Wamarisen Manḇefrur Uren Saprop Pyankayum Au Ke?

1, 2. Rosai ḇefnai fa Allah myam Daniel i ḇe ’snonkaku Allah iswar kaku’ ya? (b) Rariso na kosouser imnis Daniel i rai?

ROFYOR snonkaku Yahudi ssun si ḇe Babilon, sikenem ro mnu ḇeba ḇefo kuker snonkaku ḇesyom rur ḇemaḇak ma amfyanir. Ḇape, snonkaku Yahudi ḇeḇeso sisoasuser pdef ḇe Yahwe I, raris Daniel ma bati rikyor ḇyesi. Simewer snonkaku ḇero Babilon sya spankayum si. (Dan. 1:6, 8, 12; 3:16-18) Daniel ma bati ḇyesi sisyom monda ḇe Yahwe I ma simarisen Manḇefrur Uren Saprop ya pyankayum si. Ro ras-ras kankenem ḇyedi, Daniel ḇyarek ro moḇ ḇeḇyeḇa. Ḇape, Allah malaikat ḇyedi dap i ḇe ’snonkaku Allah iswar kaku’.​—Dan. 10:11, 19.

² Manḇefrur oso na ryir saprop ḇerik ro moḇ cetakan ya fa ifrur na ḇe roi oso. Allah manfamyan ḇyesi sifawi snar Yahwe iso Manḇepoik ro supswan ma farsyos ḇena hak fa pyankayum er-er sya. (Wasya Yeremia 18:6.) I kako nya hak fa pyankayum ko oser-oser. Ḇape, idif snonkaku sya ḇa fa sifrur fararwe. Imarisen fa pyankayum ko snar komarisen. Ro artikel ine, nari kofarkor nyan ya fa koḇe saprop ḇerik ḇesbunek ro Allah ḇramin ḇyedi. Roi rikyor naisya nari kowawos na. (1) Nyan fa kosawen rari-rari na ḇefrur fa kopampun ananun Allah ḇyena ma komnis saprop ḇerik ḇepakrek. (2) Nyan fa kona rari-rari na ḇefrur fa kosouser pdef, imnis saprop ḇerik ḇesbunek. (3) Nyan fa sinan sya sifararur kayam kuker Yahwe I rofyor spankayum romawa sesya.

KOSAWEN RARI ḆEFRUR SNE KOḆENA NPAKREK

3. Rari rosai ḇefrur fa sne koḇena npakrek ya? Buk contoh.

³ Amsal 4:23 ikofen, ”Iba syadi ro roi ḇese nakam fandun fa faduruna, wafaduru sne bedi, snaro knam kankenem syae ro diya.” Insama sne koḇena npakrek awer, fandun fa kosawen kenem ḇeḇyeḇa imnis raris ararer, fararur sasar, ma kakyar ḇepromes. Roi nane na nafrur fa kosouserḇa ma kosampampum ananun na. (Dan. 5:1, 20; Ibr. 3:13, 18, 19) Iso ḇeḇekuro Raja Uzzia ḇero Yehuda. (Wasya 2 Tawarikh 26:3-5, 16-21.) Randak ya, isouser ma fyanam kuker Allah I inja isma barakas. Ḇape, ”fyoroḇa rofyor syambraḇ kwar, sne ḇyedi ḇyeararer”. Dararer kaku rawo ḇyensewar fa fyarser dupa ro bait, inema fandun fa imam sya monda ḇefrur ya. Rofyor imam sya sesonek i, Uzzia imsor kaku! Inja, Yahwe ḇyuk samamyai ḇe raja ḇeararer ani. Ismai dafduf kusta isof ro imar.​—Ams. 16:18.

4, 5. Rosai na ḇeḇekur ko rofyor fasaw ḇa fa kosawenbur ararer ya? Buk contoh.

⁴ Fandun fa kosawen fasaw ḇaḇeararer ya. Oroḇa ido, na koḇaḇir snar kopyum syadi ḇuro ḇese sya ma ibasyadiwer komewer korower ananun ḇero Refoya. (Ams. 29:1; Rm. 12:3) Imnis raris penatua oso ḇenir ḇe Jim. Nya kakara ḇeḇesebur kuker penatua ḇese sya kuker roi ḇesamswen oso ro sidang ya. Jim ikofen, ”Yakofen ḇesi snar sna saswar ḇa. Ramnai, yoresbur ro rapat penatua ani.” Ro swaf paik riwonem ramnai, iryur ḇe sidang ḇese, ḇape isma fakamaman ḇe penatua ro dia ḇa. Jim fyafko rawo. Ikyar kaku snar doḇe kyaku. Imewer ifarmyan ḇe Yahwe I werḇa. Jim ḇyeaktif werḇa fafisu taun risamfur. Ikofen snar fyor iwara darareri inja ḇyuk sasar ḇe Yahwe I faro rosai ismana. Taun ḇe taun ramnai, naek srar sya srama ḇe i ma sisewar kaku fa sifnoḇek i. Ḇape, Jim pyampum farfnoḇek sena.

