Fasnai Pdef Saswar​—Iso Ḇesambraḇser Snonkaku Ḇesesya

1. Roi ḇefandun kaku rosai Yesus dawos ro roḇ ḇepupes rofyor kyainus manfamyan ḇyesya?

RO ROḆ ḇepupes rofyor Yesus imar ḇaim, kyainus manfamyan ḇyesya, dap saswarya indokada rarwan ri 30. Ikofen ḇe si fandun fa ’siswaryae si’. (Yohanes 15:12, 17) Fandun fa saswar sena nasnaibos kaku insama snonkaku ḇesesya na smam ma sifawi sima Yesus manfamyan ḇekaku ḇyesirya. (Yohanes 13:34, 35) Saswar Yesus dap anya ima roi koḇaḇir ro sne monda ḇa. Mboi ine rari ḇepok kaku ma ḇefandun mankun ḇa nairi. Yesus doḇe, ”Snonkaku ḇeswar syadi bati ḇyesi isoine, snonkaku ḇeḇuk kankenem ḇyedi faro bati ansi. Bati ayesiso mko, rofyor mko frur rosai yasoser faro mko.”​—Yohanes 15:13, 14.

2. (a) Moḇsa Allah manfamyan Ḇyesya sifawi si ro baboine rai? (b) Fakfuken risai nari kokarem ro artikel ine?

² Yahwe manfamyan Ḇyesya ro baboine, sifawi si snar sna saswar ḇekaku ḇefandun mankun ḇa ma sḇeoser. (1 Yohanes 3:10, 11) Sfandun ḇa faro er ḇaido keret sedi, wos risai sḇukidawos ya, moḇ srama ya, ḇaido moḇ siba ro na. Ro supswan ḇesiper ine, Yahwe manfamyan Ḇyesya siswaryae kaku si. Rosai ḇefnai fa saswar iso roi ḇefandun kaku ro baboine? Rariso Yahwe ma Yesus susambraḇser ko kuker saswarya? Ma rariso na kofasnai saswar ine fa koḇuk sneprei ma kosambraḇser ḇesesya rai?​—1 Korintus 8:1.

SASWAR ISO ROI ḆEFANDUN KAKU RO BABOINE

3. Rariso kankenem ro ”ras ḇepupes” ine nawyae snonkaku sya rai?

³ Kokenem ro ’ras ḇepupes’, inja kankenem koḇena ”nafo kuker samswen ma kandera”. (2 Timotius 3:1-5; Mazmur 90:10) Snonkaku sibor sekandera fafayaḇa, ine nafnai fa skara ipyum ya simar mura. Taun oser monda snonkaku sisyadi ro 800.000 smun mankunsi. Ro swaf detik ri 40, snonkaku oser imar wer. Mboi faḇye, naek srar koḇansi sisya kako sakḇaḇir roi ḇeradine ma smun mankunsi.

4. Mansei Allah manfamyan Ḇyesi ro fafisu ono skara imbe simar monda?

⁴ Ro awar Refo naiwara, Allah manfamyan ḇeḇeso Ḇyesi sekandera snar samswen ḇekur si, inja skara imbe simar mura. Raris Ayub i, rofyor ḇyekandera, ikofen ḇo doḇe, ”Yayin kenem ayedine. Yamewer yakenem pdef indi.” (Ayub 7:16; 14:13) Yunus fyafko rawo, inja ikofen, ”Kirine, sye Yahwe, wun nyawa yedine mura. Ipyum syadi yamar ro yakenem.” (Yunus 4:3) Nabi Elia ḇyaḇir syambraḇ werḇa ḇo doḇe, ”Iḇye kwar mura! Sye Yahwe, wun nyawa yedine mura.” (1 Raja-Raja 19:4) Ḇape, Yahwe iswar manfamyan Ḇyanskoine ma imarisen skokenem. Yahwe ḇyemankara moḇ skokara raya ḇa. Imbape, ifnoḇek sko fa skoryaḇ kaḇer fa skokenem ma skofarmyan pdef ḇe I kuker soasuser.

