Fakfuken Ro Ḇewasya

Ro fasasna Yehezkiel ḇyena, manseiso ḇeḇeḇair ro snon ḇeyuf rosaser tinta manfasfas ya ma snon riwonem kuker romamun ḇemun?

Skurfasna ḇe sordade ḇero nanki ḇeso fa ḇekakok Yerusalem ro fafisu iwara. Sikako nari siso fa smun pres dunya Setan ro Armagedon ya. Ine iso fawawi ḇebabo rirya. Rosai ḇefnai fa fawawi ḇekwar ya fandun fa neḇefadwer?

Ro 607 SM ḇaim, Yahwe ḇyuk fasasna faro Yehezkiel i kuker rosai na ḇeḇekur ro Yerusalem rofyor mnu ḇeba ani ḇyeḇekakok. Ro fasasna ani, Yehezkiel myam ḇaḇeḇarḇor naisya ro diwa. Ramnai, myam snon riwonem oser-oser dun ”romamun ḇemun ro ḇramin ḇyedi”. Ma snon oso isya kako ”syun sansun linen” ḇeyun ”rosaser tinta manfasfas oso”. (Yeh. 8:6-12; 9:2, 3) Snon ani ḇyeḇewan fa imbran yaryar mnu ḇeba ani ma ”fyas kapkop ro andar snonkaku ḇesurem ma ḇekandera snaro roi ḇeḇyeḇa kam sifrurna ro [mnu ḇeba ani]”. Ramnai, snon riwonem ḇeyuf romamun ansi sḇeḇewan fa smun pres snonkaku syakam ḇena kapkopḇa ro mnu ḇeba ani. (Yeh. 9:4-7) Farkarkor rosai kun ro fasasna ine? Manseiso snon ḇeyuf rosaser tinta ya?

Yehezkiel isma fasasna ine ro 612 SM. Taun ririm ḇyenande ramnai ḇardadi ine randak ya ḇyejadi rofyor sordade Babilon sfarmkok Yerusalem ro 607 SM. Yahwe ḇyuk er Babilon sya fa sḇuk samamyai ḇe kawasa ḇyesi ḇesoasuser ḇa. (Yer. 25:9, 15-18) Ḇape, rariso kuker snonkaku Yahudi ḇeyayin ḇaḇeḇarḇor nakam ro mnu ḇeba ani? Yahwe fyadiren ma fyaspar si.

Ro fasasna ani, Yehezkiel fyas kakuḇa kapkop ro andar snonkaku sya ḇaido iso ro farmakakok mnu ḇeba ani ḇa. Ḇape, ḇar malaikat sya siso ḇefasos farmakakok mnu ḇeba ani. Inja roro ḇardadi anine, na kofawi rosai ḇeḇejadi ro nanki. Yahwe iwan malaikat Ḇyesi fa sfasos farmakakok faro snonkaku ḇeḇarḇor sya ma smampyum insama snonkaku ḇesoasuser sya sisma faspar.a

Ḇardadi ani nari nḇejadi wer ro fafisu naiwama. Fyor iwara, kokofen snar snon ḇena rosaser tinta manfasfas ya kyurfasna ḇe snonkaku ḇesma ramrem sya rofyor sikenem kaker ro supswan. Ko kako kokofen snar snonkaku sḇekapkop fa ḇesma fasaspar rofyor simarisen srower ma sisma ankankinem ḇeḇye koḇaryas na. Ḇape ḇarpur ine, nasnaibos kaku snar fandun fa kofadwer fawawi koḇena kuker ḇardadi ine. Ro Matius 25:31-33, kofawi snar Yesus iso ḇemankara snonkaku sya. Nari ifrurna ro fafisu kandera ḇeba ya. Ro fafisu ya, snonkaku Yesus dap si ḇe domba sya nari ḇesma fasaspar, ma dap ḇe kambing sya nari sisma samamyai marmar ya.

Inja, rosai kofarkor ro fasasna faro Yehezkiel i? Roi ririm ḇeḇeuser nane:

1. Rofyor Yerusalem ḇyeḇemkok ḇaim, Yehezkiel, Yeremia ma Yesaya, skoḇuk swarapepen ḇe snonkaku sya rosai nari ḇeḇekur ro mnu ḇeba ani. Simnis snonkaku ḇemamwarek. Kirine, Yahwe ḇyuk raryur kasun ro snonkaku ḇesma ramrem sya fa sḇukifarkor kawasa ḇyesya ma sḇuk swarapepen ḇe snonkaku sya rofyor kandera ḇeba ryama ḇaim. Yahwe manfamyan ḇyesi kam, siso manfamyan ro rum Kristus ḇyedi, sikako siso ro fararur ine.​—Mat. 24:45-47.

2. Yehezkiel ḇyekapkopḇair ḇa snonkaku nari ḇesma fasaspar sya. Rarirya kako kuker Yahwe kawasa ḇyesi ro fafisu ine. Sḇaryas monda ma sḇuk swarapepen ḇe snonkaku sya kuker rosai nari ḇeḇejadi ro fafisu naiwama. Ḇar malaikat sya sifnoḇek fararur ḇaḇeḇaryas ro supswan ḇesiper ine.​—Why. 14:6.

3. Snonkaku ḇesma fasaspar ro fafisu Yehezkiel ḇyedi, sfas kaku kapkopya ro andar sena ḇa. Rarirya kako kuker snonkaku nari ḇesma fasaspar ro kandera ḇeba ya. Inja, rosai fandun fa sifrur ya fa sisma fasaspar ya? Fandun fa srower ankankinem ḇeḇye ya, sfarari Yesus i, sḇuk kankenem mankun sena fa sfarmyan ḇe Allah, ma sisonem Kristus naek ḇyesi kuker sḇaryas. (Mat. 25:35-40) Ro fafisu kandera ḇeba ya, nari sisma kapkop ya, ine fasnaḇair sḇeḇekinfir fa sisma fasaspar ya.

4. Snon ḇeyuf rosaser tinta kyurfasna ḇe Yesus i. Ro fafisu kandera ḇeba ya, Yesus nari ḇyekapkop faro raryur ḇeba ya. Myam simnis domḇa ma nari sisma swaf fa sikenem fyoro ro supswan.​—Mat. 25:34, 46.b

5. Ro fafisu ine, snon riwonem ḇeyuf romamun ḇemun ḇefasnaḇair ḇe sordade ro nanki, Yesus iso ḇebukor ro si. Fyoro werḇa nari smun pres er-er syakam ma sifrur mnai ḇaḇeḇarḇor ya.​—Yeh. 10:2, 6, 7; Why. 19:11-21.

Fasasna ine nafrur fa kokyar kaku snar Yahwe nari myun snonkaku ḇenapes sya fnoḇek snonkaku ḇeḇarḇor sya ḇa. (2 Ptr. 2:9; 3:9) Ine kako ḇyuk swarapepen ḇeko snar fararur ḇaḇeḇaryas ro fafisu koḇedine nefandun kaku. Snonkaku sya kam fandun fa srower swarapepen ani rofyor papupes ya ryama ḇaim!​—Mat. 24:14.