Yamarisen Snar Yaḇuk

ROFYOR yaḇeumur 12, yaḇaḇir snar yana roi ḇepyum oso fa yaḇuk ḇe snonkaku ḇesesya. Ro kebaktian oso, naek oso ifuken ḇe aya na yamarisen fa yaḇaryas ke roḇa. Yaḇaryas ro ras osoḇaḇeri ḇaime, ḇape yakofen imbo. Nuraḇe moḇ nuḇaryas ya, ma ḇyuk syapmkun ḇeḇeso kuker Karajan Allah. Ramnai ikofen, ”Rwaḇe snonkaku ro nyan ḇarya, ma yaro ḇar ine.” Yasyasen kaku, ḇape yaḇaryas ḇeri ro rum ḇe rum. Yakandor kaku snar fasawdam fa yarwas syapmkun nakam fa nabro. Inja kaku ḇeri, snonkaku ḇeborsya sfandun kaku faro rosai yana ma yaḇukna.

Yaḇeaḇen ro taun 1923 ro Chatham, Kent, Inggris. Ro fafisu taun Perang Dunia I imnai, snonkaku sya skara nari dunya ine ipyum syadiwer. Ḇape rofyor ndariryaḇa, snonkaku ḇeborsya sfafko, sinan ayesu kako. Sufafko kako faro pendeta ḇero gereja Baptis snar sisewar monda nasan ḇekaki ro gereja ya. Rofyor yaḇeumur fanam ḇe taun risiw, awin ayedi ryaḇe moḇ fananjur ro International Bible Students Association, moḇ Saksi-Saksi Yahwe sifrur ”kelas”, ḇaido fananjur sena. Srar oso ḇyuk farkarkor ḇe romawa inko, neknam ro Refo ma syap The Harp of God. Yamarisen kaku faro rosai yafarkor kwarna.

YAFARKOR RO NAEK SRAR ḆEBA KWAR SYA

Rofyor yaḇe romawa babo, yamarisen kaku fa yafawar saneraro ro Refo ḇe snonkaku sya. Ro ras-ras yemir yaḇaryas ro rum ḇe rum, ḇape rofyor yafararur kayam kuker ḇesesya, yafarkor naḇor ro si. Imnis raris, ras oso rofyor naek ḇeba syadi ro aya nuraḇe moḇ nuḇaryas, numbran pdef pendeta ma yakofen, ”Kambing iso iwa.” Naek ani dado ro sepeda ḇyedi ma dor aya fa yakain kuker i ro ai ḇaken oso. Doḇe, ”Manseiso ḇeḇuk hak ḇe au fa ḇemankara snonkaku oso ḇe kambing ya? Iḇye kada koryaḇ fa koḇuk ankankinem ḇeḇye ḇe snonkaku sya ma koḇuk ḇe Yahwe I monda fa ḇemankara si.” Ro ras ya, yafarkor nabor kaku snar kona ḇaḇeaski rofyor koḇuk roi oso ḇe snonkaku ḇesesya.​—Mat. 25:31-33; Kis. 20:35.

Naek osower ḇesinan syadi ro aya fyarkor aya snar insama kona marasrisen snar koḇuk ḇe snonkaku ḇesesya ido, fyorno ido fandun fa koḇekaḇaḇaḇ. Swari fyafayaf faro Saksi Yahwe sya. Fafisu oso dor aya fa nuyinem tei. Swari ine irmomen kaku snar rya fa ḇyaryas inja syo tei anya dos ḇyedi ḇe nu. Naek ani imsor i ḇa, ḇape kuker marafrif dun kaḇer dos anya ḇe moḇ ya. Ḇarpur ya, ḇaḇekaḇaḇaḇ ḇyena nḇuk bon ḇepyum rofyor swari ḇyebaptis fa dakḇe Saksi Yahwe oso.

Ro September 1939, fyor yaḇeumur 16, Britain ikofenḇadir myamunmun kuker Jerman. Ro Maret 1940, awin yedi ma aya nuḇebaptis ro Dover. Ro Juni 1940, yamam ro ḇarpon kedwa ya sordade syaran ma syaran sifrar kuker trek. Siso ḇefaspar buro Mamamun ro Dunkirk ya. Yamam boi simkak ma siḇoryaye si. Yamarisen kaku yafawar ḇesi kuker Karajan Allah ma yaḇuk saneraro kuker fafisu naiwama besi. Taun ani imnai, Jerman ḇyebom Britain. Ro roḇ nakam, pesawat Jerman ḇesawen bom sena siroḇ yaryar ro moḇ nkoḇedi. Nkomkak fafayaḇa rofyor nkorower rakrok ro bom ḇesapi na. Ro arwo ḇeuser ya, nkomam kada rum na nekakok. Roi yamam nane nafnoḇek aya fa yakyar kaku snar Karajan Allah monda na ḇeḇuk saneraro ḇe aya ro fafisu iyama.

