Fas Buk Blong Kronikel
22 Biaen Deved i talem se: “Hemia nao ples we haos blong Jehova we i tru God bambae i stap long hem, mo hemia olta blong Isrel we i blong mekem ofring we i bon fulwan.”+
2 Biaen hem i givim oda blong oli tekem ol man blong narafala kantri we oli stap long Isrel oli kam wanples,+ mo hem i putum olgeta blong oli katem mo sepem gud ol ston, blong oli yusum blong wokem haos blong tru God.+ 3 Mo tu, hem i rerem plante aean blong oli wokem ol nil blong ol doa blong ol get, mo ol aean blong joenem ol samting. Mo hem i rerem plante kopa we man i no save skelem olgeta evriwan,+ 4 mo ol timba blong sida tu+ we man i no naf blong kaontem, from we ol man Saedon+ mo ol man Taea+ oli karem plante plante timba ya i kam long Deved. 5 Mo Deved i talem se: “Boe blong mi Solomon i yangfala nomo mo i no gat ekspiriens,*+ mo haos ya we bambae hem i wokem blong Jehova, bambae i naes we i naes tumas,+ nao ol man long olgeta kantri bambae oli harem nius+ blong haos ya mo oli save se i naes.+ Taswe bambae mi rerem ol samting blong hem.” Nao bifo we Deved i ded, hem i mekemrere plante plante samting blong haos ya i stap.
6 Mo tu, hem i singaot boe blong hem Solomon mo i talem long hem blong i bildim wan haos blong Jehova we i God blong Isrel. 7 Hem i talem long boe blong hem Solomon, se: “Long saed blong mi, mi mi wantem tumas long hat blong mi, blong mi wokem wan haos blong nem blong Jehova we i God blong mi, i stap long hem.+ 8 Be tok blong Jehova i kamtru long mi se: ‘Yu yu mekem tumas blad i ron, mo yu faet long plante wo. Bambae yu no wokem wan haos blong nem blong mi i stap long hem,+ from we yu yu mekem plante blad i ron i go long graon long fored blong mi. 9 !Yu luk! Bambae yu gat wan boe+ we bambae i wan man blong pis,* mo bambae mi mekem hem i spel long olgeta enemi blong hem we oli stap raonabaot long hem,+ from we nem blong hem bambae hem i Solomon,*+ mo bambae mi mekem se long taem blong hem i gat pis mo kwaet taem long Isrel.+ 10 Hem nao bambae i bildim haos we nem blong mi bambae i stap long hem.+ Hem bambae i kam boe blong mi mo mi bambae mi kam papa blong hem.+ Mo bambae mi mekem jea blong king blong hem i stap strong blong olwe long Isrel.’+
11 “Naoia boe blong mi, i gud Jehova i stap wetem yu, mo i gud wok blong yu i go gud mo yu bildim haos blong Jehova we i God blong yu, stret olsem we hem i bin talem long saed blong yu.+ 12 Antap long ol samting ya, i gud Jehova i givim waes long yu mo i mekem yu naf blong kasemsave samting,+ taem hem i givim paoa long yu blong rulum Isrel, olsem nao bambae yu save holemtaet loa blong Jehova we i God blong yu.+ 13 Nao sipos yu folem gud ol rul mo ol jajmen we Jehova i talem long Moses blong i givim long ol man Isrel,+ bambae wok blong yu i go gud.+ Yu mas gat strong tingting mo yu mas strong. Yu no mas fraet o seksek.+ 14 Mi mi traehad bigwan blong rerem ol samting blong haos blong Jehova, i gat 100,000 talen* blong gol, 1,000,000 talen blong silva, mo ol kopa mo aean we oli plante tumas+ nao man i no save skelem, mo mi rerem plante timba mo ston,+ be bambae yu ademap sam moa samting blong joenem. 15 I gat plante man blong wok we oli stap wetem yu, i gat ol man blong katem ston, ol man we oli stap wokem ol haos long ston,+ ol kapenta, mo ol man we oli gat gudhan blong mekem ol defdefren kaen wok.+ 16 Ol gol, ol silva, ol kopa, mo ol aean oli plante tumas, nao ol man oli no naf blong skelem.+ Yu girap mo yu statem wok, mo i gud Jehova i stap wetem yu.”+
17 Biaen Deved i givim oda long olgeta prins blong Isrel blong oli givhan long boe blong hem Solomon, i se: 18 “Jehova we i God blong yufala i stap wetem yufala, mo hem nao i stap mekem yufala i spel long olgeta enemi we oli stap raonabaot long yufala. Mo hem i putum ol man blong kantri ya long han blong mi, nao mi winim kantri ya, long fored blong Jehova mo long fored blong ol man blong hem. 19 Naoia yufala i mas lukaot Jehova we i God blong yufala,+ long olgeta hat mo sol* blong yufala. Mo yufala i mas stat blong bildim tabu ples blong Jehova we i tru God,+ blong oli save tekem bokis blong kontrak blong Jehova mo ol tabu samting we oli blong tru God+ i kam long haos ya we oli wokem blong nem blong Jehova i stap long hem.”+