Refo Naser Angginem Ḇeramuma ro Manseren Allah faro Ko

Yahwe byuk roi ḇepyum kaku ḇe ko, isoine Refo ya. Refo ya iser syap ri 66 ma siryur na fa nasnai ḇe syap oser. Imbude wafuken radine: ’Refo ine ryamuma ro? Mansei kakara ḇyena sfas ro Refo ya?’ Insama kokarem fakfuken suine, rwama kawos moḇsariso Manseren Allah angginem Ḇyena ro Refo bisa kofawi na rai.

1. Snonggaku siso ḇefas Refo ya ido, rosai ḇefnai fa koḇo ryamuma ro Allah?

Ḇefas Refo ya iso snon ri 40 ma sfas na ro swaf taun ri 1.600 syadi, isoine ro taun 1513 MḆ isof ro taun 98 M. Manfasfas ansine sramaker moḇ ḇesisye ma suf fararur sena naḇesisye kako. Imnis ra, sia sisya se manfarandows, mandaswan, ma sia wer se raja. Rarirya mboi, roi sfas na naḇesisye ḇa. Rosai ḇefnai fa naḇesisye ḇa? Kukro Refo ima Manseren Allah wos Ḇyenairi. (Kowasya 1 Tesalonika 2:13.) Manfasfas ansi sfasepen kakara manggun sena ḇa. Imbape, ’kuker dafdif ro rur ḇesren sawos kuker snonsnon Allah’.a (2 Petrus 1:21) Manseren Allah byuk rur ḇesren Ḇyeja fa fyarkin, ḇaido idif snonggaku ansya fa sfasepen kakara Ḇyena.​—2 Timotius 3:16.

2. Mansei monda na ḇesmai payamyum ro Wos Refo ya?

Manseren Allah doḇe snonggaku ḇerama ro ”er oser-oser, keret, wos, ma kawasa” nari sismai payamyum ro angginem ḇepyum ro Wos Refo ya. (Kowasya Fasasna [Wahyu] 14:6.) Baboine, Refo naisya kwar ro wos ḇebor isyadi ro syap-syap ḇesena. Kero kada snonggaku syakam ḇeḇarek ro moḇ risai monda ma wos risai sbukidawos ya, bisa siwasya Refo ine.

3. Moḇsa Yahwe myamwarek Refo ya fa isya isof ro baboine rai?

Sifrur syap ḇeniw fa sbukifas Refo ya ro roi ḇepokem fasaw. Sifrur na ro aiwan kif ma rokaker sor ḇe papirus. Imboi snonggaku ḇesyowi Refo sya, sfas kaḇer fasfas ro Refo na fa namnis. Snonggaku ḇepoik ma manfarkin agama sya sisewar marmar kaku insama Refo ya ipromes. Imbape sia wer simarisen simar fa skadaunwarek Refo ya. Yahwe imewer kaku snonggaku ḇaido roi oso nadwarek I fa ikofenḇair angginem Ḇyena faro ko. Refo ya doḇe, ”Allah koḇedi wos Ḇyena naisya pdef isof fyoro-fyoro.”​—Yesaya 40:8.

SWEWAR KAKU WER

4. Refo fyasnai angginem ḇero dori ndramuma ro Manseren Allah

Komam VIDIO. Ma kowasya 2 Timotius 3:16, raimnai kawos fakfuken suine.

VIDIO: Karkara Manseiso Ḇero Refoya?—Ḇeknampu (2:48)

• Snonggaku siso ḇefas Refo ya kurḇei, rosai ḇefnai fa sor Refo ya ḇe Manseren Allah Wos Ḇyena?

• Wakyar Manseren Allah bisa ikofenḇair kakara Ḇyena faro manfasfas sya ke?

5. Sisewar marmar insama Refo ya ipromes, fama isya pdef

VIDIO: Sesyowi Kaku Refo ya—Ḇeknampu (William Tyndale) (6:17)

• Mam kwar moḇsa snonggaku ansi sisewar marmar kaku fa skadaunwarek Refo ya, inja wamarisen syadi fa wawasya Refo ya ke? Kwarem rarirya kukro?

Kowasya Mazmur 119:97, raimnai kawos fakfuken ine:

• Rosai ḇedif snonggaku ḇebor sya fa sifrur Refo ḇe wos ḇese ma sirwas na wer?

6. Syap faro snonggaku syakam

Ro fyor iwara isof ro baboine, Refo iso syap sifrur ro wos ḇebor ma sirwas na kwar. Kowasya Farfyar 10:34, 35, raimnai kawos fakfuken suine:

• Rosai ḇefnai fa Manseren Allah imarisen insama sifrur Wos Refo na ḇe wos ḇebor ma sirwas na wer?

• Rosai ḇefrur Au fa besyowi Wos Refo ya?

FARKARKOR ḆYENA

Refo ima Allah Wos Ḇyena, ma myam kaku insama snonggaku syakam bisa siwasya na.

Waswarepen Kaḇer

• Moḇsa Allah fyarkin snon riḇeḇeso fa sfas Refo ya rai?

• Rosai ḇefrur fa wamanen kaku Refo ine?

• Wafawi kwar Manseren Allah syewar kaku fa ikofenḇair angginem Ḇyena ḇe Au, inja moḇsa ḇaḇir rai?

SWEWAR NABOR WER

Refo ismai roi ḇedwarek ḇeba ri kyor, fama isya pdef.

”Refo—Syap Ḇesmai Roi Ḇedwarek” (Syap Baryas No. 4 2016)

Mam snonggaku sia sifawi nari smun si kukro sifrur Refo ḇe wos ḇese, fama sisusu ḇa.

Sesyowi Kaku Refo ya (14:26)

Sfas kaḇer Refo ine ma sifrur ker na ḇe wos ḇese. Rosai eḇedar fa wakyar roi sfas ro Refo na namnis kaker?

”Sfadwer Fasfas ro Refo ya Kwar Ke?” (Fasfas ro situs jw.org)