5. Rosai ḇefnai fa naek srar koḇesi ḇero baboine sfandun kaku saswar koḇena?

⁵ Baboine, naek srar koḇesi sibor sismai fafisu ḇesamswen ma sfandun saswar koḇena. Sino sisya sanonef si ḇaido sewayam si. Sino wer sifnak ker si ḇaido sfawar famfnom si ro moḇ sfararur ya. Oroḇaido simbrus snar sfararur kawan kaku ḇaido fararur sena nafrur fa sibrusna nadufe. Ḇesesya wer sna samswen ḇero kina yadori. Imbude sfarḇuk kuker snonkaku ḇefarmyan ḇe Yahwe I ḇa ma sawos nabor si ker. Roi nane ma samswen ḇesena, nafnai fa ḇebor sya sḇaḇir sisambraḇ werḇa ma sikyar mankun ḇa faro kakakyar sena. Mansei na ḇefnoḇek si?

YAHWE SASWAR ḆYEDI SYAMBRAḆSER KO

6. Moḇsa Yahwe syambraḇser manfamyan Ḇyesya rai?

⁶ Yahwe ḇyuk kakakyar ḇe manfamyan Ḇyesya snar iswar si ro kirine isof fyoro. Kokarapan moḇsa snonkaku Israel sya sḇaḇir rai rofyor Yahwe ikofen yoḇ si, ”Mkoma mkoḇemaeja ro mkamor Yedi, mkoma mkoḇesyowi, ma Yaswar mko. . . . Mkomkak awer, snar Yarous mko!” (Yesaya 43:4, 5) Kokam kofawi koma koḇemaeja ro Yahwe ḇarpon Ḇyedi.a (Mam fasfas kasun ro sop.) Refo doḇe, ”Ḇye Mambri ḇesambraḇ, nari fyaspar mko. Snar mko iso nari iryaḇ kaku.”​—Zefanya 3:16, 17.

7. Rariso Yahwe saswar Ḇyedi imnis raris sna ḇefarasrus kapira ḇyedi rai? (Mam sonin ro randak artikel ine.)

⁷ Yahwe ḇyeasas na syambraḇser ma ḇyuk sneprei ḇe kawasa Ḇyesya ro samswen sairirya ḇekur si na. Doḇe, ”Nari mkinem sus ma yaforaḇen mko, ma nari yaḇefaran mko ro fasasyus. Raris sna oso ḇyuk saneprei ḇe romawa ḇyedi, nari yaḇuk saneprei faro mko pdef”. (Yesaya 66:12, 13) Kokarapan kada, kapira oso nari imkak ḇa fafisu snari fyoraḇen i ma ifnakus i! Yahwe iswar Au kaku ma imarisen insama wamkak ḇa. Wakyar kaku snar Auma ḇesyowi kaku ro Yahwe mamam Ḇyedi.​—Yeremia 31:3.

8, 9. Moḇsa Yesus saswar ḇyena nsambraḇser ko rai?

⁸ Roi ḇese wer ḇefnai fa kofawi Yahwe iswar kaku ko iso, ”Snar Allah saswar ḇyedi ibabos faro supswan ine, isof ḇyuk kwar Rumkun Mandos ḇyedi, insa snonkaku ḇekyar faroi sya sroḇa, mboi sisma [kankenem fyoro].” (Yohanes 3:16) Yesus farsarser ḇyeja fyasnai iswar kaku ko, ma saswar ḇyedine nsambraḇser ko. Refo ikofen, iba syadi kandera roḇaido samswen na napok ”nadwarek Allah saswar ḇyuk mabekonyaḇa, imnis fyasna kwar ro Yesus Kristus”.​—Roma 8:35, 38, 39.

⁹ Fyorno ido, samswen kosmai na nafnai fa baken ma sne koḇena naprei ḇa ḇaido koryaḇ werḇa ro fararmyan ḇe Yahwe I. Ḇape rofyor koswarepen Yesus iswar kaku ko ido nari nsambraḇser ko fa kofarmku pdef. (Wasya 2 Korintus 5:14, 15.) Yesus saswar ḇyena nbuk raryaḇ ḇe ko fa kokenem ma kofarmyan pdef ḇe Yahwe I. Na nafnoḇek ko fa kosusu ḇa, iba syadi rofyor koḇekandera snar rim ḇeba, ḇaḇewayam, fafafko, ḇaido makakwarek.

NAEK SRAR KOḆESI SFANDUN SASWAR KOḆENA

10, 11. Mansei ḇena fakamamar fa ḇesambraḇser naek srar ḇesanekar sya? Fasnaiḇairpan.

