Ol Sam
Long daerekta. I mas folem “Ol Lili.” Singsing blong ol boe blong Kora.+ Maskil.* Singsing blong lav.
45 Wan gudfala samting i mekem hat blong mi i jamjam.
Mi talem se: “Singsing blong mi* i tokbaot wan king.”+
I gud tang blong mi i kam olsem pen+ blong man we i gat gudhan blong raetem kopi blong ol buk.*+
2 Yu yu naes moa long ol pikinini blong man.
Ol gudfala toktok oli stap kamaot long maot blong yu.+
From samting ya, God i blesem yu olwe.+
3 O strong man,+ long haenem blong yu mo paoa blong yu,+
Yu strapem naef blong faet blong yu+ long saed blong yu.
4 Mo long paoa blong yu, yu go blong win.+
Yu raed i go from trutok mo tingting daon mo stret fasin,+
Mo raethan blong yu bambae i mekem* ol samting blong sapraes mo fraet.
5 Ol ara blong yu oli sap, oli mekem ol man oli stap folfoldaon long fored blong yu.+
Mo oli gotru long hat blong ol enemi blong king.+
6 God i olsem tron* blong yu gogo i no save finis.+
Mo septa* blong kingdom blong yu hem i septa blong stret fasin.*+
7 Yu yu laekem stret fasin,+ mo yu no laekem nating rabis fasin.+
From samting ya, God we i God blong yu, i kafsaedem moa oel blong glad+ long yu blong makemaot yu,+ i winim ol fren blong yu.
8 Evri klos blong yu oli smel gud long senta ya mir mo aloswud mo kasia.
Mo saon blong ol instramen we i gat string, we i stap kamaot long bigfala pales we oli flasem long tut blong elefen, i mekem yu yu glad.
9 Ol dota blong ol king oli stap long medel blong ol woman we yu stap ona long olgeta.
Kwin i stap stanap finis long raetsaed blong yu. Oli flasem hem wetem gol blong Ofiri.+
10 O dota, yu stap kwaet, yu pusum sora blong yu i kam, yu lesin.
Yu fogetem ol man ples blong yu mo haos blong papa blong yu.
11 Mo king bambae i wantem yu tumas from yu naes,
Yes, hem i masta blong yu,
Taswe yu bodaon long hem.
12 Dota blong Taea bambae i kam wetem wan presen,
Olgeta we oli rij moa long ol narafala man, bambae oli traehad blong mekem yu yu kaen long olgeta.*
13 Insaed long pales,* dota blong king i naes we i naes.
Ol klos blong hem oli flasem wetem gol.*
14 Hem i werem ol sas klos we oli wivim,* mo bambae oli tekem hem i go long king.
Oli tekem ol fren ya blong hem we oli no save man yet, we oli stap folem hem, oli kam long fored blong yu.
15 Bambae oli tekem olgeta i kam we oli glad we oli glad.
Bambae oli go insaed long pales blong king.
16 Ol boe blong yu bambae oli tekem ples blong ol olfala blong yu.
Bambae yu putumap olgeta olsem ol prins long olgeta ples long wol.+
17 Long olgeta jeneresen we i kam, bambae mi mekem ol man oli save nem blong yu.+
From samting ya, ol man bambae oli presem yu gogo i no save finis.