YAḆERAK KANKENEM YEDI FA YAḆUK ḆE SNONKAKU ḆESESYA

Ro 1941, yaḇerak fa yafarmyan ro oras nakam, randak ro nyan kankenem ḇefrur fa yasma marasrisen ḇeba kaku. Yafararur ro Royal Dockyard ro Chatham, yafarkor fa yafrur wai ḇeba. Ine iso fararur snonkaku sya simarisen syadi na, ma ḇeḇuk ḇaḇyak ḇekaki. Ḇape Yahwe manfamyan ḇyesi sifawi snar snonkaku Kristen sipok fa siso ro mamamun yaḇa fa smun er oso. Ma ro 1941, nkofawi kako snar pok fa nkosonem fa nkofrur romamun ḇa. (Yoh. 18:36) Ro moḇ ani sifrur kapal selam, inja iso fafisu yun snemuk fa yamnai ro fararur yena, ma yasun ro fararur fararmyan oras nakam. Fararur ḇerandak ayedi iso ro Cirencester, kota ḇepyum kaku oso ro Cotswolds.

Fyor yaḇeumur 18, yasmai ro bui ro swaf paik risiw snaro yamewer yaso ro militer. Yaḇaḇir yaḇor yaḇerari rofyor kedwa ro bui yaḇarek ya ḇyeḇeseḇen ma yaḇarek ro mankundaya. Ḇape fasaw ḇeri, ḇemamwarek ma ḇesmai ro bui ḇesesya sifuken aya rosai ḇewar fa yaro diwa, ma yamarisen ḇeri fa yakofenḇair kakyar yena ḇesi.

Rofyor ro bui ya ramnai, yaso kuker Leonard Smith,a ma nubaryas ro moḇ ḇeḇeso ḇero sup Kent, moḇ nurama ya. Insama Nazi sya bisa fa sebom London ya, pesawat sena fandun fa siroḇ ro sup Kent ya ḇoya. Ro taun 1944, bom sap ḇe doodlebugs nasyadi ro syaran oser nasapi ro sup Kent. Kakuya, nama pesawat jet ḇena pilot ḇa ḇefo kuker bom-bom. Rofyor nkorower mesin pesawat sena ndrok ḇa, fyoroḇa pesawat na nasapi ma nakpef. Snonkakusya kam simkak fafayaḇa. Ro swaf ani, nuḇuk farkarkor Refo kuker snonkaku ririm ro kina oser. Fyorno ido nkokain ro meja sifrur kuker mankarmomen ḇaḇya insa rum ya nasapi ido nkur ko ḇa. Ḇarpurya mura, kina ine sebaptis kam.

ḆAḆEBARYAS ANKANKINEM ḆEḆYE RO SUP ḆESENA

Mamamun ya ramnai, yaḇe perintis ro swaf taun risuru ro ḇar wamires sup Irlandia. Nuraḇe rum ḇe rum nukofenḇair numa misionaris ma nufuken rum fa nubarek ro na. Nuḇuk syap-syap ro nyan-nyan andirya faro snonkaku sya. Ḇape sup Irlandia iḇese ro sup Inggris. Snonkaku ḇebor skara ine na nsamswen ḇenu fa nubaryas ro moḇ snonkaku Katolik sya sibor ro sup ya! Rofyor snon oso syewar fa ifrur samswen nu, yakofenḇair ḇe polisi, ḇape doḇe, ”Inja, rosai imbe wor fa yafrur ya?” Nukara ḇaḇeri imam-imam ḇero moḇ ine sya sna papoik ḇesambraḇ kaku. Snonkaku sya nari sna fararur ḇa rofyor sun syap-syap nkoḇena. Ma siyaw nu fa nubur ro moḇ nubarek ya.