¹⁰ Yahwe ḇyuk sidang kako fa syambraḇser ko kuker saswar Ḇyedi. Koswar naek srar koḇesi ido, kofasnai koswar Yahwe I. Na kofrur rosai monda fa kofnoḇek naek srar koḇesi insama sakfawi sima sḇesyowi kaku ma Yahwe iswar si. (1 Yohanes 4:19-21) Manwawan Paulus fyas, ”Rarirya mkanunyae mko ma mkosonemyae mko, imnis moḇ mkofrur ro baboine raya.” (1 Tesalonika 5:11) Penatua sya serer monda na ḇefrur roi ine ḇa. Kokame bisa koso Yahwe ma Yesus nyan suḇena fa koḇuk sneprei faro naek srar koḇesi.​—Wasya Roma 15:1, 2.

¹¹ Ro sidang, naek srar sino sisya sekandera snar makakwarek ḇesyadadi ma skara mankenem kenem sena rawo siḇrusna naduf kaku, imbude sfandun fafnoḇek ro dokter indi. (Lukas 5:31) Kofawi penatua ma ḇesesya ro sidang sima dokter risyaḇa, mboi fafnoḇek ma saneprei sḇuk faro naek srar ḇeradine sya nefandun kaku. Naek srar ḇero sidang syakam bisa ’sawos sneprei faro ḇefafardunsya, sisanowarek ḇeryarḇasya, sikḇaḇ faro snonkakusya kam’. (1 Tesalonika 5:14) Rarirya, komarisen kosewar kaku fa kofawi pyum moḇsa naek srar koḇesya sḇaḇir rai. Fandun fa kokḇaḇ faro si ma kawos wos ḇeyun sneprei faro si rofyor sesanekar. Inja, Ausya swewar fa swambraḇser naek srar ḇesesya ke? Rosai nari wafrur insama buk sneprei ma swambraḇser syadi si wer?

12. Fawarpan moḇsa imbesrar oso sidang iryur ro ya syambraḇser i kuker saswar rai.

¹² Imbesrar oso ro Eropa doḇe, ”Fyorno ido yakara yaḇe yamun mankundaya, mboi yasmai fafnoḇek. Sidang yaryur ro ya ifnoḇek aya fa yafrur roi yakara na ḇa. Naek srar sya sfasnai saswar ma sisambraḇser aya ḇesya kwar. Ḇeḇeso monda ḇefawi yasmai depresi, mboi sidang ifnoḇek aya ḇesya kwar. Imbeswa oso sumnis ra sinan rohani ḇe aya. Sumamfaduru aya, ma suisya pdef ro ras ḇesiper rofyor yafandun su.” Kakuḇae, snonkaku syakam ḇa na sḇuk fafnoḇek ḇemnis. Ḇape kokame bisa kofrur nabor syadi fa kosaramper naek srar koḇesi.b (Mam fasfas kasun ro sop.)

NYAN KOSAMBRAḆSER ḆESESYA KUKER SASWAR

13. Rosai fandun fa kofrur insama kosambraḇser ḇesesya?

¹³ Korower pyum si. (Yakobus 1:19) Kofasnai saswar rofyor korower pyum. Kofasos pyum fakfuken ido nari nafnoḇek ko fa kofawi pyum rosai snonkaku sya sḇaḇir na. Nari sifawi kofandun kaku si, iba syadi fyor smam ro komkasna. Fafisu sikofenḇair rosai sḇaḇir na, korower kuker kaḇaḇaḇ ḇo kosunuk wos sena awer. Korower pyum ido, nari kofawi mnis si ma kofnoḇek si fa sikyar ko. Mura na napyan faro si fa sakrower rosai kokofen na. Koswar kaku snonkaku ḇese ido, na jadi fa kofrur nabor syadi fa koḇuk sneprei faro si.

14. Rosai ḇefnai fa kawos pampum snonkaku ḇesesya awer?

¹⁴ Kawos pampum awer. Snonkaku ḇe depresi oso na fyafardun syadi fyor kyara koisya kawos pampum i. Rarirya ido, na samswen kaku fa kofnoḇek i. ”Wos skara ḇa na namnis wawankir ro sumber, mboi ramar ro snonkaku ḇefawinanem ḇyuk pararei.” (Amsal 12:18) Kakuḇae, na komewer kofrur snonkaku ḇe depresi ani fa sneri idufe. Ḇape, kawos ḇo kokara ḇepon wos koḇena ḇa ido, nari nafnai fa ḇyefafardun syadi wer. Insama koḇuk kakakyar ḇe i, fandun fa kofrur insama fyawi koma kosewar kaku fa komambir roi ḇekur i na.​—Matius 7:12.

