Ol Sam
33 Yufala we i gat stret fasin, yufala i glad, yufala i singsingaot from Jehova.+
I stret nomo blong ol stret man oli presem hem.
2 Yufala i plei long hap blong talem tangkiu long Jehova.
Yufala i plei long instramen we i gat ten string blong singim ol sing blong presem* hem.
3 Yufala i singim wan niufala singsing long hem,+
Yufala i plei gud long ol instramen we i gat string, mo yufala i singsingaot wetem, we yufala i glad.
4 From tok blong Jehova i stret,+
Mo evri samting we hem i mekem, man i save trastem.
5 Hem i laekem stret fasin mo jastis.+
Wol i fulap gud long fasin blong Jehova blong lavem man oltaem.+
6 Jehova i mekem heven long tok blong hem nomo,+
Mo from spirit* blong maot blong hem, hem i mekem evri samting we i stap long hem.*
7 Hem i hivimap solwota i kam olsem wan bigfala stonwol.+
Hem i putum ol wota we oli stap mekem bigfala noes, long ol stohaos.
8 I gud fulwol i fraet* long Jehova.+
I gud evriwan we i stap long gudfala graon ya, oli respektem hem bigwan.
9 From taem hem i tok, samting ya i kamtru.+
Hem i givim oda, mo samting ya i stanap strong.+
10 Jehova i spolem finis ol plan* blong ol nesen.+
Hem i blokem finis ol plan* blong ol man.+
11 Be ol desisen* blong Jehova bambae oli stanap olwe.+
Ol tingting long hat blong hem, oli stap bifo finis i kam mo bambae i stap olwe.
12 Nesen we God blong hem Jehova, hem i glad,+
Hemia ol man we hem i bin jusumaot olgeta blong oli stap olsem ol samting we i blong hem nomo.+
13 Jehova i stap long heven, i lukluk i kamdaon.
Hem i luk olgeta man long wol.+
14 Hem i stap long ples blong hem,
Hem i stap wajem gud ol man we oli stap long wol.
15 Hem nao i stap mekem hat blong olgeta evriwan.
Hem i jekemgud evri wok blong olgeta.+
16 Wan bigfala grup blong ol soldia i no save sevem wan king.+
Wan strong man, bigfala paoa blong hem i no save sevem hem.+
17 Hos i olsem wan giaman hop, i no save sevem man.*+
Bigfala paoa blong hem i no save mekem se man i ronwe long trabol.
18 !Yufala i luk! Ae blong Jehova i wajem olgeta we oli fraet* long hem,+
Hemia olgeta we oli stap wet long fasin blong hem blong lavem man oltaem,
19 Blong i tekemaot olgeta* blong oli no ded,
Mo blong i holem olgeta oli stap laef, long taem we kakae i sot.+
20 Yumi* stap wet long Jehova.
Hem nao i stap halpem yumi mo i sil blong yumi.+
21 Hat blong yumi i glad tumas from hem,
From yumi trastem tabu nem blong hem.+