Fas Buk Blong Kronikel
17 Nao stret long taem we Deved i stap gud long haos* blong hem, hem i talem long profet ya Natan+ se: “Mi mi stap long wan haos we oli wokem long wud blong sida,+ be bokis blong kontrak blong Jehova i stap aninit long wan tent we oli wokem long kaliko nomo.”+ 2 Nao Natan i talem long Deved se: “Yu mekem samting we i stap long hat blong yu, from we tru God i stap wetem yu.”
3 Be long sem naet ya, tok blong God i kamtru long Natan se: 4 “Yu go talem long man blong wok blong mi Deved, se: ‘Hemia wanem we Jehova i talem: “I no yu we bambae i wokem wan haos blong mi stap long hem.+ 5 Stat long dei we mi tekemaot Isrel kam kasem tede, mi mi no stap long wan haos, be mi mi gohed blong muv long wan tent i go long narawan mo long wan tabenakel* i go long narawan.*+ 6 Long olgeta taem we mi stap go wetem olgeta man Isrel, mo mi putumap ol jaj long Isrel olsem ol man blong lukaot long sipsip, blong oli lukaot long ol man blong mi, mi mi neva talem long olgeta se: ‘?From wanem yufala i no bildim wan haos blong mi long wud blong sida?’”’
7 “Naoia yu mas talem tok ya long man blong wok blong mi Deved, se: ‘Hemia tok we Jehova komanda blong ol ami i talem: “Taem yu yu stap lukaot long ol sipsip long ples we ol animol oli stap kakae gras long hem, mi mi tekemaot yu blong yu kam lida blong ol man blong mi, ol man Isrel.+ 8 Mo bambae mi stap wetem yu long eni ples we yu go long hem,+ mo bambae mi kilim i ded* evri enemi blong yu long fes blong yu,+ mo bambae mi mekem nem blong yu i kam olsem nem blong ol haeman long wol.+ 9 Bambae mi jusumaot wan ples blong ol man blong mi, ol man Isrel, mo mi putum olgeta long hem, mo olgeta bambae oli stap gud long ples ya mo ol man bambae oli no hambag long olgeta. Nao ol man nogud bambae oli no moa mekem i strong long olgeta* bakegen olsem we oli bin mekem bifo,+ 10 stat long dei ya we mi putumap ol jaj blong oli lukaot long ol man blong mi, ol man Isrel.+ Mo bambae mi winim olgeta enemi blong yu.+ Mo tu, mi talem long yu se: ‘Jehova bambae i bildim wan haos* blong yu.’
11 “‘“Taem yu ded mo yu go slip wetem ol olfala blong yu, bambae mi putumap pikinini* blong yu, wan long ol boe blong yu,+ blong i king afta long yu, mo bambae mi mekem rul blong hem i stap strong.+ 12 Hem nao bambae i bildim haos blong mi,+ mo bambae mi mekem jea blong king blong hem i stap strong blong olwe.+ 13 Bambae mi mi kam papa blong hem, mo hem bambae i kam boe blong mi.+ Bambae mi lavem hem oltaem, mi no tekemaot lav ya long hem,+ olsem we mi bin tekemaot long man ya we i stap fastaem long yu.+ 14 Bambae mi putumap hem long haos blong mi mo long kingdom blong mi blong olwe.+ Mo jea blong hem blong king, bambae i stap blong olwe.”’”+
15 Nao Natan i talemaot long Deved olgeta tok ya mo ful vison ya we hem i luk.
16 Nao Deved i kam mo i sidaon long fored blong Jehova, mo i se: “O Jehova God, ?mi mi hu? Famle* blong mi i nating nomo be yu yu mekem plante samting blong mifala.+ 17 O God, ol samting ya oli plante tumas, be antap long hemia, yu talem se haos blong man blong wok blong yu bambae i stap blong longtaem.+ O Jehova God, yu yu luk mi olsem wan man we yu mas leftemap moa.* 18 Yu yu savegud man blong wok blong yu Deved, taswe i no moa gat tok we mi save talem long saed blong ona we yu givim long mi.+ 19 O Jehova, yu yu mekem olgeta bigbigfala samting ya taem yu soemaot paoa blong yu, mo yu mekem from man blong wok blong yu mo from we hat blong yu i wantem.*+ 20 O Jehova. I no gat wan man we i olsem yu,+ mo yu wan nomo yu tru God,+ mo evri samting we mifala i harem oli pruvum samting ya. 21 Mo i no gat wan narafala nesen long wol ya we i olsem ol man blong yu, ol man Isrel.+ Tru God i go mo i pemaot olgeta nao oli kam ol man blong hem.+ Yu leftemap nem blong yu taem yu mekem ol bigbigfala samting blong sapraes,+ nao yu ronemaot ol narafala nesen long fored blong ol man blong yu,+ we yu pemaot olgeta long Ijip. 22 Yu mekem ol man Isrel oli kam ol man blong yu blong olwe,+ mo yu, O Jehova, yu kam God blong olgeta.+ 23 Naoia, O Jehova, i gud yu holemtaet oltaem promes we yu bin mekem long man blong wok blong yu mo long olgeta long haos blong hem, mo i gud yu mekem stret olsem we yu promes blong mekem.+ 24 I gud nem blong yu i stap oltaem mo ol man oli leftemap nem ya+ blong olwe, nao oli save talem se: ‘Jehova komanda blong ol ami mo God blong ol man Isrel, hem nao i rul long Isrel,’ mo i gud haos blong man blong wok blong yu Deved, i stap strong oltaem long fes blong yu.+ 25 From we yu, God blong mi, yu soemaot long man blong wok blong yu se yu wantem wokem wan haos* blong hem. Hemia nao from wanem man blong wok blong yu i gat strong tingting blong mekem prea ya long yu. 26 Mo naoia, O Jehova, yu nomo yu tru God, mo yu bin promes blong mekem ol gudfala samting ya long saed blong man blong wok blong yu. 27 Ale i gud yu glad blong blesem haos blong man blong wok blong yu, mo i gud haos ya i stap long fes blong yu blong olwe, from we yu, O Jehova, yu stap blesem, mo blesing blong yu bambae i stap long hem blong olwe.”