Snonkaku Kristen Fandun fa Sebaptis

1, 2. (a) Rosai sinan ḇeḇeso skarana rofyor romawa sesya imbe sebaptis? (b) Rosai ḇefnai fa snonkaku ḇemarisen ḇebaptis sya sifuken si, sḇuk farsamsyom sena ḇe Yahwe I kwar ke roḇa? (Mam sonin ro randak artikel ine.)

MARIA sinan ḇyesuya sumam inaikir suḇedi dores rofandu ḇeḇebaptis ḇesesya. Naek ḇeyun faya ḇaḇebaptis ḇyuk fakfuken risuru. Maria kyaremna kuker mkaren ḇeba ma ḇepyum. Ramnai ḇyebaptis.

² Maria sinan ḇyesuya sumarisen kaku inaikir suḇedi ḇyuk farsamsyom faro Yahwe ma ḇyebaptis. Ḇape ro randakya, Maria snari ḇyeḇirḇar kwar. Kyara ḇo doḇe, ’Maria ibaḇa kaker ḇo imbe ḇyebaptise? Ifawi mnis kwar farsamsyom ḇe Yahwe ima roi ḇefarfnak risyaḇa ke? Fandun fa iwaf kawan wer fa ḇyebaptis ke?’ Sinan ḇebor sya kako skara radiri rofyor romawa sesya soḇe imbe sebaptis. (Pengkhotbah 5:5) Kofawi kwar snemuk ḇefandun kaku snonkaku oso bisa dunna iso ḇyuk farsamsyom mankun ḇyedi faro Yahwe ma ḇyebaptis.​—Mam kotak ”Ḇuk Farsamsyom Mankun Bedi faro Yahwe I Kwar Ke?”

3, 4. (a) Rariso Manwawan Petrus fyarkor ko snar ḇaḇebaptis ima ḇyefandun? (b) Rosai ḇefnai fa Petrus ikofen ḇaḇebaptis imnis kuker jawara Nuh fyasosya?

³ Manwawan Petrus ikofen ḇaḇebaptis imnis kuker jawara ḇaido wai ḇeba Nuh fyasos ya. Doḇe, ”Mkosma kankenem snar sarḇer ani, isoine [ḇaḇebaptis]”. (Wasya 1 Petrus 3:20, 21.) Jawara ani fyasnabos ḇe snonkaku ḇesesya snaro Nuh ifrur Allah marisen Ḇyena kuker sne ḇesiper. Nuh ifrur fararur Yahwe ḇyuk ḇe i na kuker soasuser. Snar kakyar ḇyedi, Yahwe fyaspari fnoḇek kina ḇyesya ro fafisu Faḇruḇ ḇeba ya. Farkarkor rosai Petrus imbe ḇyuk ḇeko kuker ḇaḇebaptisya?

⁴ Rofyor snonkaku smam jawara anya, sifawi Nuh ima ikyar faro Allah I. Rofyor snonkaku sya smam snonkaku oso ḇyebaptis, sifawi snonkaku ani ḇyuk kankenem ḇyedi faro Allah snar kakyar ḇyeja faro Yesus ḇeḇebawes kwar ani. Raris Nuh, ḇeḇebaptis sya sisouser faro Allah ma sifrur fararur Allah ḇyuk ḇesi na. Ma raris Yahwe fyaspar Nuh rofyor Faḇruḇ ḇeba ya, I kako nari fyaspar manfamyan ḇesouser ḇyesya ḇeḇebaptis kwar rofyor myunpres dunya ḇeḇarḇor ine. (Markus 13:10; Fasasna faro Yohanes [Wahyu] 7:9, 10) Koḇuk farsamsyom mankun koḇena faro Allah ma koḇebaptis ima roi ḇefandun kaku. Inja, rofyor komewer koḇebaptis fasaw ido, nari kosma saneraro kankenem fyoro ya ḇa.

5. Rosai nari kofarkor ro artikel ine?

⁵ Rofyor kofawi kwar ḇaḇebaptis ima roi ḇefandun kaku, fandun fa kokarem fakfuken rikior nane: Rosai Refo ikofen kuker ḇaḇebaptis? Rosai snonkaku oso fandun fa ifrurya rofyor ḇyebaptis ḇaim? Rosai ḇefnai fa koswarepen ḇaḇebaptis ima roi ḇefandun kaku rofyor kofarkor romawa koḇesya ḇaido ḇefarkor Refo sya?

