Fas Buk Blong Kronikel

20 Nao long stat blong yia,* long taem we ol king oli stap go mekem faet, Joab+ i lidim ol soldia blong Isrel mo oli go spolemgud kantri blong ol man Amon. Hem i go hivap raon long Raba,+ mo long taem ya, Deved i stap nomo long Jerusalem.+ Nao Joab i atakem Raba mo i spolemgud taon ya.+ 2 Biaen Deved i tekemaot hat blong king we i stap long hed blong Malkam. Hat ya oli wokem long gol mo hem i faenemaot se hevi blong gol ya i wan talen,* mo i gat ol sas ston long hat ya. Nao oli putum hat ya long hed blong Deved. Mo tu Deved i tekemaot plante narafala samting long taon ya.+ 3 Mo hem i tekem ol man blong taon ya mo i mekem oli+ katem ol ston long so, mo oli wok wetem ol aean we oli sap mo wetem ol akis. Hemia nao samting we Deved i mekem long evri taon blong ol man Amon. Nao biaen Deved wetem olgeta soldia oli gobak long Jerusalem.

4 Biaen, faet i brokaot wetem ol man Filistia long Gesa. Long taem ya, Sibekae+ we i blong Husa, i kilim i ded Sipae we i kamaot biaen long Refaem,+ nao ol man Filistia oli lus.

5 Nao faet i kamaot bakegen wetem ol man Filistia, mo Elanan we i boe blong Jaere i kilim i ded Lami we i brata blong Golaeat+ blong Gat, mo handel blong spia blong hem i bigwan olsem timba we man blong wivim kaliko i stap yusum.+

6 Nao faet i brokaot bakegen long Gat,+ mo long ples ya i gat wan man we i bigwan we i bigwan.+ Hem i gat 24 fingga evriwan, 6 long wan han mo 6 long narawan mo 6 fingga long wan leg mo 6 long narawan, mo hem tu i kamaot biaen long Refaem.+ 7 Hem i gohed blong stap jikim+ ol man Isrel. Ale Jonatan we i boe blong Simea,+ brata blong Deved, i kilim hem i ded.

8 Olgeta ya oli kamaot biaen long Refaem+ long Gat,+ mo Deved wetem ol man blong hem oli kilim olgeta oli ded.