Fas Buk Blong Kronikel
14 Nao King Hiram+ blong Taea i sanem ol mesenja blong oli kam luk Deved. Mo hem i sanem ol timba blong sida, wetem ol man we oli stap wokem ol haos long ston* mo ol kapenta, blong oli kam bildim haos* blong Deved.+ 2 Mo Deved i save se Jehova i mekem rul blong hem long Isrel i stap strong,+ from we rul blong hem i kam antap moa, blong givhan long ol man blong Hem long Isrel.+
3 Deved i tekem sam moa waef+ long Jerusalem, mo i kam papa blong plante moa boe mo gel.+ 4 Hemia nem blong ol pikinini blong hem we hem i bonem olgeta long Jerusalem:+ Samua, Sobab, Natan,+ Solomon,+ 5 Ibara, Elisua, Elpelet, 6 Noga, Nefeg, Jafia, 7 Elisama, Beheliada, mo Elifelet.
8 Taem ol man Filistia oli harem se oli makemaot Deved blong i king blong olgeta ples long Isrel,+ olgeta evriwan oli kam blong lukaot Deved.+ Taem Deved i harem samting ya, hem i go faet agensem olgeta. 9 Biaen, ol man Filistia oli stap kam oltaem blong atakem ol man long Vali* Long Refaem.+ 10 Deved i askem long God se: “?Bambae mi go faet agensem ol man Filistia? ?Bambae yu putum olgeta long han blong mi?” Nao Jehova i talem long hem se: “Yu go, mo mi bambae mi putum olgeta long han blong yu.”+ 11 Ale Deved i go faet agensem ol man Filistia long Balperajim,+ mo i kilim i ded olgeta long ples ya. Mo hem i talem se: “Tru God i yusum han blong mi blong spolem ol enemi blong mi, olsem wota we i ron strong nao i brekemdaon wan stonwol.” Hemia nao from wanem hem i putum nem blong ples ya se Balperajim.* 12 Ol man Filistia oli ronwe long ol god blong olgeta long ples ya, ale Deved i givim oda long ol man blong hem, nao oli bonem olgeta long faea.+
13 Biaen ol man Filistia oli kam atakem bakegen ol man long vali* ya.+ 14 Nao Deved i askem long God se bambae hem i mekem wanem, be tru God i talem se: “Yu no go stret long olgeta, be yu pas raon biaen long olgeta, mo yu kam agensem olgeta long fored long bus blong baka.+ 15 Taem yu harem noes i kamaot antap long ol tri blong baka, noes blong ol soldia oli maj, yu mas go atakem olgeta, from we tru God bambae i go fastaem long yu blong kilim i ded ami blong ol man Filistia.”+ 16 Ale Deved i mekem stret olsem we tru God i talem long hem,+ mo hem i kilim i ded ami blong ol man Filistia, stat long Geba go kasem Gesa.+ 17 Nao nius blong Deved i go kasem olgeta ples, mo Jehova i mekem se olgeta nesen oli fraet long hem.+