ROSAI REFO FYARKOR ḆEKO RO ḆAḆEBAPTIS YA

6, 7. (a) Rosai ḇefnai fa snonkaku sya srakam faro Yohanes fa sebaptis? (b) Ḇaḇebaptis mansei ḇeḇese ro ḇaḇebaptis ḇesena, ma rosai ḇefnai ya?

⁶ Refoya ikofen, Yohanes iso snon ḇeḇebaptis randak snonkaku sya. (Matius 3:1-6) Rosai ḇefnai fa snonkaku sya srakam faro i fa sebaptis? Snaro sifawi siyuk Moses Sasoser ḇyena kwar ma imbe sifasna simbror ro sasar sena kwar. Ḇape, ḇaḇebaptis Yohanes ifrurna ḇyefandun kaku. Nya fakamaman ḇeba fa ḇyebaptis Allah Rumkun ḇenapes Ḇyedi, Yesus i. (Matius 3:13-17) Snar Yesus nya sasar ḇaḇeri, inja ḇaḇebaptis ḇyedine faro ḇaḇembror ḇyena ḇa. (1 Petrus 2:22) Ḇape, rosai ḇefnai fa Yesus ḇyebaptis? Snar imarisen ḇyuk kankenem ḇyeja ḇesiper fa ifrur Allah marisen Ḇyena.​—Ibrani 10:7.

⁷ Fafisu Yesus ḇyerak fararur ḇaḇeḇaryas, manfamyan ḇyesya sakḇe baptis snonkaku ḇesesya. (Yohanes 3:22; 4:1, 2) Raris ḇaḇebaptis Yohanes ifrurya, ḇaḇebaptis ine kako faro snonkaku ḇefawi kaku snar siyuk Moses Sasoser ḇyena ma fandun fa simbror. Ḇape rofyor Yesus imar ma isma kaḇakḇok kwar, snonkaku ḇemarisen ḇeḇe manfamyan ḇyesi sebaptis snaro alasan ḇese nasya.

8. (a) Parenta rosai Yesus ḇyuk rofyor ḇyeḇebawes kwar? (b) Rosai ḇefnai fa snonkaku Kristen fandun kaku sebaptis?

⁸ Ro taun 33, fyor Yesus ḇeḇebawes babo, Yesus dawos ḇe snon ri 500 syadi, bin, ma romawa sya. Imbude ro fafisu ani ikofen, ”Inja mkora mura, mkofarkor er sya kam ḇe manfamyan Ayesi ma mkoḇuk masi sren faro si kuker snonsnon Kma ya ma Rumkun ya ma rur ḇesren ya, ma mkofarkor si fa sifrur roi ḇeḇor kam raris yaḇeasas kwar faro mko. Ma mkofawi, Aya ine nari yarous mko besya kwar isof awar ḇepupes.” (Matius 28:19, 20; 1 Korintus 15:6) Yesus ḇyuk parenta ḇe manfamyan ḇyesya fa sifnoḇek ḇesesya fa sakḇe manfamyan. Mansei monda ḇemarisen ḇeso i ḇaido ḇeḇar ”kamnam” ḇyedi, fandun fa ḇyebaptis. (Matius 11:29, 30) Insama snonkaku ani ifarmyan ḇe Allah kuker nyan ḇeyun marisen faro I, fandun fa ifawi snar Allah iwan Yesus i fa ifrur marisen Ḇyenakam. Ramnai, snonkaku ani ḇyebaptis imnis nyan Yahwe imarisenna. Refoya fyasnabos manfamyan Yesus ro awar randak sya sifawi ḇaḇebaptis ima roi ḇefandun kaku. Skara ḇaḇeri fandun fa siwaf resari ma nari sebaptis ro fafisu naiwama.​—Farfyar ro Manwawansya [Kisah] 2:41; 9:18; 16:14, 15, 32, 33.

WAMKAK AWER FA ḆEBAPTIS

9, 10. Rosai kofarkor kuker ḇaḇebaptis ro snon Etiopia ma Saul su?

⁹ Wasya Farfyar 8:35, 36. Kofarkor ro contoh snon Etiopia ḇeḇeagama Yahudi oso. Ro barbur ḇyedi fyor ḇyeari ro bait Yerusalem, isroḇ kuker Filipus i. Yahwe malaikat ḇyedi iwan Filipus i fa ḇyaryas faro i, ma fyarkori ”Ankankinem Ḇeḇye ro Yesus.” Rosai snon Etiopia ine ifrurya? Ifawi fandun kaku fa myambir Yesus i ḇe Tuan, ma imarisen ifrur rosai Yahwe dor ro snonkaku Kristen sya. Inja, rofafisu aniḇeri ḇyebaptis.

