Eksodas

37 Nao Bejalehel+ i wokem Bokis+ long wud blong akasia. Longfala blong bokis ya i tu mo haf kiubit,* bigfala blong hem i wan mo haf kiubit, mo hae blong hem i wan mo haf kiubit.+ 2 Mo biaen hem i blokem insaed mo aotsaed blong bokis ya long gol we i klin gud. Mo hem i wokem wan smol strap long gol we i goraon long saed blong hem antap.+ 3 Biaen hem i wokem fo ring blong bokis ya long gol, mo i putum olgeta antap long ol fo leg blong hem, we tu ring long wansaed mo tu ring long narasaed. 4 Mo biaen hem i wokem tu longfala stik long wud blong akasia, mo i blokem tufala long gol.+ 5 Biaen hem i pusum tufala stik ya i gotru long ol ring we oli stap long saed blong Bokis ya, blong man i save holem taem i karem Bokis ya.+

6 Mo hem i wokem lid blong Bokis ya long gol we i klin gud.+ Longfala blong hem i tu mo haf kiubit, mo bigfala blong hem i wan mo haf kiubit.+ 7 Biaen hem i wokem tu jerubim+ long gol. Hem i hamarem gol long tufala en blong lid ya,+ blong wokem ol jerubim ya. 8 Hem i wokem tufala jerubim ya long tufala en blong lid ya, wan long wan en mo narawan long narafala en. 9 Hem i mekem we fes blong tufala jerubim ya i lukluk i godaon long lid blong Bokis mo tufala i fesem tufala,+ mo tufala i openem wing blong tufala i go antap, nao wing blong tufala i kavremap lid ya.+

10 Biaen hem i wokem wan tebol long wud blong akasia.+ Longfala blong hem i tu kiubit, bigfala blong hem i wan kiubit, mo hae blong hem i wan mo haf kiubit.+ 11 Biaen hem i blokem tebol ya long gol we i klin gud, mo i wokem wan strap long gol we i goraon long saed blong tebol ya. 12 Biaen hem i wokem wan smol strap i goraon long hem we bigfala blong hem i saes blong wan han.* Mo hem i wokem wan rel long gol i goraon long en blong strap ya. 13 Mo hem i wokem fo ring blong tebol ya long gol, mo i putum ol ring ya long ol fo kona blong tebol ya, long ples we ol leg blong tebol oli joen long tebol. 14 Ol ring ya oli stap klosap long rel blong tebol ya, blong oli save pusum ol stik i gotru long hem blong karem tebol ya. 15 Biaen hem i wokem ol longfala stik long wud blong akasia blong karem tebol ya, mo i blokem ol stik ya long gol. 16 Biaen hem i wokem ol samting blong tebol ya. Hemia ol plet, ol kap, ol bol, mo ol jag we oli yusum blong kafsaedem ol dring ofring long hem. Ol samting ya hem i wokem olgeta long gol we i klin gud.+

17 Biaen hem i wokem wan ples blong putum laet.+ Hem i tekem wan pis gol nomo we i klin gud mo i hamarem blong wokem ples blong putum laet ya. Ples blong laet ya i gat stamba blong hem, stik blong hem, mo ol han blong hem. Mo long ol han blong hem i gat ol flaoa we i open, ol lif we i stap aninit long ol flaoa ya, mo ol flaoa we i sat.+ 18 Ples blong laet ya i gat sikis han blong hem we oli kamaot long stik blong hem, tri long wansaed mo tri long narasaed. 19 Long evri han long wansaed, i gat tri lif we oli stap aninit long ol flaoa, mo sep blong olgeta i olsem flaoa blong almon, mo biaen long ol flaoa ya wanwan, i gat wan flaoa we i no open yet mo wan flaoa we i open finis. Mo hemia i sem mak long evri han long narasaed. Hemia nao olsem wanem ol sikis han ya oli kamaot long stik ya. 20 Long stik blong ples blong putum laet, i gat fo lif we oli stap aninit long ol flaoa, mo sep blong olgeta i olsem flaoa blong almon. Mo biaen long ol flaoa ya wanwan, i gat wan flaoa we i no open yet mo wan flaoa we i open finis. 21 Long ol sikis han we oli kamaot long stik ya blong ples blong putum laet, aninit long tufala faswan han, i gat wan flaoa we i no open yet, mo aninit long tufala nekis han, i gat wan flaoa we i no open yet, mo aninit long tufala laswan han, i gat wan flaoa we i no open yet. 22 Hem i hamarem wan pis gol we i klin gud, blong wokem ples blong putum laet ya wetem ol flaoa we oli no open yet, mo ol han blong hem. 23 Biaen hem i yusum gol we i klin gud blong wokem seven laet,+ wetem samting blong holem wik blong laet,* mo faea holda. 24 Hem i yusum wan talen* blong gol we i klin gud blong wokem ples blong putum laet wetem evri samting ya.

25 Mo hem i wokem wan olta blong bonem insens+ long wud blong akasia. Olta ya i skwea, mo longfala blong hem i wan kiubit, bigfala blong hem i wan kiubit, mo hae blong hem i tu kiubit. Ol hon blong olta ya oli haf blong olta ya.+ 26 Hem i blokem olta ya long gol we i klin gud: Hemia top blong hem, saed saed blong hem, mo ol hon blong hem. Mo hem i wokem wan strap long gol we i goraon long saed blong hem antap. 27 Hem i wokem tu ring long gol aninit long rel blong hem, wan long wansaed mo narawan long wansaed, we tufala i fesem tufala. Hemia i blong holem ol longfala stik we bambae oli yusum blong karem olta ya. 28 Biaen hem i wokem ol longfala stik blong hem long wud blong akasia, mo i blokem long gol. 29 Mo tu, hem i wokem tabu oel blong makemaot man,+ mo insens we i gat gudfala smel+ mo i klin gud, we oli miksim gud.