Ol Sam
Long daerekta. Singsing blong Deved.
21 O Jehova, from paoa blong yu, king i glad.+
!Hem i glad bigwan from ol samting we yu mekem blong sevem man!+
2 Yu yu givim samting we hat blong hem i wantem tumas,+
Mo yu yu no holemtaet samting we hem i askem. (Selah)
3 From yu blesem hem bigwan, taem yu mitim hem,
Yu putum wan hat blong king we oli wokem long gol we i beswan,* long hed blong hem.+
4 Hem i askem laef long yu, mo yu givim long hem finis,+
Wan longfala laef, we i stap gogo i no save finis.
5 Ol samting we yu mekem blong sevem man, oli givim bigfala glori long hem.+
Yu mekem we ol man oli ona long hem mo yu flasem gud hem.
6 Yu mekem hem i kasem blesing olwe.+
Yu mekem hem i glad tumas from yu stap wetem hem.*+
7 From king i stap trastem Jehova.+
Mo from fasin blong Hae God blong lavem man oltaem, bambae i no gat wan samting i save seksekem hem.*+
8 Han blong yu bambae i faenem olgeta enemi blong yu.
Raethan blong yu bambae i faenem olgeta we oli no laekem yu.
9 Long stret taem we yu jusum blong lukluk long olgeta, bambae yu mekem olgeta oli kam olsem wan strong faea long oven.
Taem Jehova i kros, bambae hem i solemdaon olgeta, mo faea bambae i kakae olgeta.+
10 Bambae yu distroem ol laen blong olgeta* long wol ya
Mo ol pikinini blong olgeta we oli stap wetem ol man.
11 From oli gat tingting blong mekem wan nogud samting agensem yu.+
Oli mekem ol plan finis, be bambae oli no kamtru,+
12 From bambae yu mekem olgeta oli ron i gobak+
Taem yu stap makem olgeta long bonara* blong yu blong sutum olgeta.*
13 O Jehova, yu yu gat bigfala paoa, yu girap.
Bambae mifala i singim ol sing blong presem* bigfala paoa blong yu.