⁵ Jim ikofen, ”Fyor iwara, yakara ker snar siso ḇesasar ya.” Ro farfyar ine, kofarkor snar rofyor kararer ko ido, na kosano warek roi ḇesasar kofrurna. Ma, koḇe saprop ḇerik ḇesbunek werḇa. (Yer. 17:9) Ras oso wamsor faro rosai naek srar sya sifrur na ke? Ḇesneso snaro wasma fakamaman werḇa ke? Rosai wafrur ya? Na ḇeararer ke? Ḇaido, na ḇaḇir fandun kaku fa nwa aski kuker naek srar sya ma wasoasuser pdef ḇe Yahwe I ke?​—Wasya Mazmur 119:165; Kolose 3:13.

6. Kofrur sasar ker ido, rosai na ḇeḇejadi ya?

⁶ Rofyor snonkaku oso ifrur sasar ker ma ikram sasar ḇyena, nari samswen ḇe i fa ryower ananun ḇero Refo sḇuk ḇe i. Ramnai, na ifrur sasar ya ker. Naek oso ikofen snar faḇye mura ḇyaḇir ḇaḇeri roi ḇeḇyeḇa ifrurna nsasar. (Pkh. 8:11) Naek oso ḇese ro randak ya imarisen myam ponografi ikofen, ”Ḇarpur ya yamarisen yasnurem ker penatua sya.” Roi ifrur nane nafrur fa ḇaḇebati ḇyedi kuker Yahwe I imuk. Rofyor rosai ifrurna nasnaibos, isma farfnoḇek ro penatua sya. Kaku ya, kokame snonkaku ḇesasar siko. Inja, rofyor kofrur sasar ido, fandun fa kor ampun ma farfnoḇek ro Allah. Ḇape kosanowarek sasar kofrurna ḇaido kosampampum snonkaku ḇebuk ananun ḇeko ido, sne koḇena na nḇepakrek.

7, 8. (a) Rosai ḇefasnaḇair snar snonkaku Israel sna kakakyar werḇa? (b) Rosai farkarkor ya ḇeko?

⁷ Snonkaku Israel sya smam kwar mujisat nabor rofyor Yahwe fyaspar si ro sup Masir. Ḇape, rofyor imḇe ssun ḇe Sup Ḇaḇeasas ya, sne sena nḇepakrek. Rosai ḇefnai ya? Snaro sikyar ḇe Allah I werḇa. Kaku ya fandun fa sikyar ḇe Yahwe I, ḇape simkak ma sisnuremker faro Moses i. Syadiwer imḇe skaḇer ḇe sup Masir, moḇ sewomen si! Yahwe sne ḇyedi iduf kaku ma ikofen, ”Isof ro fafisu risai er ine na ḇyesyowi aya ḇa?” (Bil. 14:1-4, 11; Mz. 78:40, 41) Snaro sna kakyarḇa ma sne sena npakrek inja simar ro moḇ ḇeursḇa.

⁸ Kirine, dunya babo fyanam kaku kwar. Kakyar koḇena neḇefrowespan. Inja, fandun fa kokeḇ kakyar koḇena. Kokyar kaku snar kona kakyar ḇenako ke? Kowasen kada Yesus wos ḇyena ro Matius 6:33. ’Cita-cita ayedi ma snemuk yunna nfasnaḇair snar yakyar kaku faro Yesus wos ḇyena ke? Fafisu oso yaso fananjur ya ḇa ḇaido yaḇaryas werḇa snaro yasewar pipi nabor wer ke? Rariso rofyor fararur ayedi dun oras nabor ma samambraḇ ayena? Dunya ine pyankayum aya kwar ma ibasyadiwer ifrur fa yamnai yafarmyan ḇe Yahwe I ke?’

