Nyan Ḇeyun ḇe Ḇaḇemkei Ḇekaku

1, 2. (a) Rosai snonkaku sya sifrur fa sismai ḇaḇemkei ya? (b) Bon rosai sismai ya?

BABOINE, snonkaku ḇero moḇ ḇebor ro supswan ine sawos rariso sna hak ḇemnis ma ḇaḇemkei ya. Sino sisya simarisen simkeibur ro frur pyum ḇa, mamam ḇesasar, ma saḇarar na. Ḇesesya wer simarisen simkei fa sikofenḇair kakara sena, skinfir, ma sikenem imnis marisen sena. Snonkaku ro moḇ nakam simarisen fa simkei.

² Inja, insama snonkaku sya sismai ḇaḇemkei, sifrur demo ma sembroḇ ḇepoik sya. Ḇape sismai kaku rosai simarisen na ke? Roḇa. Bon sismai ya iso kandera nabor ma marmarya. Raja Salomo wos ḇyena ro Pengkhotbah 8:9 nkaku ḇeri, ”Snonkaku sḇepoik snonkaku isof sismai kandera ro mankunsi.”

3. Rosai fandun fa kofrur insama kona kaku aski ma marisen ya?

³ Refo ikofenḇair ḇe ko rosai fandun fa kofrur insama kona kaku aski ma marisen ya. Manfamyan Yakobus doḇe, ”Mansei ḇekukeḇ sasoser ḇemnis anna isoine sasoser ḇeḇuk ḇaḇemkei faro snonkaku, ma ḇyenamu faḇyeuserna, . . . nari isma aski ro fararur ḇyena.” (Yakobus 1:25) Sasoser ḇemnis kaku ndramuma ro Yahwe I, ma ifawi pyum kaku rosai kofandun na insama kona kaku aski ma doryaḇ. Yahwe ḇyuk ḇaḇemkei ḇekaku ḇe Adam ma Eva su ma rosai sufandun nakam insama suḇeaski.

FAFISU SNONKAKU SYA SNA KAKU ḆAḆEMKEI

4. Ḇaḇemkei ḇemnis rariso Adam ma Eva susmai na? (Mam sonin ro randak artikel ine.)

⁴ Snonkaku ḇero baboine sya smander fa sismai ḇaḇemkei. Ḇape, rofyor kowasya ro Kejadian fasal ḇeḇe 1 ma 2, na kofawi Adam ma Eva susmai ḇaḇemkei anine kwar. Suna roi sufandun nakam, sumkak faro roi osoḇaḇeri, ma ono ḇefrur roi ḇeḇyeḇa faro su ḇa. Sumkakwarek faro roḇean, fararur, dafduf, ḇaido marmar na ḇa. (Kejadian 1:27-29; 2:8, 9, 15) Ḇape, ḇaḇemkei suḇenane naba syadi ke? Rwama komame.

5. Iḇese kuker rosai snonkaku sya skara na, rosai snonkaku sya sfandun insama sna ḇaḇemkei ya?

⁵ Snonkaku ḇebor sya soḇerada insama sna ḇaḇemkei ḇekaku ya, sifrur rosai monda simarisen na ḇoi sfandun ḇa faro rosai nari ḇekur si. Syap The World Book Encyclopedia doḇe ḇaḇemkei iso ”samambraḇ fa kokinfir ma kofrur mnis rosai kokinfir na.” Ḇape, syap ine ikofen kako snar snonkaku nari simkei rofyor ḇepoik sya sḇepoik si kuker nyan ḇenapes, ḇefandun, ḇaido ḇesamswen ḇa. Ine nfasnaiḇair snonkaku sya sfandun sasoser ḇekin si insama sna ḇaḇemkei. Ḇape, manseiso ḇena hak fa ḇeḇuk sasoser ḇenapes, ḇefandun, ma ḇesamswen ḇa?

6. (a) Rosai ḇefnai fa Yahwe derer monda ḇena ḇaḇemkei ḇeba syadi? (b) Snonkaku sya sna ḇaḇemkei ḇemnis rariso, ma rosai ḇefnai ya?

