Jeremaea
47 Hemia tok we Jehova i givim long profet ya Jeremaea, long saed blong ol man Filistia,+ bifo we Fero i spolem Gasa. 2 Hemia samting we Jehova i talem, i se:
“!Yu luk! Ol wota oli aot long not, oli stap ron i kam.
Bambae i kam wan bigfala wota we i ron strong.
Mo bambae i kavremap gud kantri ya mo evri samting we i stap long hem,
Taon ya mo olgeta we oli stap laef long hem.
Bambae ol man oli singaot bigwan,
Mo evriwan we i laef long graon ya bambae oli krae bigwan.
3 Mo from noes blong ol leg blong ol man hos blong hem we oli stap resis i kam,
Mo noes blong ol wo jariot blong hem
Mo from noes blong ol wil blong hem,
Ol papa bambae oli no wantem nating blong tanemraon from ol boe blong olgeta,
From han blong olgeta i ded.
4 From dei ya we i stap kam, bambae i distroem olgeta man Filistia.+
Bambae i finisim olgeta kantri we oli stap yet, we oli stap sapotem Taea+ mo Saedon.+
Yu smol haf, we yu stap long levelples* blong olgeta
?Bambae yu gohed blong katkatem yu wan gogo kasem wetaem?+
6 !Ah! !Naef blong faet blong Jehova!+
?Bambae yu no save stap kwaet gogo kasem wetaem?
Yu gobak long paos blong yu.
Yu spel mo yu stap kwaet.
7 ?Bambae hem i stap kwaet olsem wanem
Taem Jehova i givim finis wan oda long hem?
Hem i go blong agensem Askelon mo ples ya klosap long solwota,+
Yes, oli sanem hem i go long ples ya nao.”