Esra

3 Nao taem namba 7 manis+ i kamtru mo ol man Isrel* oli stap long ol taon blong olgeta, olgeta evriwan oli kam wanples long Jerusalem wetem wan tingting. 2 Nao Jesua+ we i boe blong Jehosadak, wetem ol narafala pris, mo Serubabel+ we i boe blong Sealtiel,+ wetem ol brata blong hem, oli girap mo oli wokem olta blong God blong Isrel, blong oli save mekem sakrefaes ya we i bon fulwan antap long hem, olsem we oli raetem long Loa blong Moses,+ we i man blong tru God.

3 Mo nating se oli fraet long ol man blong ol kantri raonabaot,+ be oli wokem olta ya long stret ples blong hem, mo oli stat blong mekem sakrefaes ya we i bon fulwan antap long hem, blong givim i go long Jehova. Hemia sakrefaes we i bon fulwan we oli stap mekem long moning mo long sapa.+ 4 Biaen, oli mekem Lafet Blong Ol Wansaed Haos,* folem wanem we oli raetemdaon long Loa.+ Mo evri dei, oli bonem ol animol blong sakrefaes we i bon fulwan folem namba we oli mas givim evri dei.+ 5 Biaen, oli givim ol ofring we oli bon fulwan we oli stap mekem evri dei,+ mo ol ofring blong niu mun+ mo blong ol narafala tabu lafet+ blong Jehova, wetem ol ofring we man i glad nomo blong givim+ i go long Jehova. 6 Long faswan dei blong namba 7 manis,+ oli stat blong mekem sakrefaes we i bon fulwan i go long Jehova, nating se oli no mekem fandesen blong tempol blong Jehova yet.

7 Nao oli givim mane long ol man blong katem ston+ mo ol man we oli gat gudhan blong wokem ol samting,+ mo oli givim kakae, dring, mo oel long ol man Saedon mo ol man Taea, from we oli tekem ol timba blong sida long Lebanon mo oli pas long solwota blong tekem i go long Jopa,+ folem oda we King Saeras blong Pesia i talem long olgeta.+

8 Long seken manis blong namba 2 yia, afta we oli kam long haos blong tru God long Jerusalem, Serubabel we i boe blong Sealtiel, wetem Jesua we i boe blong Jehosadak, mo ol narafala brata blong olgeta, ol pris, ol Livaet, mo olgeta evriwan we oli aot long kalabus oli kam long Jerusalem,+ oli statem wok ya. Mo oli putumap ol Livaet we oli gat 20 yia i go antap, blong oli lukaot long ol wok long haos blong Jehova. 9 Taswe, Jesua wetem ol boe blong hem mo ol brata blong hem, Kadmiel wetem ol boe blong hem, ol boe blong Juda, ol boe blong Henadad,+ wetem ol boe blong olgeta mo ol brata blong olgeta, mo ol Livaet, olgeta evriwan oli joen tugeta blong lukaot long olgeta we oli stap mekem ol wok long haos blong tru God.

10 Taem ol man blong bildim haos oli wokem fandesen blong tempol blong Jehova finis,+ ol pris we oli werem ol longfala klos blong olgeta, oli holem ol trampet,+ mo ol Livaet wetem ol boe blong Asaf, oli holem ol simbol, mo oli stanap nao oli presem Jehova olsem we King Deved blong Isrel i bin talem.+ 11 Nao olgeta oli singsing+ blong presem Jehova mo talem tangkiu long hem, “from we hem i gud, mo fasin blong hem blong lavem Isrel oltaem i stap olwe.”+ Taem oli singsing, samfala oli singsing fastaem, afta ol narafala oli singsing blong ansa long olgeta. Biaen olgeta man oli stap singsingaot bigwan blong presem Jehova, from we oli wokem fandesen blong haos blong Jehova finis. 12 Plante long ol pris, ol Livaet, mo olgeta we oli hed long haos blong papa blong olgeta, hemia ol olfala we oli bin luk tempol blong bifo,+ oli krae long bigfala voes taem oli luk se fandesen blong haos ya i finis, mo plante narafala oli singsingaot bigwan we voes blong olgeta i go antap from we oli glad.+ 13 Nao noes blong olgeta i kasem ol man we oli stap farawe, be ol man ya oli no naf blong haremsave se hemia noes blong ol man we oli glad o oli krae, from we olgeta oli singsingaot strong tumas.