Fas Buk Blong Kronikel
23 Taem Deved i kam olfala mo i kam klosap long en blong laef blong hem,* hem i mekem boe blong hem Solomon i kam king blong Isrel.+ 2 Biaen hem i singaot olgeta prins blong Isrel, wetem ol pris+ mo ol Livaet,+ oli kam wanples. 3 Oli kaontem ol Livaet we oli gat 30 yia i go antap,+ mo namba blong olgeta man wanwan i 38,000. 4 Long olgeta ya, i gat 24,000 we oli lukaot long ol wok long haos blong Jehova, mo i gat 6,000 we oli ol ofisa mo ol jaj,+ 5 mo 4,000 long olgeta oli ol man blong gad long get,+ mo 4,000 oli stap presem+ Jehova wetem ol instramen, we Deved i talem se hem i wokem blong presem God.
6 Biaen Deved i seraotem olgeta i go long ol grup+ folem ol boe blong Livae: Geson, Kohat, mo Merari.+ 7 Long laen blong Geson, i gat Lahadan, mo Simei. 8 Ol boe blong Lahadan, i gat Jehiel we i hed, Setam, mo Joel,+ olgeta tri. 9 Ol boe blong Simei, i gat Selomot, Hasiel, mo Haran, olgeta tri. Olgeta ya oli hed long haos blong papa blong olgeta Lahadan. 10 Mo ol boe blong Simei, i gat Jahat, Jinah, Jehus, mo Beria. Fofala ya oli ol boe blong Simei. 11 Jahat nao i hed long olgeta mo Jijaha i namba 2 long hem. Be from we Jehus mo Beria oli no gat plante boe, oli kaontem olgeta olsem wan haos nomo mo oli mekem sem wok nomo.
12 Ol boe blong Kohat, i gat Amram, Isa,+ Hebron, mo Usiel,+ olgeta oli fo. 13 Ol boe blong Amram, i gat Eron+ mo Moses.+ Be God i jusumaot Eron blong olwe,+ blong hem i mekem minista wok long Rum we i Tabu we i Tabu, blong mekem rum ya i kam tabu. Mo God i jusumaot hem wetem ol boe blong hem blong oli mekem ol sakrefaes long fored blong Jehova, mo blong oli mekem minista wok blong hem, mo oli talemaot ol blesing long nem blong hem oltaem.+ 14 Mo long saed blong Moses we i man blong tru God, oli stil kaontem ol boe blong hem wetem traeb blong Livaet. 15 Ol boe blong Moses, i gat Gesom+ mo Eliesa.+ 16 Long ol boe blong Gesom, Sebuel+ nao i hed. 17 Long olgeta we oli kamaot biaen long* Eliesa, Rehabia+ nao i hed. Eliesa i no gat narafala boe, be ol boe blong Rehabia oli plante we oli plante. 18 Long ol boe blong Isa,+ Selomit+ nao i hed. 19 Ol boe blong Hebron, i gat Jeria we i hed, Amaria we i namba 2 long hem, Jahasiel we i namba 3, mo Jekameam+ we i namba 4. 20 Ol boe blong Usiel,+ i gat Maeka we i hed, mo Isaea i namba 2 long hem.
21 Ol boe blong Merari, i gat Mali mo Musi.+ Ol boe blong Mali, i gat Eleasara mo Kis. 22 Eleasara i ded, be hem i no gat ol boe, i gat ol gel nomo. Nao ol boe blong Kis, hemia ol famle* blong olgeta, oli tekem ol gel ya blong oli kam ol waef blong olgeta. 23 Ol boe blong Musi, i gat Mali, Eda, mo Jeremot, olgeta tri.
24 Hemia nao ol boe blong Livae we oli rejistarem olgeta folem haos blong papa blong olgeta, mo folem olgeta we oli hed long haos blong papa blong olgeta. Hemia olgeta we oli gat 20 yia i go antap we oli kaontem olgeta mo raetemdaon nem blong olgeta, mo wok we oli mekem long haos blong Jehova. 25 Deved i bin talem se: “Jehova we i God blong Isrel, i mekem ol man blong hem oli spel,+ mo bambae hem i stap long Jerusalem blong olwe.+ 26 Mo tu, ol Livaet bambae oli no nid blong karem tabenakel* o eni samting blong hem we oli yusum blong mekem ol wok long tabenakel ya.”+ 27 Folem ol laswan tok blong Deved, oli kaontem ol man we oli Livaet mo we oli gat 20 yia i go antap. 28 Wok blong olgeta ya i blong givhan long ol boe blong Eron,+ long ol wok long haos blong Jehova, hemia blong lukaot long ol yad,+ ol rum blong kakae, oli mekem evri samting we i tabu i kam klin bakegen, mo oli mekem eni narafala wok we oli mas mekem long haos blong tru God. 29 Oli givhan blong mekemrere ol bred we oli stakemap,*+ ol flaoa we i nambawan blong givim long God olsem sid ofring, ol bred we oli tintin we i no gat is long hem,+ ol kek we oli fraenem, ol flaoa we oli miksim wetem oel,+ mo oli givhan blong mesarem mo makem saes blong olgeta samting. 30 Mo evri moning+ oli mas stanap blong talem tangkiu long Jehova mo presem hem, mo oli mas mekem olsem tu long sapa.+ 31 Mo tu, long ol Sabat,+ mo long taem blong niu mun,+ mo long taem blong ol lafet,+ olgeta oli mas givhan taem ol pris oli mekem sakrefaes we i bon fulwan blong givim i go long Jehova. Oli mekem olsem folem namba we i stap long rul blong ol samting ya, mo oli mekem olsem oltaem long fored blong Jehova. 32 Mo tu, oli lukaot gud blong mekem wok blong olgeta long tent blong miting,* long holi ples, mo blong givhan long ol brata blong olgeta, hemia ol boe blong Eron, blong mekem ol wok long haos blong Jehova.