Jeremaea
30 Tok we Jeremaea i kasem long Jehova, i se: 2 “Hemia samting we Jehova God blong Isrel i talem, i se: ‘Yu raetemdaon long wan buk, olgeta tok we mi talem long yu. 3 From Jehova i talem se: “!Yufala i luk! I gat ol dei i stap kam, we bambae mi hivimap ol man blong mi we oli stap kalabus, hemia ol man Isrel mo Juda,+ mo bambae mi tekem olgeta i kambak long kantri ya we mi bin givim long ol olfala blong olgeta, mo bambae oli holem i blong olgeta bakegen,”’ hemia nao tok blong Jehova.”+
4 Hemia ol tok we Jehova i bin talem long Isrel mo Juda.
5 Hemia samting we Jehova i talem, i se:
“Mifala i harem ol man oli stap mekem noes from oli seksek,
Fraet nomo i stap mo i no gat pis.
6 Plis, yufala i traem askem sipos wan man i save bonem pikinini.
?Nao from wanem mi luk evri strong man oli putum han blong olgeta long bel* blong olgeta
Olsem wan woman we i stap bonem pikinini?+
?From wanem fes blong evri man i jenis i kam waet?
7 !O sore tumas! From we dei ya i nogud olgeta.*+
I no gat wan dei we i olsem,
Wan taem blong Jekob i harem nogud bitim mak.
Be bambae oli sevem hem long dei ya.”
8 Mo Jehova komanda blong ol ami i talem se: “Long dei ya, bambae mi brekemaot yok ya long nek blong yufala, mo bambae mi terem ol strap* blong yufala long tu, mo ol strenja* bambae oli no moa mekem hem i* slef blong olgeta. 9 Bambae oli wok blong Jehova God blong olgeta mo Deved we i king blong olgeta, we bambae mi givim long olgeta.”+
10 “Mo yu Jekob man blong wok blong mi, yu no mas fraet,” hemia nao tok blong Jehova,
“Isrel, yu no mas seksek.+
From bambae mi tekemaot yu long wan ples longwe, mi sevem yu
Mo mi sevem ol pikinini blong yu, long kantri ya we oli kalabus long hem.+
Jekob bambae i kambak mo i stap gud mo i stap long pis,
Mo i no gat man i save mekem olgeta oli fraet.”+
11 “From we mi mi stap wetem yu blong sevem yu,” hemia nao tok blong Jehova.
“Be bambae mi flatemgud olgeta man long ol nesen we mi bin mekem yufala i go stap wanwan long olgeta,+
Be yu, bambae mi no spolem yu.+
Bambae mi stretem yu go kasem mak we i stret long yu,
Mo bambae mi no lego yu yu stap we yu no kasem panis.”+
12 From hemia samting we Jehova i talem, i se:
“I no gat wan samting i save mekem kil blong yu i kam gud.+
Soa blong yu i no save kam gud.
13 I no gat wan man i save toktok long bihaf blong yu,
I no gat rod blong hilim ol bigbigfala soa blong yu.
I no gat samting blong mekem yu yu kam gud.
14 Olgeta we oli lavem yu tumas oli fogetem yu finis.+
Oli no moa lukaotem yu.
From mi mi wipim yu olsem wan enemi i wipim man,+
Mi panisim yu olsem wan man we i raf we i raf i mekem,
From we yu gat fol long plante samting mo yu gat plante sin.+
15 ?From wanem yu stap singaot bigwan from kil blong yu?
!Sobodi blong yu i no save kam gud!
From we yu gat fol long plante samting mo yu gat plante sin,+
Taswe, mi mi mekem samting ya long yu.
16 From samting ya, olgeta we oli stap spolem yu, bambae ol man oli spolem olgeta,+
Mo olgeta enemi blong yu tu, bambae ol man oli tekem olgeta oli go kalabus.+
Olgeta we oli stap spolem yu mo tekemaot olting blong yu, bambae ol man oli spolem olgeta mo tekemaot olting blong olgeta,
Mo olgeta evriwan we oli stap stilim olting blong yu, bambae mi putum olgeta long han blong ol man we oli stap stilim ol samting.”+
17 “Be bambae mi mekem se yu gat gudfala helt bakegen mo mi hilim ol soa blong yu,”+ hemia nao tok blong Jehova,
“Nating se ol man oli no wantem yu mo singaotem yu se:
‘Saeon, we man i no stap lukaotem.’”+
18 Hemia samting we Jehova i talem, i se:
“Olgeta long tent blong Jekob, we naoia oli stap kalabus, bambae mi tekem olgeta i kam wanples,+
Mo bambae mi sore long ol tabenakel* blong hem.
Bambae oli bildim taon ya bakegen long hil blong hem,+
Mo strongfala taoa blong hem bambae i stanap long stret ples blong hem.
19 Mo bambae oli stap talem tangkiu long mi mo bambae oli laf, oli stap mekem bigfala noes.+
Bambae mi mekem olgeta oli kam plante moa, bambae oli no smol nomo,+
Bambae mi mekem oli kam plante we plante,*
Mo bambae ol man oli no luklukdaon long olgeta.+
20 Ol boe blong hem bambae oli kam olsem bifo,
Mo long fes blong mi, asembli blong hem bambae i stanap strong.+
Bambae mi dil wetem olgeta we oli stap spolem hem.+
21 Haeman blong hem bambae i wan man blong hem nomo,
Mo rula blong hem bambae i kamaot long medel blong hem nomo.
Mo bambae mi mekem hem i kam klosap, mo bambae hem i kam long mi.”
“Sipos no, ?hu bambae i salem laef blong hem* blong kam long mi?” Hemia nao tok blong Jehova.
22 “Mo bambae yufala i kam man blong mi,+ mo mi bambae mi God blong yufala.”+
23 !Yu luk! Wan strong win bambae i kamaot long Jehova i kam, from we hem i kros,+
Bambae i blu i godaon long hed blong ol man nogud, olsem wan strong wael win we i brumaot evri samting.
24 Kros blong Jehova we i olsem faea, bambae i no finis
Gogo hem i mekem mo i finisim evri tingting we i stap long hat blong hem.+
Long ol laswan haf blong ol dei, bambae yufala i kasemsave samting ya.+