Ol Sam
Long daerekta. Blong plei folem “Yu No Spolem.” Singsing blong Deved. Miktam.*
58 ?Yufala i save tokbaot stret fasin taem yufala i stap kwaet nomo?+
Ol pikinini blong man, ?yufala i save jajem man long fasin we i stret?+
2 Nogat. Yufala i stap mekem ol rabis plan long hat blong yufala,+
Mo han blong yufala i mekem se i gat faet olbaot.+
3 Ol man nogud oli lusum rod* stat taem oli bon.*
Stat taem oli bon, oli stronghed mo oli man blong giaman.
4 Posen blong olgeta, i olsem posen blong snek.+
Sora blong olgeta i fas, olsem kobra snek we i satem sora blong hem.
5 Bambae hem i no lesin long voes blong man we i waes gud blong pleplei wetem hem
Nomata se man ya i gat gudhan blong yusum majik blong toktok wetem hem.
6 !O God, yu brekemaot tut blong olgeta!
!O Jehova, yu brekem jo blong ol laeon ya!*
7 I gud oli lus olsem wota we i ronaot.
I gud Hem i fasem bonara blong hem, mo i yusum ol ara blong hem blong mekem olgeta oli foldaon.
8 I gud oli olsem snel we taem i stap muv i go, wota blong hem i ronaot gogo hem i ded,
Mo olsem bebi blong woman, we i ded taem i bon mo i neva luk san.
9 Bifo we ol branj blong brambol oli mekem sospen blong yufala i kam hot,
God bambae i bloemaot ol branj we oli wetwet wetem olgeta we oli stap bon, olsem strong win i mekem.+
10 Stret man bambae i glad from hem i luk we God i givimbak.+
Leg blong hem bambae i wetwet gud long blad blong ol man nogud.+
11 Nao ol man bambae oli talem se: “I tru, ol stret man oli gat pei blong olgeta.+
Mo i tru nomo se i gat wan God we i stap jajem ol man long wol.”+