Eksodas

31 Nao Jehova i gohed, i talem long Moses se: 2 “Yu luk, mi mi jusum Bejalehel+ we i boe blong Uri, mo i smol bubu blong Huru long traeb blong Juda.+ 3 Bambae mi mekem tabu spirit blong God i kam fulap long hem, nao bambae hem i gat waes, i kasemsave samting, mo i gat save blong wokem ol defdefren samting. 4 Mo bambae hem i gat save blong disaenem ol naesfala samting, mo blong wokem ol samting long gol, silva, mo kopa. 5 Mo bambae hem i gat save blong katem mo putumgud ol ston,+ mo blong wokem enikaen samting long wud.+ 6 Mo tu, mi putumap Oholiab+ blong i givhan long hem. Oholiab ya i boe blong Ahisamak long traeb blong Dan. Mo bambae mi givim waes* long evri man we oli gat gudhan blong wokem samting, nao bambae oli wokem evri samting we mi bin talem long yu.+ 7 Hemia tent blong miting,*+ bokis blong Loa*+ mo lid blong hem,+ mo evri samting blong tent ya, 8 mo tebol+ wetem ol samting blong yusum long tebol ya, mo ples blong putum laet we oli wokem long gol we i klin gud, wetem evri samting blong hem,+ mo olta blong insens,+ 9 mo olta blong ofring we i bon fulwan,+ wetem evri samting blong yusum long olta ya, mo besin wetem ol leg blong hem,+ 10 mo ol gudfala klos we oli wivim, mo ol tabu klos blong Eron we i pris, mo ol tabu klos blong ol boe blong hem we oli wok olsem ol pris,+ 11 mo oel blong makemaot man, mo insens we i gat gudfala smel we i blong yusum long tabu ples.+ Olgeta ya bambae oli wokem evri samting we mi bin talem long yu.”

12 Nao Jehova i gohed, i talem long Moses se: 13 “Yu toktok long ol laen blong Isrel, mo yu talem long olgeta se: ‘Yufala i mas meksua se yufala mo ol jeneresen we bambae oli kamaot biaen long yufala, yufala i mas kipim ol sabat blong mi,+ from we hem i wan saen we i stap bitwin mi mo yufala. Nao bambae yufala i save we mi Jehova, mi mekem yufala i tabu. 14 Yufala i mas kipim Sabat from we hem i tabu.+ Man we i brekem loa ya, hem i mas ded. Sipos wan man i wok long dei ya, man* ya i no mas stap wetem yufala, yufala i mas aotem hem.*+ 15 Yufala i gat sikis dei blong mekem ol wok, be namba 7 dei hem i sabat, hem i dei blong spel fulwan.+ Hem i wan dei we i tabu long ae blong Jehova. Sipos wan man i wok long Sabat dei, man ya i mas ded. 16 Ol laen blong Isrel oli mas kipim Sabat. Olgeta wetem ol jeneresen we bambae oli kamaot biaen long olgeta, oli mas folem loa blong Sabat. Hemia wan kontrak we bambae i stap oltaem. 17 Dei ya i wan saen we bambae i stap oltaem bitwin mi mo ol man Isrel,+ from we long sikis dei, Jehova i mekem heven mo wol, mo long namba 7 dei hem i no moa wok mo i spel.’”+

18 Nao taem God i talem ol tok ya finis long Moses long Hil Ya Sinae, hem i givim tu flat ston we tok blong hem*+ i stap long tufala. Ol tok ya, God i raetem long fingga blong hem.+