Fasaw fa nufarkor snar rofyor nurama ḇe moḇ ḇebabo ido, ipyum ḇenu fa nubaryas ro moḇ imam sya sifawi nu ḇa. Inja fandun fa nuraḇe moḇ ḇebinkwan kaku ro moḇ nuḇarek ya ma nurama ḇepon ḇe snonkaku ḇero diansya. Ramnai, nuḇaryas ḇe snonkaku ḇebarek fanam kuker nu. Ro Kilkenny, snonkaku ḇerarmomen sya sifrur makakak nu rariryano, nuḇuk farkarkor ḇe snonkbor oso kali rikyor ro minggu oser. Snaro yaryaḇ kaku fa yaḇuk farkarkor Refo ḇe snonkaku sya, yamarisen yasma farkarkor ḇe misionaris. Inja yun snemuk fa yafarem syap fararyor ḇe Sekolah Alkitab Gilead Menara Pengawal.

Yafarkor paik ririm ro New York ramnai, fyak ro inko ḇemnai kwar ro farkarkor Gilead ya siwan si fa sraḇe myos kasun ḇero Soren Karibia. Ro November 1948, nkobur ro New York City kuker nkek wai ḇeyayun ikwanya meter ri 18 snonsnon ro wai ine iso Sibia. Yaso wai ḇeyayun ḇaime, inja yamarisen kaku. Gust Maki, oser ro ḇeso kwar farkarkor Gilead ya, nya fawawi ḇe kapten wai ya. Fyarkor nko kuker fawawi ḇeḇeso, raris nyan fa nkokanow ma nkosabu layar ḇaido ayun na, nyan fa nkoḇuk kompas, ma rariso nkopampum wam ya. Gust ḇyekir kaku fa dun wai ine rofyor wam doḇer ya myun ro swaf ras ri 30 isof nkosun ro myos Bahama.

”MKOḆARYAS RO MYOS-MYOS ḆEḆINKWAN”

Nkoḇaryas ro paik ḇeḇeso ro myos-myos ḇero Bahama ramnai, nkayun ḇe myos Leeward ma Windward. Myos-myos kasun nane naisya rofandu Myos Virgin ma Trinidad kawanwan ya iso fanam ḇe kilometer ri 800. Ro swaf taun ririm, nkoḇaryas ḇepon ro myos-myos kasun ḇebinkwan kaku ma Saksi osoḇaḇeri isya ro diwa. Fyorno ido na nkofarem ḇaido nkosma syapram ro minggu ḇe minggu ḇa. Ḇape nkoryaḇ pdef fa nkoḇaryas kuker Yahwe I ”ro myos-myos ḇeḇinkwan!”​—Yer. 31:10.

Rofyor nkopyar ro swan ya, snonkaku ḇero myos sya simarisen kaku ma siryur ro dermaga fa sifawi manseisi nko. Sino sisya smam ḇaim wai ḇemnis nkek ine ḇaido smam snonkaku ḇepyoper oso ḇaim. Snonkaku ḇero myos ine sya sifrur pyum kaku ma sifawi mnis Refoya. Fyorno ido, sḇuk ḇe inko in sfor babo, alvokat, ma kacang tanah. Ro wai yadori moḇya ḇyemkei ḇa rariryano, bisa fa nkokankun, nkenef, ma nkopapap sansun nkoḇena.

Nkoraḇe swan andir ya ma nkosrow kuker snonkaku ro diansya ro ras ya ḇesiper. Nkokofen ḇesi snar nari nkawos faya oser ro Refo. Ro mandira murḇaḇ nkofrur stomya ndrok. Nkokandor kaku rofyor nkomam kawasa sya srama. Padamara sena nasak nambrer namnis mak sya ro urek bonya. Fafisu oso, snonkaku seutin srama, ma sḇuk fakfuken isof ro romfawru. Simarisen sidisen, inja nkofas doya Karajan ḇeḇeso ḇesi. Nkoḇe fyak nkosewar kaku fa nkodisen pyum. Ramnai kawasa sya sidisen kayam kuker inko, ma mkaren sena ndrok pyum kaku. Nkomarisen kaku!

Rofyor farkarkor Refo oso imnai, ḇeḇeso ro ḇefarkor sya simbran kayam kuker inko ḇe rum ḇeuserya fa siso farkarkor ya wer. Nkoḇuk swaf minggu ḇeḇeso ro moḇ oso ramnai, nari nkora wer. Ḇape snonkaku ḇemarisen sya sifuken ḇe inko bisa fa sḇuk farkarkor pdef ḇe snonkaku ḇesesya isof ro nkorama kaḇer ke roḇa. Nkoswar kaku si rofyor nkomam simarisen sifararur fadwer inko.

