai ḇeuser ya wer.