⁶ Fandun fa koswarepen kaku snar Allah Yahwe I monda ḇena ḇaḇemkei ḇeba syadi ma ḇekaki syadi. Rosai ḇefnai ya? Snaro iso ḇefrur roi nakam ma iso Manḇepoik ro supswan ma farsyos ḇesiper ine. (1 Timotius 1:17; Fasasna Faro Yohanes (Wahyu) 4:11) Raja Daud ḇyuk wos ḇepyum kaku fa fyasnaiḇair Yahwe nasan Ḇyedi. (Wasya 1 Tawarikh 29:11, 12.) Imbape, ḇekenem ro nanki ma supswan sya sna ḇaḇemkei mankun ḇa. Ine iso ḇaḇemkei ḇesyadi ḇa. Allah Yahwe imarisen kofawi snar derer monda ḇena hak fa ḇeyap sasoser ḇenapes, ḇefandun, ma ḇesamswen ḇa. Ro randak Yahwe ifrur ḇraur Ḇyesi, ḇyuk sasoser ḇedwarek si.

7. Roi ḇeḇeso rosai fandun fa kofrur insama nun marisen ḇe ko?

⁷ Adam ma Eva suna ḇaḇemkei nabore, ḇape ḇaḇemkei suḇena nasyadi ḇa. Sasoser ḇedwarek su namnis faro su. Imnis raris, fandun fa suknaref, sunan, ma suyenef insama sukenem pdef. Nane nfasnai suna ḇaḇemkei noḇa ke? Roḇa. Ḇekaku ya, Yahwe fyawi kaku sufrur rarirya ido nari susmai marisen ma doryaḇ. (Mazmur 104:14, 15; Pengkhotbah 3:12, 13) Kokam komarisen kaku rofyor kun wambeso pyum, kan roḇean komarisen na, ma kenef pyum ro roḇ ya. Samswen fa kofrur roi nane ḇa. Adam ma Eva na suyakḇaḇir rarirya kako.

8. Parenta oso rosai Allah ḇyuk faro Adam ma Eva su, ma rosai ḇefnai ya?

⁸ Yahwe ḇyuk parenta oso faro Adam ma Eva su. Ikofenḇair ḇe su fa sukapar pampam, sibor ro supswan, ma sumamwarek na. (Kejadian 1:28) Parenta ine nun ḇaḇemkei suḇena bur su ke? Oroḇaḇeri! Ine nbuk swaf faro su fa sufrur supswan ine ḇe firdaus, moḇ suḇarek roya isof fyoro fnoḇek romawa suḇesya ḇe snonkaku ḇenapes. Ine iso Allah marisen Ḇyedirya. (Yesaya 45:18) Baboine, rofyor snonkaku sya skinfir fa sfarḇuk ma sna romawa ido, ine kyurfasna ḇa snar sisouser faro Allah ḇa. Na sismai samswen, ḇape bisa sfarḇuk kaker ma sna romawa. (1 Korintus 7:36-38) Rosai ḇefnai ya? Snar sikyar nari sismai aski ma marisen. (Mazmur 127:3) Adam ma Eva susouser Yahwe I kada, na suna marisen ro farḇakḇuk ma kina suḇedi isof fyoro-fyoro.

RARISO ḆAḆEMKEI ḆEKAKU YA IPROMES KWAR?

9. Rosai ḇefnai fa parenta ro Allah ḇero Kejadian 2:17 ima inapes, fyandun, ma syamswen ḇa?

⁹ Yahwe ḇyuk parenta ḇese wer faro Adam ma Eva su ma ikofenbos ḇe su rosai nari ḇekur su rofyor susouser parenta ani ḇa. Doḇe, ”Ḇape bon ro aiknam fawawi kuker roi ḇeḇye ma roi ḇeḇyeḇa wapok wan awer i, snaro ro ras wan i, nari wamar ḇeri.” (Kejadian 2:17) Parenta ine inapes ḇa, fyandun ḇa, ḇaido syamswen ke? Roi ine nafnai fa Adam ma Eva suna ḇaḇemkei werḇa ke? Oroḇaḇeri. Ḇekaku ya, sarjana Refo ḇebor sya skara Allah parenta ḇyenane napyum ma nsamswen ḇa. Oso ro si ikofen ḇo doḇe parenta ani fyarkor ko snar ”Allah I monda ḇefawi roi ḇeḇye . . . faro snonkaku sya ma Allah derer monda ḇefawi roi ḇeḇyeḇa . . . faro si. Insama snonkaku sya sismai roi ’ḇeḇye’, fandun fa sikyar ma sisouser faro Allah. Sisouser ḇa ido, nari Allah myam monda si fa skinfir ro mankunsi faro roi ḇeḇye . . . ma roi ḇeḇyeḇa na.” Inema roi ḇesamswen kaku ḇe snonkaku sya fa sifrur ro mankunsi.

