Warir Makakwarek Bena faro Yahwe

1, 2. (a) Sai ḇefnai fa komkakwarek ya? (Mam sonin ro randak artikel ine.) (b) Rosai nari kawos ro artikel ine?

BABOINE, Setan ”imbran yar mura muma imnis raris singa (aiwan ḇeyan ḇepek) ḇeaur ma ḇesewar snonkaku fadoren ḇepek”. (1 Petrus 5:8; Fasasna 12:17) Ḇedar fa, kankenem ine nafo kuker samswen inja snonkaku ḇebor sya simkak ma seḇirḇar. Allah manfamyan ḇyesi ro fafisu iwara ma baboine kako saksma na. Imnis raris, Refo doḇe fyorno ido Raja Daud nya makakwarek. (Mazmur 13:2) Manwawan Paulus ’iraryofwarek kawasa Kristen kam’. (2 Korintus 11:28) Rosai na kofrurya fyor koḇestres kaku inja kopok wer ḇa?

² Snar Yahwe nya sawarwar ḇeba kaku, ifnoḇek manfamyan ḇyesi ro fafisu iwara insa simkakwarek werḇa. Imarisen ifnoḇek ko kako. Refo idif ko fa, ’Koḇuk makakwarek koḇena kam faro Allah, snar i ḇefaduru ko.’ (1 Petrus 5:7) Ḇape, rariso na kofrurna rai? Nari kawos nyan rifyak. Isoine (1) ḇenadi, (2) wasya ma wasenkara Allah wos sren ḇyena, (3) wor Yahwe rur ḇesren ḇyedi ifnoḇek au, ma (4) fawar sneḇaḇir ḇena faro snonkaku wakyar ya. Kawos nyan rifyak nane ramnai, kwarapan rariso na bisa wafrur mnis kaku roi anna.

’WARIR ḆAḆEKANDERA BEDI FARO YAHWE’

3. Rariso na ’warir ḇaḇekandera bedi faro Yahwe’?

³ Oserya korir makakwarek koḇena faro Yahwe roro nadi kuker kakaku. Rofyor wamkakwarek ido, Kma ḇesaswar koḇedi imarisen wakofenḇair sneḇaḇir bedi faro I. Daud manḇefas Mazmur dor kaku, ”Sye Allah, wafnewer kneram bedi, faro nadi yena.” Daud ikofen kako, ”Buk mura ḇaḇekandera bedi faro Yahwe, ma mankundi nari isaramper au.” (Mazmur 55:1, 22) Rofyor ḇesewar kaku kwar fa wafrurmnis samswen wasmana, nadi kuker kakaku nari ḇyefainda syadi bardiburo ḇemakakwarek ker. Ḇape, rariso nadi na ifnoḇek au fa ḇemakakwarek syadiḇa?​—Mazmur 94:18, 19.

4. Sai ḇefnai fa nadi ima roi ḇefandun kaku rofyor komkakwarek?

⁴ Wasya Filipi 4:6, 7. Koḇenadi ras ḇe ras ma kuker sneḇesiper, rariso Yahwe na kyarem na rai? Na ifnoḇek ko fa koknon ma kobinkwanbur swaruser ma sneḇaḇir ḇesasar. Inja, na koḇirḇar ma komkak werḇa, ḇape na kosma sneprei kaku. Naek srar kobesi sibor sḇaḇir nakwar, na au kako waksmana. ”Saswar-ḇaḇye ro Allah” na ifnoḇek au fa wafrurmnis samswen risai monda! Na wakyar kaku faro Yahwe asas ḇyena, ”Mam mura-muma awer, snaro aya iso Allah bedi. Nari yayarwarek au. Nari yafnoḇek kaku au.”​—Yesaya 41:10.

REFO ḆYUK ḆAḆEASKI YA

5. Rariso Allah wos sren ḇyedi ḇyuk ḇaḇeaski faro Au?

⁵ Nyan ḇesuru fa kona aski isoine kowasya ma kowasenkara Refoya. Sai ḇefnai ine fandun kaku? Snaro Refoya naser ananun ḇepyum ma ḇeyun fainda ro Manḇedaw kobedi. Rofyor ḇemakakwarek, wawasen mura ḇe Allah kakara ḇyena ma rariso buk ananun ḇyena fa nbuki syamḇraḇser Au. Ine na nafnoḇek Au fa wafrur mnis, ḇemakakwarek mankenem ḇa, ma wakrenbur makakakwarek bena. Yahwe ikofenḇair snar snonkaku ḇewasya Wos sren ḇyedi nari ”sḇebri ma sisambraḇ” ma nari ”simkak ḇaido siradaiḇa”.​—Yosua 1:7-9.

