Proveb

26 Fasin blong ona long wan man we i stupid, hem i no stret nating,

Hemia i olsem we sno i foldaon long hot taem, mo ren i ren long taem blong havest.+

 2 I gat risen from wanem wan pijin i ronwe mo wan swalo i flae,

Long sem fasin, i gat risen from wanem man i singaot trabol i kam.*

 3 Wip i blong wipim hos, rop i blong kontrolem dongki,+

Mo stik i blong wipim baksaed blong man we i stupid.+

 4 Yu no mas ansa long man we i stupid, folem krangke fasin blong hem,

Blong mekem se yu no kam olsem hem.*

 5 Yu ansa long man we i stupid folem krangke fasin blong hem,

Blong hem i no ting se hem i waes.+

 6 Man we i putum wok long han blong man we i stupid,

I olsem man we i brekem leg blong hem mo i stap spolem hem wan.*

 7 Wan proveb we i kamaot long maot blong man we i stupid,

I olsem rabis leg blong wan man we i no save wokbaot.*+

 8 Man we i stap givim glori long man we i stupid,

I olsem we hem i stap fasem wan ston long wan sling.+

 9 Wan proveb we i kamaot long maot blong man we i stupid,

I olsem ol ropnil we man i putum long han blong man we i drong.

10 Man we i tekem ol stupid man, mo ol man olbaot oli kam wok blong hem,

Hem i olsem wan man blong sut long bonara we i stap sut olbaot nomo.*

11 Man we i stupid, i stap mekem ol krangke fasin blong hem bakegen,

Olsem wan dog we i gobak blong kakae traot blong hem.+

12 ?Yu yu luk finis wan man we i ting se hem i waes?+

Man olsem, man we i stupid, i save lanem moa samting i winim hem.

13 Lesman i talem se: “!I gat wan yang laeon long rod!

!Wan laeon i stap long bigfala open ples long taon!”+

14 Doa i gohed blong swing long hinsis blong hem,*

Mo lesman i stap tantanem hem long bed blong hem.+

15 Lesman i pusum han blong hem i go insaed long bol we i fulap long kakae,

Be hem i taed tumas blong tekem han ya i kambak long maot blong hem.+

16 Lesman i ting se hem i waes moa

I winim seven man we oli givim wan gudfala ansa.

17 Man we i stap wokbaot long rod, nao i kam kros from* wan rao we i no bisnes blong hem,

Hem i olsem wan man we i holemtaet sora blong wan dog.+

20 Taem i no gat faeawud, faea i ded,

Mo sipos i no moa gat man i stap talem ol tok olbaot blong spolem narafala man, rao tu bambae i finis.+

21 Olsem we sakol i blong mekem ol sakol i gohed blong laet mo wud i blong statem faea,

Long sem fasin, man blong agiu i stap statem rao.+

22 Ol tok blong man we i stap spolem nem blong narafala, i olsem wan pis kakae we i tesgud,*

Taem man i solemdaon, hem i go stret insaed long stomak.+

23 Wan man we i gat rabis tingting, ol gudfala toktok we hem i talem,

Oli olsem wan pis graonpot we man i pentem long silva blong mekem i luk naes.+

24 Man we i no laekem nating ol narafala, hem i stap tok swit long fes blong olgeta,

Be hem i stap holem rabis tingting insaed long hem.

25 Nating se hem i toktok gud long yu, yu no mas trastem hem,

From we i gat seven samting long hat blong hem we oli nogud we oli nogud.*

26 Nating se hem i traem haedem rabis tingting ya blong hem,

Be ol rabis tingting ya bambae oli kamaot klia nomo long kongregesen.

27 Man we i digim wan hol bambae hem wan i foldaon long hem,

Mo man we i rolemaot wan ston, ston ya bambae i rol i kambak long hem.+

28 Tang we i stap giaman i no laekem nating olgeta we hem i spolem olgeta,

Mo maot we i stap tok swit, i stap spolem ol samting nomo.+