10. Rosai ḇefnai fa ḇaḇemkei fa kokinfir ima iḇese kuker hak fa kap roi ḇeḇye ma ḇeḇyeḇa na?

¹⁰ Snonkaku ḇeḇeso soḇerada Yahwe ḇyuk ḇaḇemkei ḇa faro Adam i fa ifrur rosai monda imarisen na. Ḇape, sifawi ḇaḇeri snar ḇaḇemkei fa skinfir rosai imbe sifrur ya, ima iḇese kuker hak fa ḇeyap roi ḇeḇye ma roi ḇeḇyeḇa na. Adam ma Eva suna ḇaḇemkei fa sukinfir imbe susouser faro Allah I ke roḇa. Ḇape, Yahwe derer monda ḇena hak fa ḇeyap roi ḇeḇye ma ḇeḇyeḇa na. ”Aiknam fawawi kuker roi ḇeḇye ma roi ḇeḇyeḇa” nfasnaiḇair roi nane ḇe Adam ma Eva su. (Kejadian 2:9) Na kopok kofawi ker bon rosai nari kosmai ro rosai kokinfir na. Ma kofawi mnis ḇa nari kosmai bon ḇepyum pdef ke roḇa. Iso ḇefnai fa, na komam ker snonkaku ḇekinfir ḇaido ḇeyun snemuk kuker swaruser ḇepyum, roi skinfir na nun kandera, roi ḇemun, ḇaido fafardun kako. (Amsal 14:12) Kaku ḇeri, snonkaku sya sna samambraḇ mankun ḇa fa sifrur roi nakam. Rofyor Yahwe iwan Adam ma Eva su fa suyan awer bon ro aiknam ani, fyarkor su fa sufawi snar insama suna ḇaḇemkei ḇekaku ido fandun fa susouser faro I. Rosai Adam ma Eva sukinfir fa sufrur ya?

11, 12. Rosai ḇefnai fa Adam ma Eva snemuk suyun anna nun roi ḇemun? Fasnaiḇair na.

¹¹ Faḇye kaku, Adam ma Eva sukinfir fa susouser faro Yahwe I ḇa. Eva kyinfir fa ryower Setan wos ḇyena, ”Mumkamna nari nbas ma nari mumnis Allah, mufawi roi ḇeḇye ma roi ḇeḇyeḇa na.” (Kejadian 3:5) Adam ma Eva kankinfir suḇenane nun ḇe ḇaḇemkei ḇeba syadi raris rosai Setan ikofen na ke? Roḇa, rariryaḇa. Ḇekaku ya, suma sufawi kwar supampum Yahwe farkankin Ḇyena nari nun ḇe roi ḇemun. (Kejadian 3:16-19) Rosai ḇefnai ya? Snar Yahwe ḇyuk ḇaḇemkei ḇe snonkaku sya ḇa insama sap ro mankunsi roi ḇeḇye ma ḇeḇyeḇa na.​—Wasya Amsal 20:24 ma catatan kaki; Yeremia 10:23.

¹² Ine imnis ra pilot oso ḇeyun pesawat. Insama dun pyum pesawat ani ḇe moḇ imbe ryayoḇ ya, na iso rute ḇyena. Ḇyuk alat navigasi ḇero pesawat ani ma dawawos kuker ḇefara i ro ḇande sya. Ḇape pilot ani iso akurfasna anna ḇa ḇoi iso marisen ḇyena monda ido, ine nari nun roi ḇemun. Raris pilot ani, Adam ma Eva sumarisen sufrur roi nakam imnis marisen suḇena. Supampum Allah farkankin Ḇyena. Bon rosai susmai ya? Ine nun sasar ma marmar faro su ma romawa suḇesya kam. (Roma 5:12) Fafisu Adam ma Eva suyun snemuk ro mankunsu kuker roi ḇeḇye ma ḇeḇyeḇa na, suna ḇaḇemkei ḇeba syadi ḇa. Imbape, ḇaḇemkei ḇekaku Yahwe ḇyuk kwar faro su na napromes.

NYAN FA KONA ḆAḆEMKEI ḆEKAKU YA

13, 14. Rariso insama kona ḇaḇemkei ḇekaku ya?