Baboine, ḇebor ro myos nane turis sibor srama ro dia, ḇape rofyor sibur, moḇ ani nkain fasis kuker danosen ḇeramen, yendisare, ma aiknam palem na. Ro swaf oso nkayun ro myos ḇe myos ḇese ro roḇ na. Wombon sya soper sifnak fanam ro andir nkoḇedi, ma rwower kada rakrok wai nkoḇena ḇekorwef warya. Sananai paik ḇenyaser ro warya bori raris nyan ro soren ḇefarawriwek.

Nkoḇaryas ro swaf taun ririm ro myos-myosna ramnai, nkayun ḇe Puerto Riko fa nkun wai ḇebabo fnoḇek motor jonson. Rofyor nkofyafer, yasrow kuker Maxine Boyd, inbesrar misionaris ḇedoser kaku, ma sne yedi imarisen kaku i. Ima binḇaryas ḇeraryaḇ kaku rofyor iḇaḇa kaker. Ramnai, fyarmyan ḇe misionaris ro Republik Dominika isof ro 1950, rofyor ḇaḇesasoser Katolik siyawburi. Snaro yafararur ro wai ya, yasma ijin fa yaḇarek ro Puerto Riko ro swaf paik oser monda. Ramnai fyor yayun ḇe myos-myos naiwarbun ido nari yara ḇinkwanbur i ro taun ḇeḇeso. Inja yawos ro mankundaya, ’Ronald e, wamarisen bin ani ido, wafrur fasaw roi oso.’ Minggu rikyor ramnai yafuken i, ma minggu riwonem ramnai nufarḇuk. Maxine kuker aya nusma fararur ḇe misionaris ro Puerto Riko, inja yasaebur ro wai ḇebabo ani ḇa.

Ro 1956, nuḇerak fararur ḇe pengawas wilayah, ma numarisen numam naek srar sya. Ḇebor ro si senana ḇa. Imnis raris, ro mnu Potala Pastillo, kina ḇe Saksi risuru ḇena romawa sibor sisya ro dia, ma numarisen nufnak ker flute ḇesi. Yafuken ḇe inaimkun oso, Hilda, imarisen fa ḇyaryas kuker nu ke roḇa. Doḇe, ”Yamarisen, ḇape na jadiḇa. Yana sepato ḇa.” Nukowes sepato ḇe i, ma imarisen ḇyaryas kuker nu. Taun ḇeḇeso ramnai, ro 1972 Maxine ma aya nurama ḇe Brooklyn, srar oso ḇemnai babo ro farkarkor Sekolah Gilead ryama fa dawos ḇe nu. Imbe ryaḇe moḇ skur ḇe i fa fyarmyan ro dia iso Ekuador, ma doḇe, ”Mumamḇir ayaḇa ke? Aya iso inaimkun ḇerakero Pastillo ḇena sepato ḇa ani.” Iso Hilda i! Numarisen fafayaḇa isof ro nkokanes!

Ro 1960, nufarmyan ro kantor cabang Puerto Riko, ro rum kasun oso ro Santurce, San Juan. Ḇepon ya, aya ma Lennart Johnson nu iso ḇeyuf fararur ḇebor. I kuker swari su iso Saksi ḇerandak ro Republik Dominika, ma ro 1957, sura suḇarek ro Puerto Riko. Ramnai, Maxine fyarem syap-syap ḇe snonkaku ḇefandun ker na. Ro minggu oser fyarem syap-syap nane nasyadi ro syaran oser. Imarisen kaku ifrur fararur ine snar kyara snonkakusya kam nari sfarkor fa sifawi Yahwe I.

