Fas Buk Blong Kronikel
5 Hemia ol boe blong Ruben+ we i fasbon blong Isrel. Hem i fasbon, be from we hem i mekem bed blong papa blong hem i kam doti,*+ papa blong hem i tekemaot raet blong fasbon long hem mo i givim long ol boe blong Josef,+ we i boe blong Isrel. Taswe long lis blong ol famle, oli no putum nem blong hem se i fasbon. 2 Nating se Juda+ i hae moa long ol brata blong hem, mo man we bambae i kam lida i kamaot long hem,+ be raet blong fasbon i go long Josef. 3 Ol boe blong Ruben we i fasbon blong Isrel, i gat Hanok, Palu, Hesron, mo Kami.+ 4 Ol boe blong Joel, i gat Semaea we i boe blong hem, Gog we i boe blong Semaea, Simei we i boe blong Gog, 5 Maeka we i boe blong Simei, Rehaea we i boe blong Maeka, Bal we i boe blong Rehaea, 6 mo Beherah we i boe blong Bal. Hem i wan jif blong laen blong Ruben, we King Tilgatpilnesa+ blong Asiria i tekemaot hem i go long Asiria. 7 Long lis blong ol famle we oli kamaot biaen long ol brata blong Beherah, i gat Jeiel we i hed blong famle, Sekaraea, 8 mo Bela we i boe blong Asas. Asas ya i boe blong Sema, mo i smol bubu blong boe blong Joel. Olgeta long haos blong Bela oli stap long Aroere+ i go kasem Neboho mo Balmeon.+ 9 Mo long saed i go long is, oli stap long ol ples i go kasem stat blong draeples ya we i go kasem Yufretes Reva.+ Hemia from we ol animol blong olgeta i kam plante tumas long Gilead.+ 10 Long taem blong King Sol, olgeta ya oli faet agensem ol Hegaraet, nao oli kilim olgeta oli ded, mo oli stap long ol tent blong olgeta long olgeta teritori long is blong Gilead.
11 Mo olgeta we oli kamaot biaen long Gad oli stap klosap long olgeta, long ples ya Basan i go kasem Salkaha.+ 12 Long Basan, Joel nao i hed blong olgeta, Safam i namba 2 long hem, mo tu i gat Janae mo Safat. 13 Mo ol brata blong olgeta we oli kamaot long haos blong papa blong olgeta, i gat Maekel, Mesulam, Seba, Jorae, Jakan, Jia, mo Eba. Olgeta seven evriwan. 14 Hemia ol boe blong Abihael we i boe blong Huri, Huri i boe blong Jaroa, Jaroa i boe blong Gilead, Gilead i boe blong Maekel, Maekel i boe blong Jesisae, Jesisae i boe blong Jado, Jado i boe blong Bus. 15 Ahi we i boe blong Abdiel mo i smol bubu blong Guni, hem i hed blong haos blong papa blong olgeta. 16 Olgeta oli stap long Gilead,+ long Basan+ mo ol taon we oli dipen* long hem, mo long olgeta ples long Saron we i gat plante gras blong ol sipsip long hem. 17 Ol man oli raetemdaon nem blong olgeta evriwan ya long taem blong King Jotam+ blong Juda, mo long taem blong King Jeroboam*+ blong Isrel.
18 Laen blong Ruben, mo laen blong Gad, mo haf traeb blong Manase, oli gat 44,760 strong man long ami blong olgeta, we oli tren gud blong faet, we oli karem ol sil, ol naef blong faet, mo oli gat ol bonara.* 19 Olgeta oli go faet agensem ol Hegaraet,+ Jeturu, Nafis,+ mo Nodab. 20 Taem ol soldia ya oli stap faet, oli prea long God blong hem i givhan long olgeta, nao hem i ansa long prea blong olgeta, from we oli trastem hem. Hem i putum ol Hegaraet wetem evriwan we oli stap wetem olgeta, long han blong ol soldia ya.+ 21 Oli holemtaet ol animol blong olgeta, hemia 50,000 kamel, wetem 250,000 sipsip, mo 2,000 dongki, mo oli holem 100,000 man* tu. 22 Oli kilim plante enemi blong olgeta oli ded from we tru God i faet long saed blong olgeta.+ Mo oli stap long ples blong ol enemi ya gogo kasem we oli go kalabus long narafala kantri.+
23 Olgeta we oli kamaot biaen long haf traeb blong Manase,+ oli stap long ples ya Basan go kasem Balemon, mo Seniri, mo Hil Ya Hemon.+ Olgeta oli plante we plante. 24 Hemia olgeta we oli hed blong haos blong papa blong olgeta: Efa, Isae, Eliel, Asriel, Jeremaea, Hodavia, mo Jadiel. Olgeta oli ol strong man blong faet, ol man oli savegud olgeta, mo oli ol hed blong haos blong papa blong olgeta. 25 Be oli no holemstrong long God blong ol olfala blong olgeta, mo oli slip wetem ol god blong ol man long ples ya,+ we God i bin spolemgud olgeta long fored blong olgeta. 26 Nao God blong Isrel i pulum tingting blong King Pul blong Asiria+ (hemia King Tilgatpilnesa+ blong Asiria) nao hem i holemtaet olgeta long laen blong Ruben, laen blong Gad, mo haf traeb blong Manase, mo i tekem olgeta oli go kalabus long Halaha, Haboro, Hara, mo long reva ya Gosan.+ Mo oli stap long ples ya kam kasem tede.