6. Fainda rosai kosma ro Yesus wos ḇyena?

⁶ Ro Refo, kowasya snonkaku simarisen srower Yesus wos ḇyena snaro nḇuk sneprei ma pararei, ibasyadi faro ḇeryarḇa ḇaido ḇena samswen sya. (Wasya Matius 11:28-30.) Yesus kyara rosai snonkaku sya sḇaḇirna. (Markus 6:30-32) Ḇyeasas nari ifnoḇek manfamyan ḇewarpui sya, ma i kako nari ifnoḇek ko. Na kosrow kaku kuker Yesus i ḇa fa kosma farfnoḇek ro i. Ḇye raja ro nanki, ḇape na iswar ko pdef. Inja rofyor ḇeḇirḇar ido, wakyar kaku nari ifnoḇek au ro fafisu ḇemnis. Yesus wos ḇyena nḇuk saneraro ma kaḇaḇaḇ, inja bisa kosaebur makakakwarek koḇena.​—Ibrani 2:17, 18; 4:16.

RARI-RARI ḆERAMA RO ALLAH RUR ḆYEDI

7. Rariso kosmai fainda ro Allah rur ḇesren ḇyedi?

⁷ Yesus ḇyeasas rofyor kor rur ḇesren ido, Kma koḇedi nari ḇyukna ḇeko. (Lukas 11:10-13) Rariso nyan rikyor nane na nafnoḇek ko fa koḇe makakakwarek syadi ḇa ḇaido koḇestres? Rur ḇesren, ḇaido Allah samambraḇ ḇefarur ḇyedi, nafnoḇek ko fa kofasna rari-rari ḇepyum raris Allah nyana. (Kolose 3:10) Ro Refo, rari ḇaido kenem ine sapna ḇe ’rurya bon ḇyena’. (Wasya Galatia 5:22, 23.) Kofasna rari-rari anna ido, fasfesepen koḇena kuker snonkaku ḇese nari napyum syadi. Rarirya, nari kobinkwanbur fafisu ḇefrur fa koḇestresna. Mkorama kawos rariso rurya bon ḇyena na nafnoḇek ko.

8-12. Rariso bon ro Allah rur ḇyedi na ifnoḇek Au?

⁸ ”Saswar, raryaḇ, aski.” Ḇesyowi snonkaku ḇesesya ido, na ḇestres mankunḇa. Sai ḇefnai ya? Snaro waswar kaku snonkaku sya, fasna snemayar, ma ḇesyowi si ido, nari nafrur fa wakrenbur fafisu na ḇefrur fa wana kakara ḇesasar raris masasor, fafafko, ma ḇestres. Na kwainpyum kuker snonkaku ḇesesya pdef.​—Roma 12:10.

⁹ ”Ḇaḇekaḇaḇaḇ, ḇaḇenaḇye, ḇaḇesyowi.” Refo ikofen, ”Mboi mkosnemna nfafir faro min mkoḇesi, mko swaryae mko, ma mkoḇuk ampunyae faro mko”. (Efesus 4:32) Koso ananun ani ido, nari kokenem pyum kuker min ḇesesya, ma kokrenbur fafisu ḇefrur fa koḇestres ya. Napyan kaku ḇeko fa kofrurmnis samswen kosmana snaro ḇaḇemnisḇa koḇena.

¹⁰ ”Kakyar, (NW).” Kona makakwarek ker kuker pipi ma nana. (Amsal 18:11) Rariso insa komkakwarek ḇa kuker roi nane? Fandun kaku koso manwawan Paulus anun ḇyedi, ”mkokenem imnis kuker rosai isya faro mko”. Kona kakyar ḇesambraḇ faro Yahwe ido, kokyar nari fyamfon fandandun koḇena. Ḇyeasas, ”Nari yarir aw ḇa ma nari yabur aw ḇa.” Inja, raris Paulus i, na kokofen, ”Manseren [Yahwe, NW] ifnoḇek aya, inja nari yamkak ḇa. Snonkaku oso ḇaḇeri nari ifrur roi oso maḇe aya!”​—Ibrani 13:5, 6.