Yamarisen yafararur ro Betel snaro nane nḇuk swaf ḇe aya fa yaḇuk samambraḇ ayena fa yafarmyan ḇe Yahwe I. Imbape ine napyan ḇa. Imnis fafisuya kofrur kebaktian internasional ḇerandak ro Puerto Riko ro taun 1967, yaḇesibuk fafayaḇa fa yafrur fararur nabor kaku fa yafasos kebaktian ya. Nathan Knorr, rofyor ya iso ḇeyuf fararur rofandu Saksi-Saksi Yahwe sya, ryama ḇe Puerto Riko. Doḇerada yafrur fasasos faro transportasi ḇe misionaris ḇerama ro sup ani ḇa, mboi yafasos na kwar. Ramnai, ḇyuk ananun ḇesambraḇ ḇe aya kuker nyan fa yafrur fasasos ma ikofen fyafko faro rosai yafrurna. Yawoswarek i ḇa, ḇape yaḇaḇir ifrur pyum aya ḇa, ma fafisuya yafafardun kaku. Ḇape, ro swaf ḇesena Maxine ma aya nusrow wer kuker Naek Knorr, dor nu fa nusun ḇe sim ḇyedi ma ikun roḇean ḇe nu.

Nuraḇe Inggris fa numam kina nuḇesi ro swaf ḇeḇeso. Rofyor Awin ma aya nufarkor napnapes ya, Kma yedi dakfarkor ḇa. Ḇape fafisu naek ḇefararur ro Betel srama ro moḇ nkoḇedi, awin ayedi dor si fa sḇarek ro rum nkoḇedi. Kamam myam boi naek sine sna sne ḇerun kaku. Sima siḇesebur ro pendeta ḇefrur fafayaf i ro taun-taun aniwara sya. Ḇarpur mura, ro taun 1962, ḇyebaptis ḇe Saksi Yahwe oso.

Swa yedi yaswar kaku ya, Maxine i, imar ro taun 2011. Yamander kaku fa yasrow kuker i ro fafisu kaḇakḇok ya. Yawasen muraḇe roi nane nafrur fa yamarisen kaku! Ro swaf taun ri 58 nuḇekayamyam, numam Saksi Yahwe ro Puerto Riko sya sibor syadiwer ro fafisuya karkor sena fanam ḇe 650 nek ḇe 26.000! Ramnai, ro taun 2013, kantor cabang Puerto Riko iryur kuker kantor cabang Amerika Serikat fa ḇyeoser, ma sor aya fa yafarmyan ro Wallkill, New York. Taun ri 60 ḇe ḇarpon ro fafisu yaḇarek ro myos ya, yaḇaḇir snar snonkaku ḇero Puerto Riko sima coquí, romawa ḇero Puerto Riko sya sifawi kaku kodok ḇaido mankroder ḇekaf ro aiknam ḇedisen radine ko-kee, ko-kee ro mandira murḇaḇ. Yamarisen kaku yaḇarek ro Puerto Riko, ḇape kirine fafisu fa yabur moḇ ine.

”ALLAH ISWAR SNONKAKU ḆEḆUK KUKER MARISENSYA”

Yamarisen kaker fa yafarmyan ḇe Allah I ro Betel. Kirine umur yedi taun ri 90 kwar, ma fararur ayena iso yasambraḇser naek srar ḇefararur ro Betel sya. Rofyor yarama ḇe Wallkill ya, yasrow kuker naek ma srar sisyadi ro 600 kwar. Ḇeḇeso ro si ḇerama ḇemam aya simarisen imbe sawawos samswen mankun sena ḇaido samswen ḇekur kina sesya. Ḇesesya sor anun kuker nyan rariso insama sfarmyan kuker payamyum ro Betel. Ḇesesya wer ido sor anun snar insape sfarḇuk babo ḇaido sisya simnai kwar ro fararmyan ḇe perintis. Yarower snonkaku manseiso monda ḇeyawos ḇe aya, ma fafisuya nasrow indo, yakofen ḇe si, ”’Allah iswar snonkaku ḇeḇuk kuker marisensya.’ Inja wafararur kuker raryaḇ. Inema wafarur ḇe Yahwe I.”​—2 Kor. 9:7.

Inja insama nwa marasrisen ro Betel ḇaido moḇ sairirya monda ido, fandun fa mam monda faro roi ḇeḇefnai fa wafrur roi anna. Fararur nakam nkofrur ro Betel inema fararur ḇesren dirya. Ine nafnoḇek ’manfamyan ḇeḇesyowi ma ḇefawi nananem’ fa sfasos anan rurya faro naek srar syakam ro supswan ḇesiper. (Mat. 24:45) Ro moḇ sairirya kofarmyan ḇe Yahwe I, kona swaf fa koḇuk sanandik ḇe I. Mkorama kofrur rosai iwan ko fa kofrurya, snaro ”Allah iswar snonkaku ḇeḇuk kuker marisensya.”