Fas leta i go long Korin

4 Ol man oli mas luk mifala olsem we mifala i man blong wok blong Kraes,* mo olsem we mifala ol slef we i bos* long ol tabu tokhaed blong God.+ 2 Long saed ya, masta i wantem se ol slef we oli bos, oli mas mekem gud wok blong olgeta. 3 Taswe long mi, i nating nomo sipos yufala i wantem jekem samting we mi mekem o yufala i putum mi long kot. Blong talem stret, mi mi no stap jekem wok blong mi, 4 from we tingting blong mi i no stikim mi se mi mekem samting we i rong. Be samting ya i no mekem se mi mi wan stret man, nogat. Man we i stap jekem wok blong mi, hemia Jehova.*+ 5 From samting ya, yufala i no mas jajem+ narafala man bifo long stret taem blong hem, hemia taem Masta i kam. Nao hem bambae i tekem ol samting we oli stap haed long tudak, oli kam long laet, mo bambae hem i mekem tingting we i stap long hat blong ol man i kam long klia ples, nao God bambae i presem olgeta man wanwan from samting we oli mekem.+

6 Ol brata. Mi mi yusum nem blong mi mo Apolos+ long ol samting ya we mi jes tokbaot, blong givhan long yufala, blong yufala i save luk mitufala mo lanem rul ya se: “Yufala i no mas go bitim mak blong ol tok ya we oli raetem finis.” Sipos yufala i mekem olsem, bambae yufala i kam flas+ nao yufala i laekem sam man, be yufala i agensem ol narafala. 7 ?Wanem i mekem se yu yu defren long ol narafala man? ?Wanem samting we i blong yu we yu no bin kasem long narafala?+ Sipos narafala i givim long yu, ?from wanem yu stap tok flas?

8 ?Olsem wanem? ?Yufala i kasem finis evri samting we yufala i wantem? ?Yufala i kam rijman finis? ?Yufala i stat blong rul finis,+ be mifala no yet? Mi wantem tumas se yufala i stat finis blong rul, olsem nao mifala i save rul wetem yufala.+ 9 Mi mi luk olsem se God i mekem yumi ol aposol, yumi olsem ol man we oli jajem olgeta finis se bambae oli ded,+ nao yumi stap long laswan grup blong man blong go insaed long stedium, blong fulwol+ mo ol enjel mo ol man oli lukluk yumi. 10 From nem blong Kraes, ol man oli luk mifala olsem ol krangke man,+ be yufala i ting se yufala i waes from we yufala i joen long Kraes. Mifala i no gat paoa, be yufala i strong. Ol man oli stap ona long yufala, be oli stap luklukdaon long mifala. 11 Kam kasem naoia, mifala i stap hanggri+ mo tosta,+ mifala i no gat klos,* ol man oli stap kilim mifala,*+ mo mifala i no gat haos, 12 mo mifala i stap wok had wetem han blong mifala.+ Taem ol man oli tok nogud long mifala, mifala i stap blesem olgeta,+ taem oli ronem mo kilim mifala, mifala i stanap strong wetem longfala tingting,+ 13 taem oli tok blong spolem nem blong mifala, mifala i ansa long kwaet fasin.*+ Kam kasem tede, ol man blong wol oli luk mifala olsem we mifala i doti* nomo, mifala i makas nomo blong olgeta samting.

14 Mi mi no stap raetem ol tok ya blong mekem yufala i sem, be mi raetem blong tijim yufala olsem ol pikinini blong mi we mi lavem yufala tumas. 15 Maet yufala i gat 10,000 man* we oli tijim yufala blong folem Kraes, be yufala i no gat plante papa. Mi mi papa blong yufala, mi tijim gud nius long yufala long nem blong Kraes Jisas.+ 16 Taswe mi askem long yufala se plis, yufala i folem fasin blong mi.+ 17 From samting ya, mi mi sanem Timoti i kam long yufala, from we hem i pikinini blong mi we mi lavem hem tumas, mo oltaem hem i strong long wok ya blong Masta. Hem bambae i tijim yufala bakegen long ol fasin we mi stap folem* taem mi stap mekem wok blong Kraes Jisas,+ hemia ol fasin ya we mi stap tijim long ol kongregesen long evri ples.

18 Sam long yufala oli flas gogo tingting blong olgeta i go antap tumas from we oli ting se bambae mi no save kam luk yufala. 19 Be sipos Jehova* i wantem, bambae mi kam luk yufala i no longtaem. Mo mi no wantem save toktok blong ol flas man ya, be mi wantem save sipos oli gat paoa, 20 from we Kingdom blong God i no stanap long toktok, be long paoa. 21 ?Yufala i wantem wanem? ?Yufala i wantem se mi kam wetem wan stik,+ o mi kam wetem lav mo kwaet fasin?