9. Rosai ḇefnai fandun fa ’komnasenbir mankun ko’ snar kosya ro kakyar ya ke, ma rariso nyan ya?

⁹ Kosouser farkankin ḇero Refo kuker ḇaḇebati, pemecatan, ḇaido hiburan ḇa ido, sne koḇena na npakrek. Rosai fandun fa wafrur ya rofyor roi ine ḇyejadi ro au? Fandun fa kwukeḇ kakyar bedi! Refoya ikofen, ”Indo naek srar mkomnasenbir mankun mko ma mkokukeḇ kaku ḇeri naek srar mkoisya.” (2 Kor. 13:5) Fandun fa wakofen roi ḇenapes ro mankundaw ma wafrur mnis swaruser bedi kuker buk Refoya.

ḆESAPROP ḆESḆUNEK PDEF

10. Rosai fandun fa kofrur ya insama komnis saprop ḇerik ḇesḇunek ro Yahwe bramin ḇyedi?

¹⁰ Insama komnis kuker saprop ḇerik ḇesḇunek, Allah ifnoḇek ko roro Refo, sidang, ma fararmyan koḇena. Kowasya Refo ma kowasenna ro ras ḇe ras ido, nari komnis saprop ḇerik ḇesḇunek ro bramin Yahwe ḇyedi. Inja napyan fa pyankayum ko. Yahwe iwan raja ḇero Israel sya fa ssfas kaḇer Sasoser Allah ḇyena ma siwasya na ro ras ḇe ras. (Ul. 17:18, 19) Manwawan sya sfawi snar siwasya Refo ma siwasenna iso roi ḇefandun kaku ro fararmyan sena. Rofyor ssfas Allah Wos ḇyena, sfas kaḇer Syap-Syap Ibrani ri utin ma utin. Rofyor sḇaryas, sikofenḇair ḇe snonkaku sya fa siwasya Refo ma siwasenna. (Kis. 17:11) Ko kako kofawi snar kowasya Refo ma kowasenna ro ras ḇe ras inema roi ḇefandun kaku. (1 Tim. 4:15) Kofrur rarirya ido, na kona sne ḇerun pdef ma komarisen Yahwe pyankayum ko.

11, 12. Rariso Yahwe ḇyuk sidang ya fa pyankayumko imnis kuker fandandun koḇena rai? Buk contoh.

¹¹ Yahwe ḇyuk sidang ya fa pyankayum ko imnis kuker fandandun koḇena oser-oser. Jim, ḇeḇeyap ro randak ya, ifrur fararwe rofyor penatua oso fyasna sawarwar ḇe i. Jim ikofen, ”Pok fa ḇyuk sasar ḇaido isnurem ker aya ḇa. Fyasna karkara ḇepyum ma imarisen kaku fa ifnoḇek aya.” Swaf paik rikyor ramnai, penatua ani dor Jim i fa iso ro fananjur ya. Jim fyawar snar naek srar sya kuker sne ḇemarisen sisaser i ma sfasna saswar ya, nane nafnoḇek i fa fyadwer karkara ḇyena. Kyara snar roi ḇefandun kaku ya iso sneḇaḇir ḇyedi ḇa. Swa ḇyedi ma penatua sya sisambraḇser i. Ramnai, kuker fawase fyarmyan kaḇer ḇe Yahwe I. Jim ikako isma fainda rofyor iwasya artikel ”Yehuwa Tidak Dapat Dipersalahkan” ma ”Melayani Yehuwa dengan Loyal” ro Menara Pengawal 15 November 1992.

¹² Ḇarpur mura, Jim ḇye penatua wer. Fyor ya, ifnoḇek kwar naek srar ḇese sya ḇena roi ḇesamswen raris ismana ma syambraḇser kakyar sena. Randak ya kyara snar fyanam kwar kuker Yahwe I, ḇape kaku ya roḇa! Fyafko snar dararer i, fyandun ḇa roi ḇefandun kaku ya ma myam monda faro sasar snonkaku sya.​—1 Kor. 10:12.

13. Ḇaḇeḇaryas ya na nafnoḇek ko fa kona rari risai, ma rosai fainda ḇese ya wer?