¹⁰ Contoh ḇese iso snon Yahudi oso ḇenirḇe Saul i. Er Yahudi sima skinfir si kwar fa sifarmyan ḇe Yahwe I. Ḇape, Yahwe pyampum si snaro sisouser I ḇa. Saul ikyar snonkaku Yahudi sifarmyan ḇe Allah kuker nyan ḇekaku, inja ḇyewayam snonkaku Kristen sya. Ḇape ro ras oso, Yesus ḇeḇebawes kwar ani, dawos ro nanki murbaḇ ḇe Saul i. Rosai Saul ifrurya? Kuker sne ḇemarisen isma fafnoḇek ro manfamyan Kristen ḇenirḇe Ananias. Refo ikofen, ”Ikḇok ma isma masi sren.” (Farfyar 9:17, 18; Galatia 1:14) Inja, sifawi i ḇe Manwawan Paulus. Komam kada rofyor ifawi mnis kaku Allah iwan Yesus i fa ifrur marisen Ḇyena, fafisuya ḇeri Saul ḇyebaptis.​—Wasya Farfyar 22:12-16.

11. (a) Rosai ḇefrur fa snonkaku Kristen ro kirine sun snemuk fa sebaptis? (b) Rosai koḇaḇirna rofyor komam snonkaku oso ḇyebaptis?

¹¹ Rarirya kako kuker snonkaku ḇebor ḇefarkor Refo sya, ḇebabo ma ḇesinan kwar ro kirine sya. Snaro siswar ma sikyar faro rosai Refo ikofenna, inja sḇuk farsamsyom sena faro Yahwe ma sebaptis. Faya ḇaḇebaptis ima bar ḇefandun kaku ro munara kebaktian wilayah ma regional koḇedi. Saksi-Saksi Yahwe simarisen smam ḇefarkor Refo sya sisma napnapes ma sun snemuk fa sebaptis. Sinan sya kako siryaḇ kaku rofyor romawa sesya sakfrur roi ḇemnis. Ro swaf taun dinas 2017, snonkaku ḇebaptis babo sya sisyadi ro 284.000. Snonkaku ansine sifasnaḇair sḇuk farsamsyom sena faro Yahwe I kuker sebaptis. (Farfyar 13:48) Inja, ine fyasnaḇair snar sifawi kaku snonkaku Kristen sima fandun fa sebaptis. Ḇape, rosai na sifrurya insama sakḇebaptis?

12. Rosai fandun fa ḇefarkor Refoya ifrurna rofyor ḇyebaptis ḇaim?

¹² Rofyor ḇefarkor Refoya ḇyebaptis ḇaim, fandun fa ifarkor napnapes ro Allah I, marisen Ḇyena faro snonkaku ma supswan ine, ma rosai ifrurya fa fyaspar snonkaku sya. (1 Timotius 2:3-6) Ramnai fandun fa fyaduru kakyar ḇyena, na ḇefnoḇek i fa isouser Allah sasoser Ḇyena ma ifrur rosai Allah dayinna werḇa. (Farfyar 3:19) Roi ine ḇyefandun kaku snaro snonkaku oso ifrurker rosai Allah dayinna ido, nari Allah pyampumi. Ḇaido Allah kyaremso i ḇa. (1 Korintus 6:9, 10) Ḇape alasan ḇese nasya wer. Simarisen sḇuk farsamsyom faro Yahwe ido, fandun fa siso fananjur ya pdef, simyaren siḇaryas ankankinem ḇeḇye ma sifarkor snonkaku ḇesesya. Roi nane fandun fa sifrurna rofyor simarisen siso Kristus i. (Farfyar 1:8) Manfamyan oso ro randakya fandun fa ifrur roi nane. Ramnai ḇyuk farsamsyom ḇyedi faro Yahwe ro nadi mankun ḇyedi ma ḇyebaptis.

WAFNOḆEK FARKARKOR REFO BEDI FA ḆYEBAPTIS

13. Rofyor kofarkor snonkaku ḇesesya, rosai ḇefnai fa koswarepen snonkaku oso fandun fa ḇyebaptis fa ḇye snonkaku Kristen ḇekaku?

¹³ Rofyor kofnoḇek romawa koḇesya ma ḇefarkor Refo kuker ko sya fa sakfrur roi ḇefandun ine, fandun fa koswarepen mansei ḇemarisen ḇeso Yesus i fandun fa ḇyebaptis. Ma kopok komkak awer fa kokofen ḇesi fafisu oso fandun kaku sḇuk farsamsyom sena fa sebaptis. Komarisen romawa koḇesya ma snonkaku ḇefarkor Refo kuker ko sya sakmambir Yahwe I ma sebaptis!

