Fas leta i go long Korin

16 Long saed blong ol mane we bambae yufala i saksakem blong givim long ol tabu man,+ yufala i save folem advaes we mi mi givim finis long ol kongregesen long Galesia. 2 Long fas dei blong evri wik, yufala wanwan i mas putum sam samting i stap olsem we yufala i naf blong givim, olsem nao taem mi mi kam, kleksin ya i rere finis. 3 Be taem mi kamtru long yufala, bambae mi sanem ol man ya we yufala i jusumaot olgeta long leta blong yufala,+ blong oli tekem presen blong yufala i go long Jerusalem. 4 Be sipos mi luk se i stret blong mi tu mi go longwe, bambae mi go wetem olgeta.

5 Bambae mi kam, be fastaem mi mas go long ol ples long Masedonia, from we mi mas go longwe.+ 6 Ating bambae mi stap longtaem lelebet wetem yufala, mo maet mi spel wetem yufala long koltaem, olsem nao yufala i save wokbaot wetem mi long hafrod blong go long ples we bambae mi go long hem. 7 Mi no wantem se mi stap smoltaem nomo wetem yufala, olsem we mi jes pas long yufala nomo. Tingting blong mi se sipos Jehova* i wantem, bambae mi stap longtaem lelebet wetem yufala.+ 8 Be naoia mi stap long Efesas,+ mo bambae mi stap gogo kasem Lafet Blong Pentekos, 9 from we long ples ya, wan bigfala doa i open finis long mi blong mi mekem wok,+ be i gat plante man tu we oli agens.

10 Sipos Timoti+ i kamtru long yufala, yufala i mas meksua se hem i harem gud taem hem i stap wetem yufala, from we hem i stap mekem wok blong Jehova*+ olsem mi. 11 Taswe yufala i no mas luklukdaon long hem. Yufala i sanem hem i go we i no wari, olsem nao hem i save kam long mi from we mi wetem ol brata, mifala i stap wet long hem.

12 Long saed blong brata blong yumi Apolos,+ mi mi askem strong long hem blong i folem ol brata taem oli kam luk yufala. Be hem i no tingting blong kam naoia, taem bambae hem i gat janis, bambae hem i kam luk yufala.

13 Yufala i mas stap wekap,+ yufala i mas stanap strong long bilif,+ yufala i mas stap oltaem olsem ol man we oli no fraet,*+ mo yufala i mas gohed blong kam strong.+ 14 Long olgeta samting we yufala i mekem, yufala i mas mekem wetem lav.+

15 Ol brata. Mi mi talem strong long yufala se: Yufala i save se olgeta we oli stap long haos blong Stefanas oli ol fas disaepol long Akaea, mo oltaem oli stap givhan long ol tabu man. 16 Taswe i gud yufala tu i obei oltaem long ol man olsem, mo long olgeta evriwan we oli joen long wok ya mo oli wok had.+ 17 Be mi mi glad tumas long Stefanas+ mo Fotunatas mo Akaekas we oli stap wetem mi, from we yufala i no gat rod blong kam stap wetem mi, be trifala i save mekem. 18 Olgeta oli mekem tingting blong mi i kam strong, olsem we oli mekem long yufala. Taswe yufala i mas tinghae long ol man olsem.

19 Ol kongregesen long Esia oli talem halo long yufala. Akwila mo Priska, wetem kongregesen we i stap long haos blong tufala,+ olgeta tu oli talem bigfala halo long yufala long nem blong Masta. 20 Olgeta brata oli talem halo long yufala. I gud yufala i talem halo long yufala wetem holi kis.

21 Mi Pol mi talem halo long yufala, mo mi nomo mi raetem tok ya.

22 Sipos wan man i no lavem Masta, i gud hem i lus. !O Masta blong mifala, plis yu kam! 23 Prea blong mi se Masta Jisas i gohed blong kaen long yufala. 24 Yufala evriwan ya we i stap joen long Kraes Jisas, mi mi lavem yufala tumas.