15. Roi ḇepon syadi rosaiso na ḇefnoḇek ko fa koḇuk sneprei faro ḇesesya?

¹⁵ Koḇuk Allah Wos Ḇyena fa kofrur sneprei ḇesesya. (Wasya Roma 15:4, 5.) Refoya ryamuma ro Allah ḇeḇuk ”ḇaḇekaḇaḇ ma sneprei”, inja na kosmai saneprei kaku ro wos ḇero dori na. Kona kako Indeks Publikasi Menara Pengawal ma Panduan Riset untuk Saksi-Saksi Yehuwa. Koḇuk roi ḇeḇefasos nane ido, na kosrow mnuk ma publikasi fa koḇuk sneprei ma wos samambraḇ faro naek srar koḇesi.

16. Rari rosai monda na ḇefnoḇek ko fa kosambraḇser snonkaku ḇe depresi sya?

¹⁶ Kofasnai sawarwar ma ḇaḇeaḇaḇen. Yahwe iso ’Kma sneḇeḇye, Allah ḇeḇuk samambraḇ sne’ ma nya ”ḇaḇenaḇye ma saswar” faro manfamyan Ḇyesi. (Wasya 2 Korintus 1:3-6; Lukas 1:78; Roma 15:13) Paulus ḇyuk nyan ḇepyum ro roi ine snaro dakso Yahwe nyan Ḇyena. Fyas, ”Ḇape nkoḇeaḇaḇen mko, imnis sna oso fyarus ma fyaduru romawa ḇyedi. Rarirya kako, nkoswar naba faro mko, inja nkomarisen nkoḇerwas Allah Ankankinem Ḇeḇye ḇyedi monda faro mkoḇa, ḇape kankenem nkoḇena ḇardi kako kuker mko, snar nkoswar mko kwar.” (1 Tesalonika 2:7, 8) Kosawarwar raris Yahwe ido, na koḇuk saneprei faro si imnis rosai sor ro nadi sena!

17. Rariso kona kakara ḇemnis faro naek srar koḇesi na nafnoḇek ko fa kosambraḇser si rai?

¹⁷ Kokara awer naek srar na sifrur sasar ḇa. Fandun fa kona kakara ḇemnis. Kokara naek srar sya na sifrur roi ḇenapes ḇesya kwar ido, nari kofafko. (Pengkhotbah 7:21, 22) Koswarepen Yahwe ima dor syadi ro samambraḇ koḇena ḇa. Inja, fandun fa kokḇaḇyae ko. (Efesus 4:2, 32) Komewer kofrur naek srar koḇesi skara sima sifrur nabor ḇa ḇaido koḇukimamkara si kuker ḇesesya. Imbape, kosambraḇser si ma komam roi ḇepyum sifrur kwar na. Ine na nafnoḇek si fa sḇeaski ro fararmyan sena ḇe Yahwe I.​—Galatia 6:4.

18. Rosai ḇefnai fa kosambraḇser ḇesesya kuker saswarya?

¹⁸ Yahwe iswar kaku manfamyan Ḇyesi kam ma Yesus i kako dakswar si. (Galatia 2:20) Koswar kaku naek srar koḇesya, inja fandun fa kofrur pyum si. Refo doḇe, ”Rarirya komarisen kokenem ro ḇaḇeoser ma kofarkoryaye ko.” (Roma 14:19) Kowaf kaku fa kokenem ro Firdaus, fafisu roi osoḇaḇeri nafnai fa snonkaku oso ḇyesanekar! Dafduf ma mamamun nari naisya rodiwa ḇa. Snonkaku sya nari simar werḇa snar sasarya, ma ḇaḇewayam, samswen ro kina yadori, ḇaido fafafko naisya werḇa. Ro papupes ḇaḇepapoik taun syaran oser, snonkaku syakam na sinapes kaku. Snonkaku ḇesoasuser pdef ro fafrowes ḇepupes ya nari seḇekanow ḇe Yahwe romawa Ḇyesi ro supswan ma nari sismai ”ḇaḇemkei fnoḇek Allah romawa ḇyesi ro baba siḇe sismaya”. (Roma 8:21) Rarirya, kokame kofasnai saswar ḇesambraḇser ḇesesya ma kofnoḇekyae ko fa kosun ro dunya babo ḇepyum Allah Ḇyedi.