14. Rosai ḇefnai fa kopok kodif awer snonkaku oso fa ḇyebaptis?

¹⁴ Kakuḇae, kopok kodif awer romawa sya ḇaido ḇefarkor Refo sya fa sebaptis. Yahwe mankundi idafdifer ko ḇa fa kofarmyan ḇe I. (1 Yohanes 4:8) Rofyor kofarkor ḇesesya ido, fandun fa kofnoḇek si insama sifaduru ḇaḇeoser sena kuker Yahwe I. Ma, rofyor ḇefarkor Refo ani ḇyesyowi kaku fawawi isma ro Allah ma imarisen ifrur rosai monda fandun fa snonkaku Kristen ḇekaku sifrurna ido, nari iso ḇeyun snemuk ro mankundi fa ḇyebaptis.​—2 Korintus 5:14, 15.

15, 16. (a) Snonkaku oso imbe ḇyebaptis ido, nari smam ro umur ḇyeja ke? Fasnaḇairpan. (b) Rosai ḇefnai fa ḇefarkor Refo oso fandun fa ḇyebaptis wer ḇe Saksi-Saksi Yahwe rofyor ḇyebaptis kwar ro agama ḇese?

¹⁵ Snonkaku oso imbe ḇyebaptis ido, na smam ro umur ḇyeja ḇa. Snaro snonkaku oso iḇese kuker ḇesesya, ma ḇefarkor Refo sya sino sifawi fasaw rosai sifarkorna ro ḇesesya. Naek srar ḇebor sya sebaptis rofyor sbabo kaker, ma sisya sisouser ḇesya kwar faro Yahwe rofyor semansar binsar kwar. Ḇesesya sifarkor Refo ma sebaptis rofyor sesinan kaku kwar. Sisya sebaptis rofyor seumur taun ri 100 syadi!

¹⁶ Bin oso ḇefarkor Refo ḇyebaptis ro agama ḇeḇeso kwar. Inja ifuken ḇe ḇebuk farkarkor Refo ḇe i mnuk ḇeḇeso ro Refo ḇekarem fakfuken ḇyedi. Rofyor bin ani ifawi rosai Refo fyarkorna ḇyebaptis, ma fafisu ani umur ḇyeja indokada taun ri 80. Rosai farkarkorya ḇeko? Yahwe imarisen koḇebaptis rofyor kofawi napnapes kuker marisen Ḇyedi kwar. Inja, fafisu iwara koḇebaptis kwar ro agama ḇesena ido, fandun fa koḇebaptis wer ḇe Saksi-Saksi Yahwe.​—Wasya Farfyar 19:3-5.

17. Rosai fandun fa snonkaku oso kyara ro ras ḇyebaptis ya?

¹⁷ Rofyor snonkaku oso ḇyebaptis, ima ras ḇeyun aski ma raryaḇ. Ro ras ani kako fandun fa kyara kaku rosai monda ḇeḇefesepen kuker farsamsyom ma ḇaḇebaptis. Fandun fa fyararur marḇak insama ḇyesnonkaku Kristen ḇekaku. Yesus manfamyan ḇyesya fandun fa, ”sikenem faro mankunsi ḇardi werḇa, mboi sikenem faro Kristus ḇemar kwar ma ḇyeḇeḇawes kaḇer wer snar fandun sena”.​—2 Korintus 5:15; Matius 16:24.

18. Fakfuken rosai nari kawos ro artikel ḇeuserya?

¹⁸ Rofyor kofarkor artikel ine, kofawi kun snemuk fa koḇe snonkaku Kristen ḇekaku nama roi ḇefarfnak ḇa. Iso ḇefnai fa Maria snari nya fakfuken-fakfuken ḇero randak artikel ine. Sinan risau ido, imbude na kwara, ’Romawa yedi fyasos i kwar fa ḇyebaptis ke? Romawa yedi myambir pyum kwar Yahwe I, inja imarisen ḇyuk farsamsyom ḇyedi faro Allah I ke? Fandun fa romawa yedi isma farkarkor ma fararur ḇepyum resari insape ḇyebaptis ke? Rariso fyor romawa yedi ifrur sasar ḇeba rofyor ḇyebaptis kwar?’ Nari kawos fakfuken nane ro artikel ḇeuserya, ma nari kofarkor rariso sinan Kristen sya sna kakara ḇeḇye kuker ḇaḇebaptis.