¹³ Snonkaku ḇeḇeso soḇe sna ḇaḇemkei ḇeba syadi ido na ipyum kaku. Ḇape nkaku rarirya ke? Kona ḇaḇemkei nama nbuk fainda nabore, ḇape kwarapan moḇsa dunya ine na ḇyerai rofyor sasoser oso nadwarek si ḇaḇeri? Syap The World Book Encyclopedia doḇe sasoser sifrur faro kawasa sya syamswen snar sasoser ani kyadaunwarek si monda ḇa mboi idwarek ḇaḇemkei sena kako. Inema roi ḇepyan risyaḇa. Iso ḇefnai fa komam kada, sasoser nabor naisya, pengacara, ma mankara sibor sisewar fa sfasnaiḇair sasoser anna ma sisouser na.

¹⁴ Yesus ikofenḇair ḇe ko nyan fa kona ḇaḇemkei ḇekaku ya. Doḇe, ”Rofyor mkokin nako wos ayena, rarirya mkoḇe manfamyan kaku ḇe aya ma nari mkofawi napnapesya ma napnapesya nari ḇyuk ḇaḇemkei faro mko.” (Yohanes 8:31, 32) Inja, insama kona ḇaḇemkei ḇekaku ya, kofandun roi risuru. Oser ya, fandun fa kokyar faro napnapes Yesus fyarkor ḇe ko na. Ḇesuru ya, fandun fa koḇe manfamyan ḇyedi. Kofrur roi risuru suine ido nari kona ḇaḇemkei ḇekaku ya. Ḇape nari komkei ro rosairi? Yesus doḇe, ”Snonkaku ḇefrur sasarsya, nari [sḇewomen] faro sasarya.” Ikofen wer, ”Rofyor Rumkunya ḇyuk ḇaḇemkei faro mko, kaku ḇeri nari mkoḇe mkei.”​—Yohanes 8:34, 36.

15. Rosai ḇefnai fa ḇaḇemkei Yesus ḇyeasas anna nafrur fa kona kaku ḇaḇemkei ya?

¹⁵ Ḇaḇemkei Yesus ḇyeasas faro manfamyan ḇyesine ipyum syadi ro ḇaḇemkei snonkaku ḇero baboine simarisen na. Fafisu Yesus doḇe, ”Rofyor Rumkunya ḇyuk ḇaḇemkei faro mko, kaku ḇeri nari mkoḇe mkei”, inema dawosḇair ḇaḇemkei ro women faro sasarya. Iso ḇaḇewomen ḇeḇyeḇa kaku ro snonkaku sya sismaina. Moḇsa koḇewomen faro sasarya rai? Sasarya nafnai fa kofrur roi ḇeḇyeḇa na. Sasarya kako idwarek ko fa kofrur roi ḇenapes ma idwarek ko fa kofrur roi ḇepyum syadi ya. Bon kosmai ya iso kofafko, kodufe, koḇekandera ma muniwara komar. (Roma 6:23) Manwawan Paulus ḇyaḇir ḇyekandera fafayaḇa snar ḇyewomen faro sasarya. (Wasya Roma 7:21-25.) Fafisu sasarya neḇepyos monda insape na kosmai ḇaḇemkei ḇekaku raris rosai Adam ma Eva susmai anya.

16. Rariso kona kaku ḇaḇemkei ḇekaku ya rai?

¹⁶ Yesus wos ḇyena ”rofyor mkokin nako wos ayena”, nane nfasnaiḇair komarisen Yesus ḇyuk ḇaḇemkei ḇe ko ido, fandun fa kofrur roi oso. Rosairirya? Snar koḇebaptis kwar ḇe manfamyan faro Yesus i, kofamyun mankunko ma komarisen Yesus sasoser ḇyena nfarkin ko. (Matius 16:24) Raris Yesus ḇyeasas kwar, ro fafisu iyama nari kona kaku ḇaḇemkei rofyor kun fainda nakam ro Yesus marmar ḇyedi.

17. (a) Rariso na kona kaku aski ma marisen ya rai? (b) Rosai na kofarkor ro artikel ḇerama ya wer?

¹⁷ Insama kona kaku aski ma marisen, fandun fa Yesus manfamyan ḇyesi koine kosouser farkarkor ḇyena. Kofrur rarirya ido, nari kona kaku ḇaḇemkei ro sasar ma marmarya. (Wasya Roma 8:1, 2, 20, 21.) Ro artikel ḇerama ya, nari kofarkor moḇsariso koḇuk ḇaḇemkei koḇena kuker fawinanem. Rarirya nari koḇesyowi Yahwe, Allah Knam ro ḇaḇemkei ḇekaku ya isof fyoro-fyoro.