Fas Buk Blong Ol King

10 Nao kwin blong Seba i harem nius se haenem blong Solomon i joen wetem nem blong Jehova,+ nao hem i kam blong askem ol strong kwestin* long hem blong traem hem.+ 2 Hem i kamtru long Jerusalem wetem bigfala grup blong ol man blong wok blong hem,+ mo ol kamel we oli karem balsam oel,+ mo plante plante gol mo sas ston. Hem i go insaed blong luk Solomon mo i tokbaot evri samting we i stap long hat blong hem. 3 Mo Solomon i ansa long evri kwestin we hem i askem, i no gat wan we i had tumas* blong king i eksplenem long hem.

4 Taem kwin blong Seba i luk olgeta waes blong Solomon,+ mo haos we hem i wokem,+ 5 ol kakae long tebol blong hem,+ ples we ol man blong wok blong hem oli sidaon long hem, wok we olgeta we oli stap kasem kakae oli mekem mo klos blong olgeta, ol man blong karem dring blong hem, mo ol sakrefaes we hem i stap mekem oltaem long haos blong Jehova, hemia sakrefaes we i bon fulwan, kwin ya i sapraes tumas nao i no moa save toktok. 6 Nao hem i talem long king se: “Nius blong waes blong yu mo blong ol samting* we yu mekem, we mi bin harem taem mi stap long kantri blong mi, i tru nomo. 7 Be mi mi no bilivim ol tok ya go kasem we mi kam long ples ya mo mi luk long prapa ae blong mi. !Yu luk! Samting we mi mi harem i smol nomo. Yu yu waes moa mo yu rij moa i bitim wanem we mi harem. 8 !Ol man blong yu oli glad tumas! !Mo ol man blong wok blong yu we oli stap stanap oltaem long fored blong yu mo oli stap lesin long ol waestok blong yu, oli glad tumas!+ 9 I gud yumi presem Jehova we i God blong yu,+ hem i glad tumas long yu nao i putumap yu long jea blong king long Isrel. Jehova i lavem tumas ol man Isrel mo lav ya bambae i stap blong olwe, taswe hem i putumap yu yu king blong yu jajem ol man long jastis mo blong yu rul long stret fasin.”

10 Biaen kwin i givim 120 talen* blong gol mo plante balsam oel+ mo ol sas ston.+ King Solomon i neva kasem bakegen balsam oel we i plante we i plante olsem we kwin blong Seba i givim.

11 Ol sip blong Hiram we oli aot long Ofiri+ i kam, oli karem ol gol, be oli karem tu ol timba blong tri ya Algam+ we oli plante we oli plante, mo oli karem ol sas ston tu.+ 12 King i yusum timba blong tri ya algam blong mekem ol sapot blong haos blong Jehova mo long haos* blong king, mo hem i yusum tu blong wokem ol hap mo ol instramen we oli gat string, blong olgeta we oli stap singsing oli save yusum.+ Biaen oli neva karem ol timba blong algam i kam long ples ya bakegen, mo oli no moa luk kasem tede.

13 Nao King Solomon i givim eni samting we kwin blong Seba i wantem mo i askem, wetem sam moa samting we hem i glad nomo blong givim. Biaen kwin ya wetem ol man blong wok blong hem oli aot mo oli gobak long ples blong olgeta.+

14 Wet blong ol gol we Solomon i stap kasem evri yia, hem i 666 talen blong gol,+ 15 mo hem i kasem mane tu long ol bisnesman, ol tredaman, olgeta king blong Arebia, mo ol hed gavman long kantri ya.

16 King Solomon i wokem 200 bigfala sil long gol we oli miksim wetem wan narafala aean+ (long wan sil, hem i yusum 600 sekel* blong gol),+ 17 mo 300 smol sil* we hem i wokem long gol we oli miksim wetem wan narafala aean (long wan sil hem i yusum tri mina* blong gol). Biaen hem i putum ol samting ya insaed long Haos Blong Ol Tri Blong Lebanon.+

18 Biaen king i wokem wan bigfala jea blong king long tut blong elefen+ mo i blokem long gol we oli bonem i kam klin.+ 19 I gat sikis step blong go antap long jea ya, mo biaen long jea ya i gat wan smol ruf we i raon, mo long tufala saed blong jea ya i gat ples blong putum han long hem, mo i gat tu laeon+ i stanap long tufala saed ya blong putum han. 20 Mo i gat 12 laeon long ol sikis step ya, wanwan long olgeta oli stanap long tufala en blong ol step ya. I no gat wan narafala kingdom we i mekem wan samting olsem.

21 Olgeta kap blong dring blong King Solomon, oli wokem long gol, mo evri samting we i stap insaed long Haos Blong Ol Tri Blong Lebanon,+ oli wokem long gol we i klin gud. I no gat wan samting we oli wokem long silva from we long taem blong Solomon, ol man oli luk silva olsem wan samting we i nating nomo.+ 22 From we king i gat ol sip blong Tasis+ mo oli stap long solwota wetem ol sip blong Hiram. Mo wan taem long evri tri yia, ol sip blong Tasis oli kambak we oli fulap gud long gol, silva, tut blong elefen,+ mangki, mo pijin ya pikok.

23 King Solomon i rij moa i winim ol narafala king long wol+ mo i waes moa long olgeta.+ 24 Mo ol man long olgeta ples long wol oli askem blong toktok wetem* Solomon blong harem waes blong hem we God i putum long hat blong hem.+ 25 Mo wanwan long olgeta oli kam wetem wan presen blong givim long hem, olsem ol samting we oli wokem long silva, ol samting we oli wokem long gol, ol klos, klos blong faet, balsam oel, ol hos, mo ol hafkas dongki, mo fasin ya i gohed evri yia.

26 Mo Solomon i gohed blong hivimap ol jariot mo ol hos,* nao hem i gat 1,400 jariot mo 12,000 hos,*+ mo hem i putum olgeta long ol taon blong jariot mo long Jerusalem, klosap long king.+

27 King i mekem se silva long Jerusalem i kam plante we plante olsem ol ston, mo wud blong sida i kam plante olsem ol tri ya sikamo we oli stap long Sefela.+

28 Ol hos blong Solomon oli kam long Ijip, ol man oli hivimap ol hos ya long ol grup* mo oli salem, nao ol bisnesman blong king oli pem long wan praes nomo.+ 29 Evri jariot i kam long Ijip, praes blong wan hem i 600 silva mane, mo praes blong wan hos hem i 150 silva mane. Mo ol bisnesman blong king oli salem ol jariot mo ol hos ya i go long ol king blong Het+ mo ol king blong Siria.