¹¹ ”Ḇaḇerandun sne, ḇaḇefarmku mankun.” Kwarapan fainda ḇebor ro rari suine. Rofyor nwa rari ine ido, na wafrur ḇaido wakofen roi na ḇefrur fa ḇestres ḇa. Inja, binkwanbur rari ḇeradinena isoine ’wasawen swaruser ḇeḇor ḇesarmar ro snembri, dosam masasor, rakrakrok ma famfaras, rarirya kako ḇarḇor ḇeḇor ḇero snembri nakam’.​—Efesus 4:31.

¹² Fandun fa fasna sneḇerun insa wakyar faro ”Manseren [Allah, NW] ḇramin ḇesambraḇ ḇyesuya” ma ’ḇuk makakwarek ḇena kam faro Allah’. (1 Petrus 5:6, 7) Fasna sneḇerun ido, Yahwe nari ifnoḇek au ma fyaduru au. Rofyor wafawi rosai wasambraḇ fa wafrurna ma wasambraḇ wafrur ḇana nari wakyar mankundaw ḇa. Nari ḇemakakwarek syadi ḇa snar wakyar faro Allah.​—Mikha 6:8.

”MKOMKAKWAREK AWER”

13. Rosai knamya rofyor Yesus ikofen, ”Mkomkakwarek awer”?

¹³ Ro Matius 6:34 (wasya), Yesus danun, ”Mkomkakwarek awer.” Ananun ḇepyum ine kokara ido samswen fa kofrurna. Inja, rosai knam ro Yesus anun ḇyedine? Kofawi Daud ma Paulus fyorno ido suna makakwarek kako. Inja, Yesus fyasnaḇair ḇaḇeri snar Allah manfamyan ḇyesi na simkakwarek ḇa. Ḇape, Yesus imarisen insa manfamyan ḇyesi sifawi snar makakwarek ḇekaku ḇa ḇaido ḇesyadina, na nbuk nyan ḇesae ḇa. Inja, ipyum syadiya snonkaku Kristen sisewar makakwarek nabor awer kuker skara samswen ro fafisu iwara ma ḇerama ḇaimna. Rariso anun Yesus ḇyedi nafnoḇek ko fa komkakwarek syadi ḇa?

14. Raris Daud i, rariso nyan ya insa komkakwarek syadiḇa?

¹⁴ Fyorno ido, sino sisya sipok ḇa kwar snaro sasar ro fafisu iwara. Sasar sifrurna nbenande fyoro kwar rariryano, sḇaḇir sisasar kaker. Raja  Daud ikako ḇyaḇir ḇyesneso kaku snar sasar ḇyena. Doḇe, ”Yakanes saneso kaku snaro sne yedi ikar kaku.” (Mazmur 38:3, 4, 8, 18) Ḇape, ro fafisu ani Daud fyasna fawawi nanem. Ikyar kaku ḇe Yahwe snar Allah fyasna sawarwar ma imarisen ḇyuk ampun. Daud imarisen kaku snar fyawi Allah ḇyuk ampun ḇe i.​—Wasya Mazmur 32:1-3, 5.

15. (a) Farkarkor rosai kun ro Daud i wer? (b) Rosai na wafrurya insama wamkakwarek syadiḇa? (Mam kotak ”Nyan Insama Wamkakwarek Syadi Ḇa.”)

¹⁵ Fafisu ine, na wana makakwarek faro kankenem bena kako. Daud ismana kako, rofyor fyas Mazmur 55, fafisu ya imkak kaku snaro ono imbe smuni. (Mazmur 55:2-5) Ḇape, imkakwarek raryano, kakyar ḇyedi faro Yahwe namnai ḇa. Daud dor farfnoḇek ro Yahwe I, ḇape fyawi fandun ifrur roi oso. (2 Samuel 15:30-34) Bisa wun farkarkor ro i. Bardibur ḇesneso snar wamkakwarek syadi, ipyumya ḇesewar fa wafrurmnis samswen ḇena, ramnai wakyar faro Yahwe nari ifnoḇek au.

