Ol Sam
Singsing blong Deved.
15 O Jehova, ?hu i save stap olsem gest* long tent blong yu?
?Hu i save stap long bigfala hil blong yu we i tabu?+
2 Hemia man we i stap wokbaot folem stret fasin,*+
I stap mekem ol samting we i stret+
Mo long hat blong hem, hem i stap tok tru oltaem.+
3 Hem i no yusum tang blong hem blong spolem nem blong ol narafala,+
Hem i no mekem nogud long neba blong hem,+
Mo i no talem ol giaman tok long saed blong ol fren blong hem.*+
4 Hem i sakemaot eni man we i rabis olgeta,+
Be hem i stap ona long olgeta we oli stap fraet* long Jehova.
Hem i no stap jenisim promes* blong hem, nating se hem i save kasem trabol from.+
5 Hem i stap givim lonmane, we i no mekem man i pem intres,+
Mo hem i no save akseptem dotimane blong agensem man we i no gat fol.+
Man we i stap mekem ol samting ya, bambae i no gat wan samting i seksekem hem.*+