¹³ Ḇaḇeḇaryas ya kako na pyankayumko ḇe snonkaku ḇepyum syadiwer. Rariso nyan ya? Rofyor koḇaryas ankankinem ḇeḇye, fandun fa kona sne ḇerun ma kofasna ḇar ro bon rur ya. (Gal. 5:22, 23) Kwarapan rari-rari ḇepyum rosai kona kwar snaro komyaren ro ḇaḇeḇaryas ya. Kofarari Kristus ido, snonkaku na simarisen srower anun koḇena ma na sfadwer mamam sena faro ko. Imnis raris, Saksi risuru ro Australia susewar fa suḇaryas ḇe bin oso ro rum ḇyedi. Bin ani imsor fafayaba ma ifrurpyum suḇa. Ḇape, Saksi ansuine surower monda. Ḇarpur ya, bin ani fyafko ma fyarem syapram ḇe kantor cabang. Dor maf faro rosai ifrur na. Fyas, ”Yaḇaḇir yafawi royoḇa snaro yayawbur snonkaku risuru ḇeḇaryas Allah Wos Ḇyena.” Fawar ine nefasna fandun kaku fa kofasna kona sne ḇemayar ro ḇaḇeḇaryas koḇena. Ine nun fainda ḇe snonkaku ḇese sya monda ḇa, ḇape ḇaḇeḇaryas ya kako nafnoḇek ko fa kofadwer rari-rari koḇena.

KOFARARUR KAYAM KUKER ALLAH ROFYOR KOPANKAYUM ROMAWA KOḆESYA

14. Rosai fandun fa sinan sya sifrur ya insama sisma bon ḇepyum rofyor spankayum romawa sesi?

¹⁴ Romawa sya sima sna sne ḇerun ma simarisen sifarkor. (Mat. 18:1-4) Inja, fandun fa sinan sya srir napnapes ya ma sḇuk farkarkor romawa sesya fa siswar napnapes ya rofyor sibaḇa kaker. (2 Tim. 3:14, 15) Insama sisma bon ḇepyum ya, fandun fa sinan sya mankunsi siswar napnapes ya ma ssfasna na ro kankenem sena. Inja, nari nadif romawa sya fa siswar napnapes ya. Romawa sya kako nari sḇaḇir farkarkor sismana inema nefasna saswar ro sinan sya ma Yahwe I.

15, 16. Rofyor romawa oso sisaebur i ro sidang, rariso sinan sya fandun fa sfasna kakyar faro Yahwe I?

¹⁵ Sinan sya sḇuk napnapes ya sfarkor romawa sesya kwar mboi, romawa ono sisya sbinkwanbur Yahwe I ma sisaebur sidang ya. Ine ḇeḇefnai ya ido, na kina sesya sefafardun. Inḇesrar oso ro Afrika Selatan ikofen, ”Rofyor manḇesrar ayedi sisaebur i ro sidang, rya imar kwar. Sne nkoḇena nakar kaku!” Ḇape, rosai inḇesrar ani ma sinan byesi sifrur ya? Sisouser farkakin ḇero Refo ya. (Wasya 1 Korintus 5:11, 13.) Sinan ḇyesi sifawi snar nari sikame sisma fainda rofyor sisouser Allah ananun ḇyena. Sifawi snar pemecatan inema disiplin ḇefo kuker saswar ḇerama ro Yahwe I. Inja, na sisrow monda kuker romawa ani rofyor roi ḇefandun kaku oso isya ro kina.

¹⁶ Rariso sneḇaḇir romawa ḇesaebur ro sidang ani? Ḇarpurya fyawar, ”Yafawi kina ayesi sayin ayaḇa. Sisouser Yahwe I ma organisasi Ḇyedi.” Ikofen wer, ”Rofyor koḇaḇir kofandun kaku farfnoḇek ma ḇaḇepayasyos ro Yahwe I, insape kofawi snar kofandun kaku I.” Kowasen kada kina ani iryaḇ kaku rofyor romawa ya kyaḇer ḇe Yahwe I! Imbo bae, nari kosma roi ḇepyum rofyor kosouser pdef ḇe Allah I.​—Ams. 3:5, 6; 28:26.

17. Rosai fainda ya snar kosouser pdef ḇe Yahwe I?

¹⁷ Nabi Yesaya ḇyebardai snar snonkaku Yahudi ḇembror sya ro Babilon nari sikofen, ”Sye, Yahwe, au kada Kma nkoḇedi. Nkoine iso saprop ḇerik, ma auso Manḇefrur Uren Saprop nkoḇedi; ma nkokame ḇraur ḇramin bena.” Sikako nari sfararyor, ”Waswarepen awer sasar nkoḇena isof fyoro-fyoro. Mam kada: nkokame iso kawasa bedi.” (Yes. 64:8, 9) Rofyor kofasna sne ḇerun ma kosouser pdef ḇe Yahwe I, nari Iswar kaku ko, imnis raris Daniel i. Yahwe nari pyankayum pdef ko kuker Refo, rur ḇesren, ma organisasi ḇyedi insama ro fafisu naiwama nari koḇe ”Allah romawa ḇyesi” ḇemnis kaku.​—Rm. 8:21.