16. Rariso knam ro Allah snonsnon ḇyedi na nsambraḇser kakyar bedi?

¹⁶ Fyorno ido, snonkaku Kristen simkakwarek fafisu ḇerama ya. Ḇape, ḇemakakwarek awer faro rosai ḇejadi ḇaimna. Sai ḇefnai ya? Snaro rosai ḇeḇejadi ro fafisu ḇeramaya imnis ba kuker rosai ḇeḇyeḇa kowasen na. Waswarepen kako, Allah bisa fyara fafisu nakam. Knam ro Allah snonsnon ḇyeja isoine ”Iso Ḇefnai Ḇedar fa Ndarirya”. (Keluaran 3:14) Inja, komkakwarek awer kuker fafisu ḇerama ya, snaro Allah snonsnon Ḇyedi fyasnaḇair marisen Ḇyenakam faro snonkaku sya nari nḇendarirya. Na wakyar snar Allah nari ḇyebarakas manfamyan ḇesouser ḇyansi. Nari ifnoḇek si kako insa simkakwarek syadiḇa faro fafisu naiwara, fafisu ine, ma fafisu ḇeramaya.

FAWAR ḆE SNONKAKU OSO WAKYAR YA

17, 18. Nyan ḇefyak rosai na ḇefnoḇek fa kofrurmnis makakwarekya ma rosai fainda ya?

¹⁷ Nyan ḇeḇefyak fa frurmnis kaḇer makakwarek bena iso fawar rosai ḇaḇirna ḇe snonkaku wakyarya. Faro swambri, bati bedi, ḇaido penatua na siso ḇefnoḇek au fa nwa kakara ḇepyum kuker samswen wasmana. Refo ikofenḇair, ”Makakwarek ro snonkaku sisnesna naiso ḇefrur fa sne sena nakar, ḇape wos ḇepyum naiso ḇefrur sisnesna nararyaḇ.” (Amsal 12:25) Refo ikofen kako, ”Fararur nambran ḇa rofyor kokarapyum na ḇa, ḇape fararur nambran pyum rofyor ḇekarana sibore.”​—Amsal 15:22.

¹⁸ Fananjur na kako nafnoḇek ko fa komkakwarek syadiḇa. Ro fananjur ya, ḇebati kuker naek srar ḇeswar ma ḇebuk wos sneprei ḇe au. (Ibrani 10:24, 25) Rofyor ”kosonemyaeko” nari nasambraḇser ma napyan fa kofrurmnis makakwarek ḇaido ḇirḇar sarirya kam.​—Roma 1:12.

FASFESEPEN BENA KUKER ALLAH NEFANDUN KAKU

19. Sai ḇefnai fa na wakyar kaku snar fasfesepen ḇepyum kuker Allah nari nasambraḇser Au?

¹⁹ Penatua oso ro Kanada ḇyaḇir fandun kaku ryir makakwarek ḇyena ḇe Yahwe I. Fararur ḇe guru ro rumfarkor nafrur ḇyestres. Isma dafduf ḇemkak syadadi. Sai ḇefrur fa syambraḇ pdef? Snaro ḇyesewar fa fasfesepen ḇyena kuker Yahwe I syambraḇ. Bati ḇyesi sakfnoḇek i ro fafisu ḇesamswen na. Ikofenḇair sneḇaḇir ḇyedi ḇe swari kako. Osower ido, penatua ma pengawas wilayah sifnoḇek i fa myambir rariso Yahwe mamam ḇyedi kuker rosai ismana. Dor farfnoḇek ro dokter sya. Ramnai fyadwer jadwal ḇyeja insa dakna oras fa imnaisu ma ḇyeolahraga. Fawawas, fyawi nyan fa fyara sneḇaḇir ma fafisu ḇyena. Roi oso ipok fyarana ḇa ido, dor farfnoḇek ro Yahwe I.

20. (a) Rariso nyan fa korir makakwarek koḇena ḇe Allah I? (b) Rosai na kofarkor ro artikel ḇeuser ya?

²⁰ Kofarkor kwar, snar fandun kaku korir makakwarek koḇena ḇe Yahwe I kuker konadi, kowasya ma kowasen Wos ḇyena. Kofarkor kako fandun kaku kor Yahwe rur ḇesren ḇyena nafnoḇek ko, kawos ḇe snonkaku kokyar sya, ma koso fananjur. Ro artikel ḇeuserya, nari kofarkor rariso Yahwe barakas ḇyeasas kwarna na nafnoḇek ko.​—Ibrani 11:6.